Ben Affleck thotë se nëse nuk do të ishte ndarë nga Jennifer Garner do të ishte ende i varur nga alkooli

Ben Affleck mendon se nuk do të kishte hequr dorë nga alkooli nëse do të vazhdonte të ishte i martuar me Jennifer Garner

“Ne ndoshta do të kishim përfunduar në fyt të njëri-tjetrit. Ndoshta do të isha duke pirë akoma”, tha Affleck së fundmi në "The Howard Stern Shoë" të SiriusXM. "Një pjesë e arsyes pse fillova të pija ishte sepse isha në kurth."

Affleck, i cili shkoi në rehabilitim për alkoolizmin në vitin 2018, vijoi më tej me rrëfimin e tij:

"Ndjeja se mund të largohesha për shkak të fëmijëve të mi, por nuk isha i lumtur. S’dija çfarë të bëja. Dhe ajo që bëra ishte të pija një shishe skoceze dhe të bija në gjumë në divan, gjë që rezultoi të mos ishte zgjidhja.”

“Në fund të fundit, ne u përpoqëm, u përpoqëm sepse kishim fëmijë, por të dy ndiheshim sikur nuk donim që ky të ishte modeli që fëmijët tanë ta shohin martesën,” - shtoi aktori.

Dy aktorët kanë qenë të martuar nga viti 2005 deri në vitin 2018 dhe kanë tre fëmijë: Violet, 16 vjeçe, Seraphina, 12 vjeçe dhe Samuel, 9.

Aktori tha gjithashtu se tabloidët e kishin gabim për ndarjen e tyre:

“Gjithçka që lexoja në lajmet për divorcin ishte e pavërtetë. E vërteta ishte se ne morëm kohën tonë, morëm vendimin tonë ... Ne u ndamë. Ne kishim një martesë që nuk funksionoi. Kjo ndodh. Ajo është dikush që e dua dhe e respektoj, por me të cilën nuk duhet të martohem më.”

Aktori tha se martesa e tij me Garner përfundoi me mirëkuptim.

“Ne u ndamë miqësisht. Ne bëmë më të mirën. Kishim momente tensioni? A kishim mosmarrëveshje për kujdestarinë? A ishin gjërat e vështira për ne? A u zemëruam? Po, por në thelb gjithçka ishte gjithmonë e mbështetur në respekt,” tha ai, duke shtuar, “E dija që ajo ishte një nënë e mirë. Gjithmonë shpresoja se ajo e dinte që unë isha një baba i mirë. E dija që isha.”

Affleck zbuloi gjithashtu se kur i dha fund martesës, iu desh një vit e gjysmë që të linte përfundimisht alkoolin.

“Jam me fat sepse e arrita atë pikë përpara se të humbja gjërat që ishin më të rëndësishmet. Jo karriera ime apo paratë – po flas për marrëdhënien me fëmijët e mi dhe kur ndjeva që ndikoi tek ata, e kuptova. Ishte dita më e keqe e jetës sime. Por që nga ajo ditë, betohem në Krishtin, nuk kam dashur të pi kurrë më.”

Tani Ben ruan një marrëdhënie shumë të mirë me Garner dhe fëmijët e tij, ndërsa është rikthyer me Jennifer Lopez këtë vit, thuajse 20 vjet pasi i kishin dhënë fund lidhjes së tyre.