Flash News

Posta e mëngjesit/ Me 2 rreshta: Çfarë pati rëndësi dje në Shqipëri

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

QENDRA POLITIKO

Gazetari studion politikanin/ Ligjërimi i Berishës ‘së parë’ vjen për publikun nga POLITIKO

Politiko 2 Shkurt 2021, 11:27

Gazetari studion politikanin/ Ligjërimi i Berishës ‘së

Gazetari Alfred Lela ka promovuar dje (12 janar 2018) librin “Ut heri dicebamus”, Fjalori politik i Berishës, ’90-92, me parathënie të shkrimtarit Besnik Mustafajt. Lela nën siglën e botimeve POLTIKO kurorëzon në një botim punimin e tij doktoral pranë Universitetit Europian të Tiranës

Si mund të lexohet në një distancë kohe lideri historik shqiptar, Sali Berisha, dhe pas tij një histori politike e Shqipërisë së pas ’90-ës?! Referuar një raporti mbi teoritë e komunikimit politik libri i gazetarit dhe publicistit Alfred Lela është vlerësuar dje gjatë promovimit si një nga librat më të mirë të shkruar për politikën shqiptare bashkëkohore.

“Në raport me Sali Berishën është i pari libër profesional, si metodologji dhe cilësi shkrimi. Në të mungon zelli i servilizmit dhe shërbestarisë së llogaritur; po ashtu gjuha e tharë e patetikës ideologjike e fermentuar nga urrejtja.

E sheh atë në distancë, pa interes, por me respekt, pa anësinë e së mirës apo të keqes, por me racionalitetin e konstatimit! Alfred Lela ka krijuar modelin se si mund të lexohet një burrë shteti shqiptar i bashkohësisë. Këtë shërbim është nisur t’ja bëjë shoqërisë, anipse i shërbyer del edhe Sali Berisha. Dhe, në fakt, pas leximit, personazhi objekt studimi për ligjërimin e tij të viteve ’90 -’92, mirëkuptohet më tepër, paditet më shumë, fshihet më pak. Një kapërcyell historik nga më të rëndësishmit e kombit tonë, shefi i opozitës në ditët e para të saj shfaqet më shumë si prijës sesa politikan dhe, sa më tepër i përshtatet politikës dhe ligjësive të saj gjithaq humbet gravitetin e Prijësit për petkun e politikanit.

Por, Sali Berisha ka synuar pushtetin, jo vetëm lëvizjen përmbysëse, dhe për atë ka ndërtuar ligjërimin që ia mundëson atë, një ligjërim që ndan duke tentuar shumicën elektorale me strukturimin e diskurseve. Lela na e rrëfen këtë metamorfozë ditë pas dite.

Me një metodologji e cila mbledh disa nga figurat kryesore të komunikimit politik, por edhe të studiuesve të ideologjisë, të shekullit 20, ai vërteton e ndërton saktësisht, atë që Besnik Mustafaj ka parë nga afër, pothuaj prekur me dorë, e shprehur në parathënie, që “Sali Berisha ndihej shpirtërisht dhe me arsye i djathtë, jo deomos si rrjedhim i formimit kulturor dhe ideologjik gradual, por si rrjedhim i qëllimit që i kishte vënë vetes dhe misionit të madh që kishte marrë përsipër, në përgjigje të nevojës urgjente që kishte shoqëria shqiptare dhe kombi për çmontimin e sistemit stalinist, sistem ky që përfaqësohej nga e majta, e strehuar ende te Partia e Punës më pas Partia Socialiste”, tha gjatë fjalës studiuesi Agron Gjekmarkaj.

Më tej Gjekmarkaj shton “Alfred Lela tenton ta tërheqë drejt historisë vetëm me dy vitet e tij të para, paçka se, me nderim studiuesi dhe pa emfazë militanti a hallexhiu që kërkon diçka në këmbim. Por, Sali Berisha përpiqet ende të mos joshet nga streha e re, edhe pse tundimet i shfaq herë pas here në forma të ndryshme. Lela i ka hapur derën dy kanatësh duke e vënë në krye të odës së burrave të djathtë të këtij vendi. Mënyrën dhe kohën e zgjedh vetë; me vrik a dalngadalë, me sokëllimë a në majë të gishtave në muzg…”

Autori i librit, Lela, u shpreh se ai mundohet të sjellë një fotografi të një periudhe historike të gjenezës së asaj që mund të quhet pluripartizmi, demokracia apo tranzicioni në Shqipëri, dhe si e ndikon atë një protagonist kryesor si Sali Berisha. “Arsyeja se pse zgjodha këtë periudhë ka të bëjë me ngushtimin e fokusit të studimit. Umberto Eco sugjeron: Mos bëni studime mbi natyrën e gjithësisë, ngushtojeni rrezen e asaj që analizoni”.

Në parathënien e librit Besnik Mustafaj, duke ftuar lexuesit drejt librit të Lelës, shprehet se ai “ka rigorozitetin e shkencëtarit në kërkimin e fakteve, që do të analizohen, ka metodologjinë e qartë për parashtrimin e lëndës, ka rrjedhimisht edhe neutralitetin e dobishëm në nxjerrjen e përfundimeve”. Më tej Mustafaj si njohës i politikës ndalet në faktin se duke qenë “një dëshmitar i brendshëm në historinë e zhvilluar tashmë, njohës i afërt i Sali Berishës kohë para se të fillonte përmbysja, me të qysh në ditën e parë të historisë e në vazhdim dhe për më tepër shkrimtar, pra, njeri i prirur natyrshëm për të mbajtur shënime në fund të ditës”.