Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Qeverinë nuk e rrezikojnë të mjerët, por ‘të deklasuarit’

Politiko 1 Qershor 2018, 20:26

Qeverinë nuk e rrezikojnë të mjerët, por ‘të

Red Varaku

Edhe pse varfëria në vendin tonë ka arritur në nivelet e skamjes dhe mjerimit, rreziku kësaj qeverie kurrë nuk do t’i vijë nga të varfërit apo shtresat margjinale të shoqërisë. Le ta mbledhin mendjen, ata që nuk lënë rast pa përmendur mjerimin dhe faktin që populli nuk ka bukë “të hajë”.

Prova për këtë është paaftësia që shoqëria jonë tregoi për të reaguar kundër regjimit komunist, ku edhe pse varfëria kishte arritur një fazë ekstreme , të gjithë ishin si të tulatur dhe të mpirë, saqë edhe pse regjimi kishte rënë, ata e votuan atë masivisht në zgjedhjet e para pluraliste. Sepse paaftësia legjendare e këtyre shtresave për t’u mobilizuar dhe për t’iu kundërvënë qeverisë së korruptuar është një realitet, që po e dëshmojmë edhe sot çdo ditë. Ekranet e televizioneve i kemi të mbushura me raste të tilla, por në vend që kjo të shkaktojë irritim dhe revoltë, ato duket sikur injektojnë mjerim dhe pesimizëm dhe në të vërtetë sikur mpin dhe paralizon akoma më shumë “nervin” reagues të shoqërisë.

Të varfërit nuk e kanë forcën dhe fuqinë të revoltohen e aq më pak të rebelohen, sepse represioni i sistemit i detyron, që të jenë vazhdimisht të preokupuar me “bukën e gojës”. Kur njeriu është i preokupuar me “bukën e gojës”, ai as që do t’ia dijë për arsyet politike apo “kontratat e fshehta”, që sjellin këtë mjerim. Këtë “ të majtët “ e dinë më mirë se kushdo. Por, nëse do të ishin të vetëdijshëm për fuqinë e tyre, atëherë edhe atë pak të drejtë, që ua sanksionon Kushtetuta, votën e lirë, ata nuk do të detyroheshin ta shisnin për “bukën e gojës”. Kjo ndodh ngaqë ata nuk e kuptojnë rëndësinë që ka ajo për të ardhmen e tyre dhe të fëmijëve të tyre, sepse po ta kuptonin të paktën nuk do ta shisnin aq lirë.

Por, cilët janë ata që vërtetë e rrezikojnë status quo-në e të korruptuarve që na qeverisin? Rreziku dhe kërcënimi më i madh për të korruptuarit që na qeverisin vjen pikërisht nga ata, që ata i quajnë nëpër manualet e tyre “të deklasuarit”. Cilët janë “të deklasuarit” e kësaj epoke? Ata janë njerëz të ndershëm, të shkolluar, intelektualë me integritet, përfaqësues tipikë të shtresës së mesme, të cilët sistemi i kalcifikuar, i pengon me pa të drejtë të marrin atë që u takon sipas të drejtës dhe meritës, pra të ngjisin shkallët e karrierës dhe shoqërisë, i pengon të realizojnë aspiratat e tyre profesionale dhe njerëzore, madje edhe familjare.

Ata janë artistë me dinjitet, por të nëpërkëmbur, të flakur në rrugë, ndaj të cilëve shfaqet hapur neveria dhe përbuzja deri aty sa edhe u mohohet një e drejtë qytetare dhe njerëzore, pjesëmarrja në vendimmarrjen për prishjen ose jo të një pasurie shpirtërore kombëtare për të cilën ata kanë investuar gjakun e tyre. Ata janë profesorë, mësues të fyer dhe të përbuzur pikërisht nga ata që për ironi, deri dje i konsideronin si “llumin e shoqërisë”, dhe fyerje më të madhe se kjo nuk ka për ta. Ata janë avokatë të diplomuar shkëlqyeshëm, që kanë refuzuar të bëhen pjesë e sistemit të kalbur të drejtësisë ose janë përjashtuar nga e drejta për të qenë pjesë e tij, pikërisht për shkak të integritetit të tyre, për shkak të korrupsionit që ka kapur sistemin e drejtësisë. Ata janë doktorë, infermierë që janë të detyruar të braktisin familjet e tyre të dashura, vendin e tyre të shtrenjtë, për shkak se vetëm jashtë Shqipërisë mund të ushtrojnë profesionin me dinjitet dhe pa u ndjerë të fyer dhe rrezikuar. Ata janë gazetarë të talentuar dhe fisnikë, të përjashtuar nga e drejta për të shkruar pikërisht sepse janë besnikë të së vërtetës, që duhet të ulin kokën përballë “të keqes” dhe “llumit”, për shkak të interesave që “pronari “ mafioz ka me pushtetin e korruptuar. Ata janë njerëz që nuk pranojnë të udhëhiqen nga hajdutë dhe të korruptuar.

Kur kjo ushtri “të deklasuarish“ të zgjohet dhe të marrë seriozisht kërcënimin që i vjen nga ky sistem i kalcifikuar politik dhe shoqëror, atëherë këtij regjimi do t’i vijë fundi . Sepse vetēm kjo “ushtri“ di të ndërtojë ekplozivin e vërtetë që mund të hedhë në erë këtë sistem të kalbur fund e krye.

Këtu gjejmë edhe arsyen pse protesta e artistëve të Teatrit e alarmoi Ramën dhe Veliajn bashkë. Kjo është edhe arsyeja pse protesta e kuksianëve e detyroi atë të tërhiqej me bisht ndër shalë, sepse ajo që e ndez një revolucion të vërtetë, është pikërisht zgjimi i “të deklasuarve”. Sepse “të deklasuarit“ nuk protestojnë për bukën e gojës, kjo e tmerron sistemin, e fut atë në panik. Si pasojë, reagimi i një regjimi (që po shkon drejt kolapsit) është rritja e dhunës dhe represionit ndaj popullit në tërësi dhe ndaj “të deklasuarve” në veçanti. Shqipëria është në prag revolucionit pikërisht sepse qeveria ka krijuar një distancë të madhe me hallet e vërteta të popullit, ajo është jashtë realitetit dhe si pasojë po prodhon krizë pas krize. Këto kriza kanë sjellë një krizë politike, që me siguri do të sjellë edhe fundin e saj. Por sa më shumë të zgjasë agonia e kësaj qeverie, aq më radikale do të bëhet zgjidhja.