Flash News

Gazeta më e madhe izraelite shkruan për aktin e dëshmorit shqiptar, Arben Anamali

Nga Venezuela për të ushtruar pr*stitucion në Vlorë, në hetim 3 vajza

Kapet në Fushë Kuqe i riu me rrezikshmëri të lartë (EMRI)

Aksoni antid*ogë në Shkodër, kush është ish-Shefi i Krimeve i shpallur në kërkim nga SPAK

D*ogë nga Amerika Latine/ SPAK aksion në Shkodër, lëshohen 13 urdhër-arreste, edhe policë të përfshirë

OPINEWS

Shënim/ Chris Hill rikthehet në Ballkan. Pse?

Politiko 15 Tetor 2021, 12:33
Shënim/ Chris Hill rikthehet në Ballkan. Pse?

nga Virgilius*

Edhe pse prej disa vitesh diplomat në pension, siç thuhet rëndom në kësi rastesh, me një urdhër ekzekutiv të presidentit të SHBA-së Joseph Biden, Christopher Hill emërohet ambasador i SHBA-së në Serbi. Ish-ambasador në Irak, Kore, Poloni dhe, në atë që quhet sot Maqedoni e Veriut – kujtojmë këtu se pas një ndërprerje prej 52 vjetësh të marrëdhënieve diplomatike midis SHBA-së dhe Shqipërisë, Cristopher Hill do të ishte njeriu që më 1 tetor 1991 do të rihapte në Tiranë ambasadën amerikane, duke kryer funksionet e Chargé d’Affaires për t’i lënë vendin pasardhësit të tij W. E. Ryerson -, Hill ka qenë për një farë kohe edhe asistent i Sekretarit të Shtetit për Çështjet e Azisë dhe të Paqësorit lindor. Me pak fjalë, një diplomat race që, mjafton t’i hedhësh një sy të shpejtë CV-së, për të kuptuar se, për arsye që lidhen me përgatitjen dhe reputacionin e tij, ai ka shërbyer në një sërë pikash të nxehta të rruzullit tokësor.

            Ambasadori Hill zëvendëson Anthony Godfrey-n, i cili u emërua në këtë detyrë nga ish-presidenti Trump në nëntor të vitit 2019. Përtej çdo komenti mund të themi se, duke krahasuar profilet e të dy diplomatëve, shihet qartë se, të paktën në Shtëpinë e Bardhë, është kuptuar se të ashtuquajturat nyje gordiane në Ballkanin Perëndimor nuk mund të zgjidhen nga nëpunës të përhimë, por njerëz që kanë nevojë për përvojën, mendimin dhe veprimin e figurave me spesor të lartë politik e diplomatik, siç është rasti i Christopher Hill-it. Largimi para kohe i Godfreyt, sipas një praktike të njohur diplomatike mandati përfundon pas katër vjetësh shërbimi, nuk ka të bëjë vetëm e thjesht me faktin se ky i fundit u emërua nga Presidenti i mëparshëm, ndoshta as me faktin se Godfrey parapëlqente një linjë të butë me Serbinë, duke i mëshuar forcimit të marrëdhënieve dypalëshe dhe, veçanërisht, atyre në fushën e ekonomisë e të shkëmbimeve tregtare – siç bën të ditur gazeta “Danas” në një aktivitet të ditës së djeshme në Beograd me rastin e 140-vjetorit të vendosjes së marrëdhënieve diplomatike midis SHBA-së dhe Mbretërisë së dikurshme, Godfrey do t’i mëshonte fort nivelit të lartë të bashkëpunimit midis SHBA-së dhe Jugosllavisë së Titos në të gjitha fushat, duke përfshirë edhe atë ushtarake – madje as emërimit nga ana e Serbisë vitin e kaluar të ish-Drejtorit të Kancelarisë për Kosovën pranë qeverisë së Serbisë, Marko Gjuriç, njeri i afërt i presidentit Vuçiç, ambasador në Washington – konotacioni është i qartë dhe pa nevojë për shpjegime – se sa i faktit që vëzhgues të ndryshëm shohin në këtë lëvizje një rikthim të diplomacisë amerikane në Ballkan. Ndoshta këtë herë, për t’i vënë pikat mbi “i” – në mesazhin që i dërgonte presidentit serb Vuçiç me rastin e festës kombëtare, presidentin Biden theksonte përmirësimin e marrëdhënieve mes Serbisë e Kosovës si dy vende sovrane, çka, në mënyrë të kuptueshme, fshiu çdo iluzion serb për ndonjë zbutje të politikës së jashtme amerikane me administratën e re të Presidentit Biden. Kjo gjë vihet re edhe në emërimin e Gabriel Escobar-it si i dërguar i posaçëm i SHBA-së për Ballkanin Perëndimor në vend të Matthew Palmer-it dhe, sidomos, prania e të parit në bisedimet e zhvilluara në Bruksel për zgjidhjen e krizës më të fundit mes Kosovës e Serbisë.

            Në mënyrë lakonike dhe pa kurrfarë nuancash politike lajmi është transmetuar edhe nga mediat e shkruara dhe elektronike të Beogradit. E përditshmja “Politika” thekson faktin se Hill është një njohës i mirë i rajonit – thënë me fjalë të tjera, i problematikave të tij – dhe se më parë ka kryer rolin e të dërguarit të posaçëm amerikan për Kosovën, duke përmendur faktin se në vitin 1999, në Rambouillet, ai ka luajtur një rol me peshë në krah të Sekretares së Shtetit të asaj kohe Madeleine Albright.

*Virgilius është pseudonim i një bashkëpunëtori të Politiko, njohës i zhvillimeve diplomatike dhe politike në rajon

Të fundit