Pse Marilyn Monroe e fshehu ekzistencën e motrës së saj

Më 1 qershor 1926 lindi ndoshta aktorja më e famshme e të gjitha kohërave, Marilyn Monroe. Po pakkush e di se shtatë vite para se të sillte në jetë Marilyn, nëna e saj kishte lindur dy fëmijë të tjerë, të cilët i kishte nga bashkëshorti i saj i parë Jasper Newton Baker, përkatësisht Berniece dhe Robert Kermit. Pas divorcit ai i kishte rrëmbyer fëmijët dhe i mbajti derisa vdiq nga mosfunksionimi i veshkave.

Më pas ata u birësuan nga një grua, kurse Marilyn u rrit në një shtëpi kujdesi pas problemeve psikologjike me të cilat nëna e saj u përball.

Shumë vite më vonë, Gladys Baker, pasi u shërua nga problemet psikiatrike që e kishin torturuar prej kohësh, vendosi të rifillonte kontaktin me vajzën e saj të parë, nëntëmbëdhjetë vjeçe në atë kohë, duke i shkruar asaj një letër. Në atë letër Baker e informoi Berniece-n se kishte një motër 12-vjeçare, të quajtur Norma (emri i vërtetë i Marilyn Monroe), e cila jetonte në Los Anxhelos.

Më pas Berniece Baker vendosi t'i shkruante menjëherë një letër motrës së saj që nuk e kishte takuar kurrë, duke shtuar një foto brenda zarfit dhe adoleshentja Norma Jean ia ktheu, duke filluar kështu një shkëmbim letrash përmes të cilave u njohën më mirë. Marrëdhënia e tyre, pavarësisht distancës, u bë aq e fortë sa Berniece Baker vendosi të ndihmonte motrën e saj më të vogël, e cila në atë kohë jetonte ende në shtëpinë e një shoku të nënës së saj, por fatkeqësisht nuk pati sukses. Sidoqoftë, lidhja e tyre ishte aq e fortë sa kur Norma Jean u fejua me James Dougherty në moshën 16-vjeçare, një nga njerëzit e parë që ajo i besoi ishte motra e saj më e madhe.

Megjithatë, kaluan edhe dy vite të tjera para se të dyja të arrinin të takoheshin: ndodhi në Detroit, ku Berniece ishte zhvendosur me burrin e saj Paris Miracle. Norma Jean, 18 vjeç, iu bashkua asaj dhe motra e saj e madhe e përshkroi takimin e parë në këtë mënyrë.

“Ishte e pamundur mos të njiheshim! Të gjithë pasagjerët që zbrisnin nga treni dukeshin kaq të zakonshëm, pastaj, papritmas, zbriti kjo vajzë e gjatë dhe e bukur. Nuk mund të ndalonim së vështruari njëra-tjetrën. Kishim të njëjtat flokë bjonde, të njëjtën gojë, vetëm sytë ishin të ndryshëm”.

Motrat gjithashtu gjetën menjëherë mirëkuptimin e krijuar në shkëmbimin e letrave personalisht dhe gjatë asaj dite folën gjatë për nënën e tyre, duke e quajtur atë 'një të huaj të vërtetë'.

Nëse jeta publike e Marilyn është histori, aq më pak është jeta e saj familjare. Motra e saj Berniece ishte gjithmonë me të, duke shkuar shpesh për ta vizituar.

Marilyn e mori nënën dhe motrën e saj në një turne nëpër Los Anxhelos, duke u përpjekur të rindërtonte atë marrëdhënie familjare që ato kurrë nuk e kishin pasur në të vërtetë. Ëndrra e aktores për të pasur gjithmonë Berniece-n pranë saj ishte aq e fortë sa u përpoq t'i gjente një punë në Fox, por fatkeqësisht, përveçse nuk e gjeti vendin e punës për të, Marilyn u pushua edhe vetë nga puna.

Megjithatë, mundësitë nuk vonuan: në vitin 1948, një kontratë me Columbia Pictures mbërriti për yllin, por ndërkohë presioni dhe ndërhyrja e mediave mbi jetën e saj dhe të familjes ishin bërë gjithnjë e më mbytëse. Aq sa, për të mbrojtur Berniece-n, Marilyn Monroe mori një vendim shumë të rëndësishëm. Ajo filloi t'i tregonte shtypit se ishte jetime dhe se nuk kishte askënd nga familja gjallë.

Përmes punonjësve të saj të marrëdhënieve me publikun ajo përhapi histori të rreme për të kaluarën e saj.

Jashtë jetës publike të Marilyn-it, aktorja dhe motra e saj gjithmonë e kanë mbështetur njëra-tjetrën, aq sa në vitin 1961, kur Monroe mësoi se duhej t'i nënshtrohej një operacioni, Berniece Baker iu bashkua menjëherë në Nju-Jork.

“Që atëherë nuk kam qenë kurrë e njëjta. Zgjodha arkivolin e saj dhe fustanin e gjelbër”, ka thënë Berniece për vdekjen e motrës.

Ishte gjithashtu për atë që Berniece Baker vendosi të shkruante e vetme një kujtim për motrën e saj, Motra ime Marilyn: A Memoir of Marilyn Monroe, botuar në 1994-ën.

Motra e madhe e Marilyn-it, e cila u mbajt e fshehur për shumicën e viteve të suksesshme të aktores, ndërroi jetë në vitin 2014, në moshën 94-vjeçare./TiranaPost