"Hugo Boss" në dy shekuj dhe lidhjet me nazizmin

"Hugo Boss" është një ndër kompanitë më të njohura të industrisë së modës në botë me fitime marramendëse dhe prestigj ndërkombëtar. Fillimet e saj i ka në qytetin e vogël të Metzingenit, qytet nga vjen dhe themeluesi i saj, Hugo Ferdinand Boss. Historia e kësaj shtëpie mode e ka zanafillën në vitin 1923, por fillimisht do të bëjmë një përshkrim të krijuesit të kësaj firme.

Hugo Ferdinand Boss, lindi më 8 korrik të vitit 1885, në Metzingen të Gjermanisë (në atë kohë perandoria gjermane). Kreu shërbimin ushtarak nga viti 1903 deri në 1905-ën. Prindërit e tij, Hajnrih Boss dhe Luiza Boss kishin në pronësi një dyqan të vogël rrobash, të cilin Hugo e trashëgoi në vitin 1908. Ai shërbeu në Luftën e Parë Botërore (1914-1918) si tetar i ushtrisë gjermane. Në vitin 1923, Hugo themeloi kompaninë e tij të rrobave, së bashku me 2 partnerë të tjerë dhe hapi fabrikën në vitin 1924 në Metzingen. Fillimisht, kompania prodhonte këmisha dhe xhaketa, e më pas rroba për punëtorët, rroba sportive dhe mushama. Në fillimet e saj, kjo kompani pati rreth 30 punonjës.

Vitet e para të saj ishin relativisht të frytshme, por kriza ekonomike e fund-viteve 20 që preku mbarë botën, e njohur si "Depresioni i Madh" (1929-1933), goditi rëndë këtë kompani që ishte në prag të falimentit. Një ndërthurje e bindjeve politike dhe pragmatizmit financiar, e bëri Hugon të përqafonte ardhjen në pushtet të partisë naziste. Në vitin 1931, ai u anëtarësua në partinë naziste, në 1936 në "Frontin e Punës", në "Mirëqenien e Popullit Nacional Socialist" në vitin 1941 dhe në organizata të tjera. Kurba e rritjes vazhdoi deri në vitin 1940, e më pas pësoi rënie. Pasi iu bashkua këtyre organizatave, shitjet e kompanisë u rritën nga 38 260 marka në mbi 3 300,000 marka në vitin 1941. Hugo Boss nuk ishte  kufizuar vetëm në prodhimin e uniformave ushtarake dhe veshjeve për punëtorët. Sidoqoftë, kërkesa për veshje ushtarake u rrit shumë në vitin 1938, pra në vigjilje të "Luftës së Dytë Botërore" (1939-1945).

Biznesi po haste vështirësi të gjente punonjës. Me ardhjen e "Luftës së Dytë Botërore", kërkesa për uniforma u rrit. Numri i punonjësve u rrallua tepër për shkak se kërkonin punë në industri të tjera, me pagesa më të larta. Kjo solli  shfrytëzimin e të burgosurve të luftës si krah pune në prill të 1940-ës. 40 prej tyre ishin francezë që punuan për rreth një vit. Pjesa dërrmuese ishin polakë (mbi 100) që i sillnin nga qyteti Bielsko i Polonisë, qytet i njohur për industrinë tekstile.

Pas luftës, vala e denazifikimit çoi në gjykimin e Hugo Boss-it, ku iu hoq e drejta e votës, e drejta për të drejtuar një biznes dhe e gjobitën me 100 000 marka. Hugo e apeloi këtë vendim dhe më pas u konsiderua si “ndjekës”, simpatizant i Partisë Naziste. Kompaninë ia kaloi dhëndrit, Eugjen Holit.

Hugo ndërroi jetë më 9 gusht të vitit 1948, në moshën 63 vjeçare, në Metzingen.

Kompania i rezistoi kësaj periudhe, në të cilën prodhonte ende veshje ushtarake dhe në vitin 1950, kompania nisi të prodhonte kostume për meshkuj. Në vitin 1969 Eugjeni i la kompaninë 2 bijve të tij, Jokenit dhe Uvit. Ata janë formësuesit e asaj ç’ka kompania Hugo Boss  përfaqëson sot. Ata e shtrinë ndikimin e saj në nivele të jashtëzakonshme.

Sponsorizimi i Niki Laudas (garues në Formula One) e më pas i skuadrës së Meklarenit ndikoi  në rritjen e shitjeve të kompanisë, pra duke qenë një formë eficente reklamimi. Në vitin 1984, Hugo Boss hapi linjën e saj të parfumeve, në 1989 linjën e syzeve, në 1997 linjën e difuzuar për femra dhe meshkuj dhe në 2006-2007, linjën e veshjeve për fëmijë. Disa nga fytyrat që kanë reprezentuar këtë kompani janë: Kris Hemsuorth, Zherard Batler dhe Zak Efron.

'Hugo Boss' ka rreth 6100 pika shitjeje në 124 vende.Në vitin 2009, BOSS Hugo Boss ishte segmenti më i madh i kompanisë, dhe përbënte  68% të të gjitha shitjeve. Pjesa tjetër plotësohet nga BOSS Orange me 17%, BOSS Selection me 3%, BOSS Green me 3% dhe HUGO me 9%. Kompania sot ka një gamë të gjerë të  veshjeve, aksesorëve, këpucëve dhe parfumeve.

Më poshtë, mund të shihni një tabelë të të ardhurave vjetore të kompanisë nga viti 2001 deri në vitin 2021. Në vitin që lamë pas kompania pati të ardhura vjetore 2.79 miliardë dollarë.

Të dhënat janë marrë pjesërisht nga "Study on the Company`s History"

Politiko.al