Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Profil/ Një ‘Van Gogh’ shqiptar në Akademinë Mbretërore të Belgjikës

Politiko 22 Tetor 2019, 16:03

Artdashësit në qytetin e Antwerp-it në Belgjikë, sidomos të pasionuarit me pikturën, kthejnë kokën kur kalon ai. Ndonjë prej tyre e ndalon, ndan me të një bisedë të shkurtër, ndonjë foto dhe nganjëherë edhe një përqafim. Këtë 'popullaritet' te të panjohurit ia jep ngjashmëria me piktorin e famshëm holandez, Vinsent van Gogh. Ata habiten edhe më shumë kur marrin vesh se edhe ai është piktor. Në autoportrete ngjashmëria me piktorin holandez është edhe më e madhe dhe mund të ngatërrohesh lehtësisht, e të mendosh se mund të jetë ndonjë portret i vetë Van Gogh-ut.

Ai quhet Besmir Latifi, i lindur (siç i pëlqen atij ta thotë) në Malsitë e Pukës. Shkollën fillore e ka kryer në Xathë të Pukës, ndërsa atë të mesme në Liceun Artistik të Durrësit për Pikturë. U diplomua në Akademinë e Arteve në Tiranë për Modë dhe po në këtë zej vazhdon studimet pranë Akademisë Mbretërore në Antwerp.

Në një intervistë për Politiko.al, ai rrëfen jetën në Belgjikë si dizenjator në Departamentin e modës së Akademisë Mbretërore të Belgjikës, që është edhe një nga dy universitetet më të mira në botë për Modën. Latifi na shpjegon se prej aty nga kanë dalë disa nga ikonat e modës në botë.

Marsel LELA

Politiko.al: Keni një ngjashmëri jo të vogël në pamje me piktorin hollandez, Vinsent Van Gogh. Ngjashmëria e dytë me të është se edhe ju jeni piktor. Rastësi e çuditshme, apo jo?

Zakonisht, kur përdor ndonjë kapele mund të kem ngjashmëri. Më kujtohet përpara shumë vitesh kur isha në Luksemburg, po ecja dhe një grua e moshuar më ndaloi dhe më tha se i ngjaja me dikë që e donte shumë. E kuptova se i ngjaja me Vinsent Van Gogh. Më tha nëse e njihja, por e lashë të fliste dhe ajo nisi të më tregonte se Van Gogh ishte piktor. Në fund më pyeti se me çfarë merresha dhe kur i thashë që edhe unë jam piktor, u gëzua aq shumë sa më tha, “më lër të të përqafoj, më duket sikur takova atë në njëfarë mënyre”.

Politiko.al: A ndani të njëjtin karakter dhe stil me Van Goghun?

Besoj se jo. Dhe veshët i kam që të dy, e do vazhdoj t’i kem.

Politiko.al: Përse keni zgjedhur Belgjikën për të ushtruar aktivitetin tuaj artistik?

Një artist i famshëm dikur ka thënë se ‘atdheu im është aty ku kuptohet vepra ime’. Unë studioj pranë Akademisë Mbretërore të Belgjikës në Antwerp për Modë. Jam shqiptari i parë pjesë e këtij Departamenti, i cili rreshtohet në dy universitetet më të mira të Modës në botë. Nga dyert e këtij departamenti kanë dalë disa prej ikonave më të mëdha të botës së modës, si Martin Margiela, Dris van Noten Valter van Beirendonk etj. Kjo më krenon të them të drejtën.

Politiko.al: Si profesion keni zgjedhur atë të dizenjatorit të modës, përse kjo ndarje nga pasioni juaj i parë, piktura? Keni hequr dorë plotësisht, i riktheheni për qejf, si është marrëdhënie juaj sot me të?

Jo nuk kam hequr dorë nga piktura. Pikturoj çdo ditë dhe jam aktiv në ekspozitat e shumta europiane. Përsa i përket dizajnit, më pëlqen të jem i veshur mirë dhe kam gjetur një balancë organike mes pikturës dhe modës. Unë mendoj se për sa kohë një artist të jetë krijues dhe t’i përkushtohet me çdo çmim krijimit të tij, termi s’është shumë i rëndësishëm për të, pikturë, modë apo hapje kanali.

Politiko.al: Si është jeta për një artist në Shqipëri?

Jam plotësisht i bindur se është më pesimiste se rruga e Golgotës.

Politiko.al: Kur keni nisur të pikturoni për herë të parë?

Nuk e mbaj mend se kur saktësisht, por diku aty në një moshë shumë të vogël, mes malesh, në një kullë prej guri dhe pak dru në oxhak.

Politiko.al: Cilat janë ambiciet tuaja? Keni krijuar një stil tuajin në dizenjimin e veshjeve që mund të jetë edhe marka juaj në të ardhmen?

Po përpiqem të bëj ta pamundurën që ta shpreh veten me sinqeritetin më të lartë në artin tim. Shprehja e vetes sonë vjen ashtu siç jemi ne, kjo kërkon sinqeritet mendoj, punë dhe dashuri të madhe. Besoj se këto e formojnë stilin individual të gjthësecilit.

Përsa i përket markës, besoj se po, do jetë në të ardhmen.

Politiko.al: A do të kemi edhe ne një 'Versaçe shqiptar' që do të veshë botën e së nesërmes?

Bota e modës duket e bukur kur shihet nga televizioni produkti final në pasarelë, por përpara se krijimi i një dizajneri të vijë aty është një punë aq e madhe dhe aq e komplikuar sa duhen gjenerata që emri të marrë identitetin e tij në botën e modës. Në këtë rast flasim për artistë që marrin mbi shpatulla të gjitha mundimet e çdo detaji, duke filluar nga fijet e holla dhe të parëndësishme të perit, e deri te hollet më të mëdha të estetikës njerëzore. Do bëj më të mirën të vesh këdo që kërkon ndihmën time.

Politiko.al: Shqiptarët, kryesisht të rinjtë, largohen çdo ditë nga Shqipëria për të gjetur një jetë më të mirë atje ku, siç e the edhe vetë, dinë ta vlerësojnë talentin. Çfarë mendoni se duhet të ndryshojë në vendin tonë?

Helmi që kanë në trup shqiptarët nga politika dhe nga ai kaos që ka më shumë se 100 vjet, të bën që, jo ta lësh atë vend, po t’i vësh flakën çdo gjëje rreth teje. Megjithatë, shoh një mall të përhershëm në shpirtin e shqiptarëve që jetojnë jashtë për vendin e tyre. Është një mall shumë i sinqertë dhe një gjë të tillë se kam parë te asnjë kombësi tjetër. Kjo më jep shpresë. Na duhet të edukohemi mirë dhe ta duam njëri-tjetrin pa hile, kjo do ta bëjë Shqipërinë një vend më të mirë.

Politiko.al: Cili është mesazhi juaj për artistët shqiptarë?

Detyra e një artisti është të tregojë të vërtetën e kohës që jeton në të gjitha format. Kjo detyrë kërkon njerëz të guximshëm pa u tkurrur nga komoditeti i jetës, apo vuajtjet e saj.

Çdo artist ka nevojë të shohë dhe të lëvizë në vende të ndryshme. Ndoshta disa herë çmimi i kësaj do të jetë fjetja poshtë urave, apo të hash një herë në ditë, ose fare. Kjo është madheshtia e saj.