Akuzohen për plagosje, vëllezërit Veshaj rrezikojnë burg, si ‘e shpërfytyruan’ vlonjatin 5 vite më parë

Romeo dhe Donald Veshaj janë rikthyer sërish në qendër të vëmendjes së medieve. Prej daljes së Donaldit nga Big Brother, dyshja pati një perioudhe pause duke qëndruar larg shtypit, për t’u rikthyer zyrtarisht në television me emisionin “Më lër të flas” në Top Channel.

Mirëpo, dy vëllezërit binjakë janë rikthyer në qendër të ‘zhurmës’ mediatike, pas një skandali të raportuar sot nga gazetarja Anduela Llabani.

Llabani deklaroi se pesë vite më parë dy vëllezërit kanë plagosur dikë dhe janë dënuar për veprën penale, por çështja është rikthyer në gjykatë për shqyrtim.

Mësohet se Romedo dhe Donald Veshaj janë dënuar në vitin 2017 nga Gjykata e Vlorës për veprën penale “plagosje e rëndë me dashje”, kryer në bashkëpunim (Neni 88/1 e 25 i Kodit Penal). Gjykata dha një vendim të lehtë për dy vëllezërit.

Sipas Llabanit, Prokuroria e Vlorës e ka dërguar çështjen në fjalë për rishqyrtim në Gjykatën e Lartë. Kjo e fundit e ka regjistruar rekursin dhe ka caktuar si datën e seancës së parë 27 majin.

‘Neni 88’ për veprën penale “Plagosje e rëndë me dashje” parashikon dënimin me tre deri në 10 vite burgim.

“Plagosja e kryer me dashje që ka sjellë si pasojë gjymtimin, shëmtimin ose çdo dëmtim tjetër të përhershëm të shëndetit, ndërprerjen e shtatzanisë, ose ka qenë e rrezikshme për jetën në çastin e shkaktimit të saj, dënohet me burgim nga tre deri në dhjetë vjet”, thuhet në nen.

Por si ka ndodhur ngjarja?

Në dosjen e siguruar nga Ora News, tregon se bëhet fjalë ngjarjen e ndodhur më 7 shkurt të vitit 2013, afër shkollës së Mesme “Mustafa Qemal Ataturku” në lagjen "Pavarësia" të Vlorës, ku ka ndodhur një sherr mes disa personave dhe ka mbetur i plagosur me mjete të forta Arjan L.

Asokohe Donald dhe Romeo Veshaj kanë qenë nxënës të një tjetër shkolle të Mesme. Arjan L. ishte duke pritur të fejuarën e tij të dilte nga shkolla dhe sapo vajza ka dalë nga dera, një makinë ka xhiruar gomat para saj duke bërë veprime provokuese. Arjan L. ka shkuar drejt mjetit dhe ka debatuar me Romeo Veshajn.

Një ditë më vonë, 7 shkurt 2013, rreth orëve të drekës, Arjani ka qenë po në afërsi të shkollës në shoqërinë e tre kushërinjve të vajzës të së fejuarës. Kur dy prej tyre janë larguar, Arjan L. bashkë me një kushëri tjetër dhe vajzën kanë shkuar në drejtim të një qendre tregtare.

“Në këtë moment Arjanin e kanë thirrur një grup personash mes tyre dhe Romeo dhe Donaldi. Fillimisht janë debatuar me Arjanin e më pas e kanë goditur të githë së bashku me sende të forta. Më aktiv në këtë ngjarje kanë qenë dy të pandehurit Romeo dhe Donald Veshaj. Në këtë ngjarje ata janë ndihmuar edhe nga persona të tjerë të cilët kanë qenë të pranishëm para ngjarjes dhe në vijim” thuhet në dosjen e prokurorisë.

Personat të cilët kanë qenë në shoqërinë e Arjan L, e kanë shoqëruar këtë të fundit në spital për të marrë ndihmën mjekësore.

“Konkretisht i janë konstatuar thyerje e kockës së kokës, zhytje të dukshme në regjionin ballor në kokë, tronditje e trurit të shkallës së mesme. Dëmtimet e mësipërme janë shkaktuar me mjete të forta mprehëse dhe janë klasifikuar si plagosje e rëndë pasoi kanë sjellë shëmtimin e përhershëm të fytyrës” shkruhet në dosjen e prokurorisë.