Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Pas Kakavijës, kaos edhe në Kapshticë/ Pala greke lejon të kalojnë 300 persona në ditë, dhjetëra qytetarë në pritje: Aman na bëni derman!

Politiko 29 Gusht 2020, 13:14

Pas Kakavijës, kaos edhe në Kapshticë/ Pala greke lejon të

Pas situatës së vështirë të krijuar në mesin e gushtit, ku për 5 ditë mijëra qytetarë u detyruan të presin në radhë kilometrike në doganën e Kakavijës për të kaluar në tokën greke, këtë herë është pika kufitare e Kapshticës ajo e cila po përballet me një situatë të ngjashme kaosi gjatë ditës së sotme.

Shkak për këtë janë bërë masat kufizuese të vendosura nga qeveria greke në kohë pandemie. Greqia vendosi ditën e djeshme që të shtyjë edhe për 14 ditë masat kufizuese për parandalimin e përhapjes së Covid-19, të cilat përfshijnë rregullin për kalim të 750 qytetarëve në ditë nga Kakavija dhe 300 Kapshtica.

Dhjetëra automjete dhe gati rreth 70 qytetarë deri tani, nuk iu është lejuar kalimi në Kapshticë, duke i lënë në pritje, pas përmbushjes së kuotës ditore prej 300 personash. Sportelet janë mbyllur që në orën 08:30, të mëngjesit të sotëm pas përmbushjes së kuotës.

Kujtojmë se, Greqia ka lënë ende në fuqi detyrimin për të treguar test pcr negativ i kryer brenda 72 orëve nga momenti që qytetari tenton të kalojë pikën kufitare. Si dhe, po ashtu, mbetet në fuqi ndalimi për hyrjen e turistëve nga Shqipëria deri në datën 15 shtator.

Të ndodhur në një situatë të tillë qytetarët ankohen se ju skadon afati prej 72 orësh i tamponit dhe se do t’ju duhet të paguajnë sërish për një analizë të re si dhe për biletën e autobusit, ndërsa i kërkojnë përgjegjësi për lëmshin e krijuar qeverisë shqiptare.

“Zgjodhëm të ktheheshim sot se e kishim të planifikuar, s’ka përditë autobusa. Ne bëmë tamponin e morëm përgjigjen dhe sot që në 9 jemi këtu. Na bëni derman, s’kemi më lekë për tampon, po na skadon afati prej 72 orësh”, tha një qytetare.

“Do bëj tampon tjetër unë dhe do vij prapë. E njëjta gjë do ndodhë këtu. Shteti të lëvizë!”, shprehet i irrituar një tjetër qytetar.

Ndërkaq, një tjetër qytetar është ankuar pas mbylljes së pikës kufitare, duke shtuar se po tallen me popullin. “Ku të vemi? Lëvizni për këtë popull! E kam bërë pardje tamponin, dje kam ardhur këtu, polici më tha që nesër në orën 6 hapet kalimi. Tani kaluan 300 vetë, ne mbetemi. Këta po tallen me popullin.”

Po ashtu, referuar kufizimeve, vlen të theksohet se nje rregull i ngjashëm për ndalimin e hyrjes së turistëve nga Shqipëria deri më 15 shtator është vënë në fuqi edhe nga Maqedonia e Veriut.