Ky ndryshim në mënyrën se si i përdorim mediat sociale mund të na e bëjë ditën më të mirë

Ndoshta nuk ekziston një zgjidhje magjike për të përmirësuar humorin dhe mirëqenien tonë të përditshme, por një ndryshim i thjeshtë në mënyrën se si përdorim rrjetet sociale mund të bëjë një diferencë reale. Ky ndryshim është i shpejtë, i lehtë dhe sipas shumë ekspertëve, sjell rezultate të ndjeshe.

Gazetarja e mirëqenies në The Guardian, Madeleine Aggeler, vendosi të provojë një strategji të thjeshtë, të heshtë (bëj mute) disa përdorues në rrjetet sociale.

Procesi ndryshon nga një platformë në tjetrën, funksioni mund të quhet mute, snooze ose restrict, por qëllimi është i njëjtë. Ai “pastron” gradualisht kronologjinë tonë nga postimet e njerëzve që, për çfarëdo arsye, na prishin humorin, pa qenë e nevojshme t’i heqim nga lista e miqve.

Aggeler tregon se ka zgjedhur të bëjë mute disa persona për arsye të ndryshme. Disa nuk dëshironte t’i hiqte nga lista e miqve, ndërsa të tjerëve u ka bërë edhe unfollow, edhe mute, për të shmangur që postimet e tyre të shfaqeshin përmes ripostimeve të të tjerëve.

Mes tyre ishte edhe një person i famshëm që dikur ishte sjellë keq me të për një çështje pune, një tjetër që kishte ofenduar një mik të saj, si edhe një ish-partner. Sipas saj, postimet e këtyre njerëzve nxirrnin në pah anën më të keqe të vetes.

Sa herë që i shihte në rrjete sociale, ndjente zemërim dhe frustrim. Madje, në momente nervozizmi, i shkonte ndër mend ideja absurde për të vendosur tabela nëpër qytet ku të tregonte sa të padurueshëm ishin.

Por pasi vendosi t’i “fshijë” pothuajse në të gjitha platformat, situata ndryshoi. Nëse dikush nuk i përmend në bisedë, ajo shpesh harron që këta persona ekzistojnë.

“I kam fshirë nga kopshti i harlisur i mendjes sime”, shprehet ajo.

Edhe Bailey Parnell, themeluese dhe presidente e Qendrës për Mirëqenie Digjitale, konfirmon se kjo strategji mund të jetë shumë e dobishme. Sipas saj, kur heqim llogaritë që na shqetësojnë vazhdimisht, vendosim kufij që krijojnë një mjedis digjital më të shëndetshëm.

“Në këtë mënyrë, njerëzit mbrojnë shëndetin e tyre mendor duke ruajtur njëkohësisht edhe rrjetet sociale apo profesionale”, shpjegon ajo.

Megjithatë, ekspertët theksojnë se kjo nuk është gjithmonë aq e thjeshtë sa duket. Në disa raste, postimet që na irritojnë mund të na tërheqin pikërisht sepse shkaktojnë emocione të forta.

Terapistja, Monica Amorosi, shpjegon se pas një emocioni intensiv mund të ndodhë edhe një shpërthim dopamine. Nëse jeta është monotone dhe mungojnë stimujt, konsumimi i përmbajtjeve që na irritojnë mund të shndërrohet në një formë argëtimi ose shpërqendrimi.

Megjithatë, Amorosi paralajmëron se nuk duhet të shkojmë në ekstrem duke përjashtuar çdo mendim apo informacion që nuk na pëlqen. Kjo mund të na mbyllë në një “flluskë injorance”.

Në vend të kësaj, ajo sugjeron që rrjetet sociale të përdoren kryesisht si burim informacioni pozitiv, edukimi dhe lidhjeje me njerëz që ndajnë interesa të përbashkëta.

Sipas kësaj logjike, është më mirë të hiqen ata persona që na irritojnë vazhdimisht pa na ofruar asgjë me vlerë, për shembull, një koleg që nuk bën gjë tjetër veçse mburret vazhdimisht për sukseset e tij.

Në këtë mënyrë, përveç qetësisë mendore, mund të fitojmë edhe pak kohë të vlefshme. Siç shprehet edhe vetë Aggeler, shpesh kur shmang postime të tilla kursen disa minuta që përndryshe do t’i kalonte duke bërë screenshot dhe duke u ankuar tek miqtë.