Shkencëtarët krijojnë një "superushqim" që mund të shpëtojë bletët nga ndryshimet klimatike

Shkencëtarët kanë zhvilluar një "superushqim" për bletët e mjaltit që mund t'i mbrojë kafshët nga kërcënimet e ndryshimeve klimatike dhe humbjes së habitatit.

Kolonitë e bletëve që hëngrën suplementin gjatë provave kishin deri në 15 herë më shumë bletë të vogla që u rritën deri në moshë madhore.

Bletët janë një pjesë jetësore e prodhimit të ushqimit dhe kontribuojnë në pjalmimin e 70% të kulturave kryesore globale.

"Ky përparim teknologjik siguron të gjitha lëndët ushqyese që bletët kanë nevojë për të mbijetuar, që do të thotë se ne mund të vazhdojmë t'i ushqejmë ato edhe kur nuk ka polen të mjaftueshëm", tha autorja kryesore Profesor Geraldine Wright në Universitetin e Oksfordit për BBC News.

"Është me të vërtetë një arritje e madhe", thotë ajo.
Bletët në nivel global po përballen me rënie të mëdha, për shkak të mungesave të lëndëve ushqyese, sëmundjeve virale, ndryshimeve klimatike dhe faktorëve të tjerë. Në SHBA, humbjet vjetore të kolonive kanë variuar midis 40-50% në dekadën e fundit dhe pritet të rriten.

Bletarët në Mbretërinë e Bashkuar janë përballur gjithashtu me sfida serioze.

Nick Mensikov, kryetar i Shoqatës së Bletarëve të Cardiff, Vale dhe Valleys, i tha BBC News se humbi 75% të kolonive të tij dimrin e kaluar dhe se kjo është parë në të gjithë Uellsin Jugor.

"Edhe pse të gjitha kosheret kanë qenë plot me ushqim, bletët thjesht janë pakësuar. Shumica e bletëve mbijetuan deri në janar, shkurt dhe pastaj thjesht u zhdukën", thotë ai.
Bletët ushqehen me polen dhe nektar nga lulet që përmbajnë lëndë ushqyese, duke përfshirë lipidet e quajtura sterole që janë të nevojshme për zhvillimin e tyre.

Ato prodhojnë mjaltë në koshere, i cili bëhet burimi i tyre i ushqimit gjatë dimrit kur lulet kanë ndaluar së prodhuari polen.

Kur bletarët nxjerrin mjaltë për ta shitur, ose, gjithnjë e më shumë, kur nuk ka polen të mjaftueshëm në dispozicion, ata u japin insekteve ushqim shtesë.

Por ky ushqim përbëhet nga miell proteinash, sheqer dhe ujë, dhe gjithmonë i ka munguar lëndët ushqyese që bletët kanë nevojë. Është si njerëzit të hanë një dietë pa karbohidrate, aminoacide ose lëndë të tjera ushqyese jetësore.

Steroli ka qenë gjithmonë shumë i vështirë për t’u prodhuar, por Prof Wright ka udhëhequr një grup shkencëtarësh për 15 vjet për të identifikuar se cilat sterole të sakta u nevojiten bletëve dhe si t’i ndërtojnë ato.