Sekretari i Përgjithshëm i PD, Gazmend Bardhi në një konferencë për shtyp paralajmëroi se në ditët në vijim do të publikojnë fakte për një tjetër kryebashkiak të PS me të kaluar të dyshimtë, pa dhënë më shumë detaje. Nëse i referohemi qëndrimit të Gerti Bogdanit, dhënë më 18 gusht në Fax News, radha është e kryebashkiakut të Lezhës, Pjerin Ndreu.
“Ka dhe të tjerë në listën e personave me të shkruar kriminale, natyrisht në krye të saj është Pjerin Ndreu por ka edhe të tjerë. Shtatori, me zullumet e kësaj qeverie do të jetë vijim i frontit kundër tij dhe qeverisjes së tij. Ka shumë persona që protestojnë edhe në heshtje kundër kësaj keqqeverisjeje”, sqaroi Bogdani.
Veç Ndreut, ekziston edhe një listë me nëntë kryebashkiakë socialiste, që kanë ndryshuar emra, mbiemra, atësi dhe që kanë pranuar se kane qene te dënuar për vepra të ndryshme penale.
Ilir Xhakolli, kryebashkiaku i Pogradecit, në formularin e dekriminalizimit ka deklaruar se gjeneraliteti i tij i mëparshëm ka qenë Ilirjan Xhago, mirëpo mohon se ka qenë ndonjëherë i dënuar në Shqipëri apo jashtë vendit.
Mbiemër të ndryshuar ka konfirmuar edhe kryebashkiaku i sapo-konstituuar i Sarandës, Adrian Gruma, që siç pritej doli fitues nga votimet e 30 qershorit. Mbiemri i tij i mëparshëm ka qenë Gurmo.
Kryebashkiak i PS në Memaliaj, Gjolek Guci ka pranuar se ka përdorur edhe emër, mbiemër dhe atësi tjetër. Nga Gjolek Myslym Guci në Spiro Jorgo Kuremenos.
Edhe Nuri Belba i Bashkisë së Përrenjasit ka ndryshuar emrin. Ai ka deklaruar se më parë e ka pasur emrin Nuredin, ndërsa arsyet nuk dihen.
Mbiemrin e ka ndërruar edhe aktori Erjon Isai që u emërua në Kolonjë . Ai deklaron se mbiemri i mëparshëm ka qenë Isa.
Ndërsa Mark Babani i Vaut të Dejës ka ndryshuar mbiemrin ku më herët e ka pasur Babaj. Fenomenit nuk i ka shpëtuar as kryebashkiaku i Finiqir, Kristo Kiço që garoi nën siglën e Partisë Mega, i cili ka ndryshuar mbiemrin, të cilin më herët e ka pasur Katrani.
Po ashtu identitet ka ndryshuar edhe kryebashkiaku i PS në Himarë, Jorgo Goro, i cili më parë quhej Gjergji Goro.
Ndërsa Artur Bushi i Bashkisë së Krujës ka pranuar në formularin e vetëdeklarimit se ka qenë i arrestuar disa herë për trafik drogë në Itali në qytetet e Kasertës dhe Busto Arsisioz në 1996 dhe 2011.
