Kostume, fustane me të "çarë", taka dhe ngjyra të ndezura. Si u veshën deputetët në seancën e parë të Kuvendit

Sot ka nisur punën legjislatura e 10-të e Kuvendit të Shqipërisë ku përveçse ishte seanca e parë me qeverinë e re të Ramës, opozita po ashtu kthehej në kuvend pas dy vitesh. Dhe lajmi më i komentuar i orëve të fundit, përjashtimi i liderit historik, Sali Berishës nga grupi parlamentar i PD-së.

Po si u paraqitën deputetët dhe ministrat në këtë seancë të parë?

Erisa Xhixho ka tërhequr jo pak vëmendjen me fustanin e saj ngjyrë qumështi me një prerje elegante që nxirrte në pah belin e saj por dhe çarja anash e nxirrte goxha sensuale deputeten e LSI-së. Erisa iu drejtua sallës së kuvendit me kryetaren e kësaj partie, Monika Kryemadhin - e cila nuk dha asnjë prononcim për mediat. Kryemadhi kishte zgjedhur një fund me bel të lartë më pika ("polka dots"). dhe një këmishë klasike me lidhëse kollare. Kryemadhi po ashtu nuk hoqi as syzet duke shmangur dhe kontaktin me sy. Petrit Vasili dhe Agron Çela po shoqëronin po ashtu kolegët e tyre. Vasili,  xhaketën serioze e kishte kombinuar me një palë pantallona më 'casual" e nga ana tjetër, Çela ka zgjedhur një kostum.

Ministrja Mirela Kumbaro është shfaqur me stilin e saj të përhershëm, që e dallon prej kohësh nga deputetet e tjera. Nuk ka luajtur me ngjyrat por ka vendosur të jetë e sigurte me ngjyrën 'khak'i dhe të zezë. Kumbaro ishte e shoqëruar nga Niko Peleshi, i cili kishte zgjedhur kostum serioz dhe blu të errët.

Tre aleatët e Bashës, Fatmir Mediu, Agron Duka dhe Vangjel Dule janë drejtuar drejt kuvendit të veshur me kostume serioze, duke mos "luajtur" aspak me kombinimet.

Jorida Tabaku ka qëndruar po ashtu brenda stilit të saj, me ngjyrat pastel dhe gjysmë takat që i japin rehati në ecje.

Nga ana tjetër, Grida Duma ka marrë gjithë vëmendjen me kostumin e kuq, me gjatësi mbi kyçin e këmbës.

Ministrja e Arsimit Evis Kushi kishte zgjedhur një fustan të gjatë që i theksonte belin, me ngjyrën blu të errët. Ndërkohë nga ana tjetër, deputetja Blerina Gjylameti ende nuk ka hequr të zezat për shkak të humbjes së vëllait dhe të motrës dhe ka bërë vetëm një thyerje shumë të vogël në mëngët e xhaketës.

Ndërkohë, Rama, Basha dhe Berisha, kishin zgjedhur të paraqiteshin po ashtu me stilin e tyre që i identifikon gjithmonë. 

Lideri historik Sali Berisha, kishte zgjedhur të vendoste kollaren blu sot, një zgjedhje që nuk është e rrallë por sot me siguri simbolika kuptohet.

 

Fotot: Agim Rama