Marrëveshja e nënshkruar midis Partisë Demokratike, Lëvizjes Socialiste për Integrim dhe partive të tjera aleate ka zbardhur edhe objektivat që këto forca politike kërkojnë të arrijmë me krijimin e Qeverisë Tranzitore.
Në pikën e dytë të marrëveshjes theksohet se “partitë nënshkruese të këtij Koalicioni do të regjistrohen në zgjedhje vetëm pasi të jenë krijuar kushtet për zgjedhje të lira dhe të ndershme”, ndërkohë që në pikën pasardhëse saktësohet se “rruga e vetme për të garantuar këto zgjedhje është formimi i një Qeverie Tranzitore me mandat të posaçëm.”
Kjo Qeveri kalimtare, sipas opozitës, do të ketë për objektiv:
-Kthimin e legjitimitetit politik të qeverisjes në vend nëpërmjet zgjedhjeve të parakohshme parlamentare.
-Përgatitjen e zgjedhjeve të lira dhe të ndershme parlamentare dhe vendore në Shqipëri.
-Realizimin e reformës zgjedhore dhe ndjekjen e zbatimit të saj, me fokus të veçantë shkëputjen e lidhjes mes politikës dhe krimit, luftën ndaj fenomenit masiv të blerjes së votave, intimidimit kriminal mbi zgjedhësit, si dhe eleminimin e pabarazisë mes partive politike pjesëmarrëse në zgjedhje.
-Krijimin e klimës së besimit për zbatimin e reformës në drejtësi jashtë çdo ndërhyrjeje politike.
-Krijimin e kushteve të nevojshme për të përshpejtuar nisjen e negociatave të Shqipërisë për antarësimin në Bashkimin Europian dhe ndërmarrjen e çdo reforme të nevojshme për këtë qëllim.
Në deklaratën e opozitës, Qeveria e Edi Ramës akuzohet se ka bashkëpunuar me krimin e organizuar për blerjen e votave dhe kryeministri bëhet përgjegjës drejtëpërdrejtë për krizën në të cilën ndodhet vendi. Qeveria e Ramës akuzohet gjithashtu për bashkëpunim me oligarkët në shpërdorimin e burimeve ekonomike të Shqipërisë.
Por, një detaj interesant në 10 pikat e marrëveshjes së koalicionit opozitar është fakti se aty nuk është vendosur kusht largimi i kryeministrit Edi Rama. Në të gjithë pikat flitet për bashkëpunimin e Ramës me krimin, por në momentin kur kërkohet Qeveria Tranzitore ajo nuk shoqërohet nga pas me kushtin “pa Ramën kryeministër”.
Gjithsesi, aleatët e PD-së, në deklaratat që po japin për mediat pas nënshkrimit të marrëveshjes, gojarisht e kërkojnë krijimin e Qeverisë Tranzitore pa Edi Ramën në pozicionin e kryeministrit.
Discussion about this post