"Serbia asnjëherë nuk kërkoi falje", Tifozët Kuq e Zi kërkojnë tërheqjen e Goran Bregoviç, Ballist Morina: Sikur të gjithë serbët do ishin si ai

Ardhja e artistit serb Goran Bregoviç për "Festën e Birrës" në Korçë ka shkaktuar reagime të shumta dhe të ashpra, për shkak se konsiderohet që Bregovic ka frymëzuar masakrat e serbëve kundër Kosovës. Bregovic ishte frymëzues e idhull i ushtrisë vrastare serbe gjatë luftës në Kosovë sidomos me këngën “Kalashnikov”.

Artistë të shumtë dhe figura të njohura të ekranit në Kosovë dhe Shqipëri kanë reaguar duke kërkuar tërheqjen e tij ose bojkotin e "Festës së Birrës". Artisti i njohur Capital T do bënte hapjen në këtë festë që mbledh qindra shqiptarë, por këngëtari në një reagim publik tha se është tërhequr.

Ndërkohë në këto reagime publike janë përfshirë dhe sportdashësit. Tifozat Kuq e Zi kanë bërë një reagim në Facebook ku i kërkojnë Bashkisë së Korçës të tërhiqet nga agjenda e planifikuar për festivalin e birrës.

“Ne deri sot kemi marrë shumë kërkesa nga anëtarët tona nga gjitha trevat që të ndalojmë me trupat tanë paraqitjen e këngëtarit serb që motivonte paramilitarët serb me këngët e tij për të bërë masakra mbi popullatën civile në shumë qytete të Kosovës. Afro 2000 varreza janë të hapura pa varre në Kosovë sepse kriminelet i zhduken edhe trupat. Mbi 12.000 viktima lufte. Serbia asnjëherë nuk kërkoi falje. Pyesim Bashkinë e Korçës a ka mundur ndonjë artist shqiptar të performoj në ndonjë festival në Serbi? Përgjigja e vetme është JO. Për më tepër radiot në Serbi ndalojnë transmetimin e këngëve të Dua Lipës e Rita Ores vetëm se ato janë shqiptare. Prandaj para këtij racizmi shtetëror që iu bëhet shqiptarëve nuk do ti mbyllim sytë. Në mënyrë që festivali të mbahet dhe të mos përfundoj ashtu si nuk duhet, ne edhe njëherë po e përserisim: TËRHIQENI Bregoviçin nga festivali i Korçës. Kjo është thirrja e fundit!”- shkruhet në postim.

Ndërkohë, Ballist Morina ka habitur me deklaratën e tij, i cili është personi që ka ngritur flamurin "Autochthonous" në Serbi në ndeshjen e shumëpërfolur Serbi-Shqipëri.

Ballist Morina thotë se Goran nuk ka nxitur kurrë urrejtje kundër shqipatrëve me këngët e tij, madje thotë se në vitin 1983 ai ka realizuar një këngë në gjuhën shqipe, Rroka Mandolinën (Kosovska).

Ballisti shton se e gjithë kjo zhurmë po bëhet për të hequr vëmendjen nga vendimet antikombëtare të kryeministrit shqiptar. 

Postimi i plotë i Ismail Morinës

Lidhur me pjesëmarrjen e këngëtarit Goran Bregoviç në festën e birrës së Korçës dhe strumentalizimit të panevojshëm të ktij rasti.

Nuk më rezulton askund qe ky njeri tu ketë kënduar të ashtuquajturve “Tigra t’arkanit” ,”çetnikëve” (ashtu si pretendohet) apo me këngët e tij dhe me ndikimin e tij të ketë nxitur urrejtje nga ana serbve kundrejt shqiptarve,përkundrazi në vitin 1983 si rrok-band “Bjele Dugme” ka realizuar nji këngë në gjuhë shqipe Rroka Mandolinën (Kosovska) dhe që ka pasur sukses të jashtëzakonshëm.

Unë përsonalisht do i isha ZOTIT falënderues nësë të gjithë serbët do ishin si Goran Bregoviç dhe do kisha qenë shumë i disponuar për nji miqësi shqiptaro – serbe.

Përshtypja ime qëndron se ktu po çohet pluhur për nji diçka qe nuk përfaqson rrezik, por për t’mbuluar nji diçka qe përfaqson shumë rrezik, vendimet antikombtare te kryeministrit të vëndit dhe përçarja kombtare qe po shkakton me kto vendime, pra shkputje vëmendje nga ngjarje me peshë.

Shprehë kundershti kur shoh disa personalitete të estradës dhe grupime tifozësh jo vetëm që jane të ndikuar nga lajme të rreme por edhe kërcënojnë me dhunë për pjesëmarrjen e këtij këngëtari ndërsa kur bëhët fjalë për gjëra reale nuk e shprehin asnji reagim.

Mirë se vjen zotri Goran Bregoviç!