Aktori legjendar i ‘General Hospital’, ndërron jetë në moshën 79-vjeçare

Tristan Rogers, aktori australian ka ndërruar jetë në moshën 79-vjeçare. Lajmi vjen më pak se një muaj pasi ai bëri një paraqitje të veçantë në serialin që e bëri të famshëm.

‘E gjithë familja e ‘General Hospital’ është thellësisht e tronditur nga ndarja nga jeta e Tristan Rogers,’ deklaroi producenti ekzekutiv i serialit, Frank Valentini. ‘Për 45 vjet, Tristan magjepsi fansat tanë dhe Port Charles nuk do të jetë më i njëjti pa të (dhe pa Robert Scorpio-n).’

I lindur në Melbourne të Australisë, Rogers nisi rrugëtimin e tij artistik në të njëzetat, si baterist në një grup muzikor. Pas dështimit të grupit, ai nisi të punonte si model dhe në reklama, për të siguruar të ardhura, dhe më pas vendosi të provonte aktrimin. Pas disa roleve në Australi dhe një përvoje si DJ, ai u zhvendos në Los Anxhelos për të ndjekur ëndrrën e tij në Hollywood.

Në fillimet e tij, aksenti i fortë australian ishte një pengesë për të, por në vitin 1980 arriti të sigurojë një rol dy-ditor në ‘General Hospital’ – rol që do të ndryshonte jetën e tij.

‘Nuk kisha asnjë ide sa i madh ishte seriali,’ tha Rogers në një intervistë në vitin 2022 për ‘State of Mind with Maurice Benard’, një podcast i drejtuar nga kolegu i tij në ‘General Hospital’.

Ai tregoi se ishte thirrur thjesht për të rrahur personazhin kryesor, Luke (luajtur nga Anthony Geary), dhe më pas të largohej nga seriali. Por producentja ekzekutive Gloria Monty, pas vetëm gjysmës së parë të ditës së xhirimeve, e pyeti nëse dëshironte të qëndronte. Pa një personazh të shkruar, për disa javë ai shfaqej në skena duke ‘dukur i dyshimtë’ – deri sa u krijua identiteti i spiunazhit ‘CK8’, që më pas mori emrin Robert Scorpio.

Robert Scorpio do të bëhej një nga figurat më të dashura dhe të rëndësishme të serialit për dekada, edhe gjatë periudhave kur Rogers nuk ishte pjesë aktive e kastit.

Një nga romancat më të dashura të fansave ishte ajo mes Scorpio dhe Holly Sutton (luajtur nga Emma Samms), si dhe marrëdhënia e ndërlikuar me spiunen tjetër, Anna Devane (Finola Hughes), me të cilën ndanin një vajzë, Robin (luajtur nga Kimberly McCullough).

Në vjeshtën e vitit 2024, Samms u rikthye në serial, ku u zbulua se Scorpio ishte babai i vajzës së saj të rritur, Sasha Gilmore (Sofia Mattson). Rogers dhe Samms u larguan bashkë nga seriali në nëntor 2024, në një skenë që i bëri homazh filmit klasik ‘Casablanca’.

Në korrik 2025, Rogers u shfaq për herë të fundit në ‘General Hospital’, kur Sasha, me foshnjën e saj të sapolindur, mbërriti në shtëpinë e tij në Francë. Pikërisht në këtë episod, u zbulua se aktori vuante nga kanceri në mushkëri.

Përveç rolit të tij legjendar në ‘General Hospital’, Rogers ka luajtur edhe në serialet ‘The Bold and the Beautiful’, ‘The Young & the Restless’ dhe ‘Studio City’ – për të cilin fitoi çmimin Daytime Emmy si aktori më i mirë dytësor në një dramë dixhitale.

Ai la pas gruan e tij, Teresa Parkerson, si dhe një vajzë dhe një djalë.

Pusho në paqe, Robert Scorpio – një ikonë që do të mungojë shumë në ekran dhe në zemrat e fansave.