Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Qëndrimi i Lu pro Ramës? Ai po e ndihmon opozitën dhe popullin duke i shtyrë drejt rrëzimit të qeverisë

Politiko 18 Dhjetor 2017, 18:12

Qëndrimi i Lu pro Ramës? Ai po e ndihmon opozitën dhe popullin

3 pyetje nga Politiko.al për Fitim Zekthin

1-Protesta e sotme e opozitës, a shënoi diçka, si në pikëpamje politike, ashtu edhe në atë të komunikimit?

Nga pikëpamja politike protesta shenjon një pikë koaguluese të opozitës dhe një moment që dëshmon se veprimi i saj politik mund të shtrihet përtej debatit parlamentar rutinor, përtej deklaratave denoncuese. Opozita po hyn në një faze të re në të cilën sytë e saj kthehen më së shumti nga qytetarët, nga mbështetësit. dhe duke qenë kështu tërë diskuri dhe veprimi saj mund të ndërtohet nga ky raport. Tashmë opozita, Partia Demokratike si forca më e madhe dhe drejtuese e opozitës, ka fituar një përmasë të re, atë të demonstrimit të fuqisë për t'u përballur me mjete të tjera me një shumicë qeverisëse e cila ka shkatërruar rrugët institucionale për të diskutuar apo debatuar mbi çështje të mëdha.

Nuk mund të mbesë më asnjë mbështetës i së djathtës apo opozitës, që të mos gjejë arsye ta përkrahë këtë përmasë të re veprimit të opozitës. Sa i takon aspektit të komunikimit i cili është i lidhur fuqishëm me mënyrën e veprimit, njerëzit do të nisin ta marrin më shumë në konsideratë atë që po bën opozita, do të shohin se ajo që po bën opozita është një rrugë e vështirë, por e duhura, dhe shumëkush mund ta shohë veten më të përfaqësuar në veprimin e ri të opozitës. E gjitha do të varet nga si do të vijojë.

2-A po ngjizet një front opozitar?

Në kuptimin e një grupimi të partive të opozitës, po. Pra me qëndrimin, diskurin dhe veprimin politik të PD-së është bashkuar edhe LSI. Partitë e tjera si partia z. Ndoka, z. Shehi, z. Dule janë që më herët në këtë grupim. Mendoj se pavarësisht ndarjes së madhe që kishte PD me LSI për katër vite, pavarësisht faktit që LSI kishte në katër vite qeverisje përgjegjësi të plotë dhe të madhe, thuajse sa Rama në qeverisjen mizerabël të koalicionit të tyre, bashkëveprimi me të është i detyrueshëm politikisht. Një politikan i drejtë që i dhimbset populli i tij, duhet të përpiqet të bëjë përditë më të mirën që mundet për t'i hequr lakun nga fyti popullit të tij.

Në këtë kuptim Partia Demokratike, z. Basha, nuk mund të mos e shohin LSI si një forcë që është sot në anën e atyre që duan t'i hiqet këtij populli laku i qeverisë Rama. Do të ishte e turpshme për PD-në që të vazhdojë të lërë peng të diskutimeve të dikurshme lakun e ndyrë dhe mbytës të qeverisë së sotme mbi njerëzit që janë pa punë, që përmbyten, që jetojnë në mjerim, që janë subjekt i një qeverie që mbjell vendin me hashash, mbush zyrat e policisë, të parlamentit, qeverisë etj. me njerëz në shërbim të trafikut dhe hashashit, dhe gjetjes së mënyrës për të shpëtuar nga hetimi.

3-Çfarë lexoni te vendimi i shumicës për të zgjedhur Prokurorin e ri të përkohshëm njëanshëm. Si e gjykoni qëndrimin e ndërkombëtarëve?

Vetëm si veprim që synon të mbrojë Kushtetutën, që synon të garantojë pavarësinë e Prokurorisë nuk e shikoj. Ka një problem të madh me mënyrën se si flitet në Shqipëri. Fakti që Llalla për 5 vite e la Prokurorinë siç ishte, një organ ku gjejnë tmerr hallexhinjtë, ku mbesin burgjeve apo hetimeve të dobëtit, dhe ku asnjë njeri me pushtet të fortë politik nuk preket, nuk do të thotë se duhet ta zëvendësojmë me dikë që e vendos Kryeministri. Qeveria, kryeministri Rama, të gjendur përballë skandalesh të pazakonta për ne, ku ish ministri i Brendshëm, i trumbetuar si më i miri i kohërave, më i suksesshmi, më i afti, më i drejti, akuzohet se ka kryer trafik droge, ka ndihmuar grupet kriminale të trafikut, ka lejuar mbjelljen me hashash të vendit, të gjendur përballë akuzave për bashkëpunim me krimin të kryebashkiakëve të vet më të mëdhenj dhe të fortë, etj., e kanë jetike të marrin nën kontroll Prokurorinë.

Kushtetuta e vendit nuk flet fare për Prokuror të përkohshëm. Kushtetuta flet për Prokuror të përgjithshëm që zgjidhet nga Kuvendi me 60% të votave nga lista me tre emra që propozon KLP pasi emrat kanë kaluar vetingun. Dispozita kalimtare të ligjit, jo Kushtetuta, flasin për një Prokuror të përkohshëm që zgjidhet me shumicë të thjeshtë vetëm nga deputetët e PS-së. Problemi është se Prokurori i përkohshëm do të ketë kompetencat e atij me mandat të plotë në një kohë që zgjidhet sikur të jetë një drejtor agjensie i zakonshëm i qeverisë. Parimi themelor i ndarjes së pushteteve është zhdukur. Qeveria emëron hetuesin e saj. Rama emëron hetuesin e Tahirit dhe të gjithë kryebashkiakëve apo zyrtarëve të dyshuar për lidhje me krimin.

Sa i takon ndërkombëtarëve, pra qëndrimit të Ambasadorit Lu, që ka thënë se parlamenti duhet të zgjedhë një Prokuror të përkohshëm, unë mendoj se ose Lu ka një problem personal, ka një lidhje personale me qeverinë, ose ai po e shtyn opozitën dhe njerëzit drejt rrëzimit të qeverisë me protesta. Është e pamundur të mendosh se vendi, i cili u themelua mbi parimet më të thella të ndarjes së pushteteve të lejojë që Kryeministri të emërojë një njeri të tijin për të hetuar qeverinë.

Në SHBA sot ka një hetim mbi rolin e Rusisë në zgjedhje dhe mbi rolin e njerëzve nga stafi i Presidentit Trump. Do të ishte çmenduri që Prokurori që po heton të emërohej nga Presidenti Trump. Ndonëse SHBA ka një system tjetër prokurorie, ndarja e pushteteve është e thellë. Tërë thelbi i demokracisë në SHBA por edhe Europë e kudo, ka të bëjë me ndarjen e pushteteve. Ndaj Lu, ose ka një problem dhe po sillet si jo amerikan, ose ai duke e parë që qeveria është zhytur keqas në llum po i referohet Deklaratës së Pavarësisë së SHBA që thotë se “.. kur qeveria bëhet shkatërruese e këtyre qëllimeve (liria, e drejta, ndarja e pushteteve etj.), atëherë njerëzit kanë të drejtë ta ndërrojnë ose zhbëjnë atë” dhe po i shtyn njerëzit dhe opozitën ta rrëzojnë qeverinë.