Reformës në drejtësi ‘iu gjet baba’, e nuk bika gjë me ‘Noc Rrokun’!

Nga Gent Strazimiri

E dinim për ‘amerikane’, ‘euro-atlantike’ që në ngjizje, me nënë e me babë...

E dinim produkt ‘të jashtëm’, me garanci dhe vulë cilësie ‘Made in EU’ apo ‘Made in USA’, të pasfidueshme nga askush.

U prit si ‘shpata e Zotit’ që do të ndëshkonte mëkatet e mëkatarët në këtë ‘Sodomë’ të kohërave moderne, në të cilën jetojmë...

U promovua si një lloj ‘divinity’, një lloj ‘immaçulate conception’ për të cilën ishte herezi qoftë edhe ta mendoje se mund të ketë imperfeksione...

‘Turra e druve’ e epokës digjitale ishte gati në çdo moment, në pritje të cilitdo që guxonte ta quante me emrin e saj të vërtetë: një pjellë bastarde, pa paraardhës, me nënë të dyshimtë e shumë baballarë të mundshëm e të panjohur...

Mirëpo dje më në fund i doli baba!

Atësinë e saj e mori përsipër bash sundimtari i ‘Sodomës’, ai, pa urdhërin e të cilit nuk ndodh asnjë mëkat...

Ai që, ndërsa ngjizej kjo pjellë pa të shkuar e pa të ardhme, në mënyrë të përsëritur, publikisht, deklaronte se nuk e njihte, nuk ia kishte njohur as ‘të ëmën’, madje që kishte refuzuar ta lexonte edhe ‘draftin e përgatitur nga ndërkombëtarët’, nga ata që kishin marrë përsipër autorësinë e mbarsjes...

Ai, që pjellën e tyre do ta pranonte ashtu siç do dilte...

Dje, ndërsa pranonte publikisht ‘atësinë’, shtoi edhe se e kishte ‘fmijë dishiri’, se e kishte ëndërruar dhe ngjizur ‘sipas imazhit të tij’, për të bërë pikërisht këtë që po bën sot...

Nga dje, askush nuk mund të fshihet pas pasaportës euro-atlantike të ‘reformës në drejtësi’, i ati i së cilës doli, dhe është bir i papenduar i një persekutori, vrasësi poetësh.

Nga dje, cilitdo prej ruralëve të studiove të mbrëmjes që e ka merak të jetë ‘korrekt’ me informacionet zyrtare që përdor, në dorë i ka mbetur ‘Noc Rroku’....

Por, pemën gjenealogjike të ‘reformës në drejtësi’ e ka zyrtare, me dëshmi në dorë të parë, përmes gojës dhe fytyrës më të ndotur të kësaj ‘Sodomës’ sonë.

Atit të saj!

Me pak fjalë, ‘reforma në drejtësi’ s'është gje tjetër veçse një produkt i lokal artizanal i ‘Sodomës’, me gjyshërit nga ‘Gomorra’, e formuar në ‘Arqipelag Gulag’ e me manual përdorimi ‘Fremën e kafshëve’...

Është vërtetë një miksturë personazhesh letrare e librash të shenjtë, por në librat e shenjtë personazhet janë dy llojesh: hyjnorë e djallëzorë.

Aty gjen edhe parajsën edhe ferrin.

Ka vetëm një ndryshim me realitetin tonë: gjithçka është kokëposhtë!!

Kjo është aspak ‘hyjnore’!

Duke qenë dhe se po e vuajmë vërtetë, e nuk po e lexojmë si një ndodhi e tjetrëkundit, sado që është edhe komike me bollëk, nuk më duket aspak as si ‘komedi’!!! Përkundrazi!

P.S. nga ky moment, ‘Noc Rroku’ është i lutur të shofi punt e veta!

KAQ!