Pas komentit të Nas, reagon Ermali: Ne në Shqipëri nuk i trajtojmë gratë si objekte seksi

Diçka që nisi shumë bukur dhe përfshiu gjithë shqiptarët, ka përfunduar në një sherr që ka marrë vëmendje të gjerë mediatike dhe komente të shumta në rrjete sociale. Nuseir Yassin, djaloshi që ka xhiruar video për Shqipërinë ishte i ftuar bashkë me të dashurën e tij, Alyne, në "Xing me Ermalin". Por një pyetje e pafajshme e Kejvinës, ka bërë që e gjitha kjo të kthehet në 'boomerang'. Përveç faktit që Alyne u ndje e ofenduar dhe shpërtheu në të qara pas pyetjes “Po gjithë këto udhëtime i bën për të takuar goca?” Ka reaguar edhe Nas. Ermali ka postuar një nga pjesët e kësaj skene në Instagram dhe Nas ka menduar që intervista e tyre është censuruar dhe ka reaguar duke i komentuar Ermalit. Ermali shkruante: “Edhe kjo s’na kishte bërë vaki”. Menjëherë pas postimit vjen dhe reagimi i blogerit Nuseir Yassin, i cili shkruan:

“Kjo nuk është në rregull. Ti nuk ke transmetuar fillimin e intervistës. Pjesën ku tregove mungesë respekti ndaj meje dhe të dashurës time. Ti ke fshehur pjesën ku njerëzit do të shikonin sa e shpifur ishte kjo intervistë. Unë prisja gjë tjetër, nuk e mendoja se ti do të përfitoje nga kjo intervistë në këtë mënyrë.”

Ndërkohë edhe Ermali i ka kthyer përgjigje: “Hej vëlla … Më vjen keq që ndihesh kështu. Unë kurrë nuk do të prisja pjesë të shfaqjes për të bërë ndonjë nga të ftuarit e mi të duket keq … Ne presim vetëm pjesë të vogla për t’i dhënë ritëm emisionit. Kjo është diçka që e bëjnë të gjitha shfaqjet televizive që regjistrohen paraprakisht. Videoja e plotë e këtij episodi është në fund të këtij mesazhi. Do të doja të theksoja se për atë që u dha në transmetim, e kishe dhënë lejen ti, e mban mend? Edhe Arbëri ishte atje. Ju gjithashtu keni një kopje të plotë të emisionit të regjistruar nga kamera juaj. Gjithsesi, unë jam i lumtur që ky keqkuptim të paktën shërbeu për të ngritur vetëdijen për një temë të rëndësishme, si të drejtat e grave dhe barazia. Alyne është një person i mrekullueshëm dhe ishte një nder që ju të dy ishit në shfaqjen time. Megjithatë, unë do të vazhdoj të bëj pyetje të papërshtatshme që krijojnë humor, për disa momente në shfaqjen time. Kjo është ajo që ne bëjmë, me asnjë qëllim të shkeljes së të drejtave të një personi apo grupi njerëzish. Falë Zotit, ne nuk jetojmë në një vend ku humori është censuruar. Zoti ju bekoftë të dy dhe ju mirëpresim që ti dhe Alyne të vini përsëri për t’u martuar në vendin tonë. PS: Në Shqipëri, ne nuk i trajtojmë gratë si objekte seksi”!