Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Qokë për studentët protestues apo zgjidhje e problemit? Drafti i Qeverisë për 8 pikat, me paqartësi të shumta

Politiko 19 Dhjetor 2018, 16:33

Qokë për studentët protestues apo zgjidhje e problemit? Drafti i

Në portalin qeveritar “Shqipëria që duam” është publikuar një draft ku pretendohet se marrin zgjidhje tetë kërkesat e paraqitura nga studentët. I emërtuar edhe si “Pakti për Universitetin”, ky draft nuk është ende zyrtar dhe i firmosur nga kryeministri Edi Rama.

Gjithsesi, që në hyrje në të tij është rrëzuar një prej kërkesave thelbësore të studentëve, rritja e buxhetit për arsimin në 5% të GBP-së. Asnjë masë nuk parashikohet të merret nga qeveria për rritjen e financimit për arsimin, ndonëse Shqipëria është vendi i fundit në rajon për fondet që kalon në këtë sektor.

Pika 1 e studentëve që parashikonte, “Rritje e buxhetit me 5% e GDP me qëllim mundësimin e përgjysmimit të tarifës së studimit për çdo nivel studimi, përmirësimin e mësimdhënies dhe infrastrukturës, Universitet/konvikt”, është kufizuar vetëm në përgjysmimin e tarifave (përkohësisht?!).

Por ndonëse, sipas këtij drafti, tarifat do të përgjysmohen deri në janar të 2019-ës, me 50% për studentët me mesatare 6 dhe 100% për ata me mesatare mbi 9, paqartësistë janë të mëdha. Aty nuk nuk sqarohet nëse ky përgjysmim do të bëhet vetëm për këtë vit akademik, pra do jetë i përkohshëm si një qokë e qeverisë për studentët që protestojnë prej dy javësh, apo do të zbatohet edhe në vitet e ardhshme. Nuk sqarohet gjithashtu nëse ky përgjysmim prek vetëm bachelor-in apo përfshihet edhe masteri.

Në draftin e qeverisë nuk flitet në asnjë moment për përmirësimin e kushteve në godinat e fakulteteve dhe në konvikte.

Pika 2 e studentëve, “Transparencë me buxhetin nga Ministria e Arsimit, Sportit dhe Rinisë dhe IAL-ve, publikimi i të gjitha shpenzimeve online”, pretendohet se do marrë zgjidhje deri në muajin e ardhshëm me “krijimin e një faqe online, ku të publikohen të gjitha buxhetet dhe shpenzimet e Ministrisë së Arsimit, Sportit e Rinisë dhe çdo IAL-i publik. Faqja të shërbejë edhe si një platformë, për ekspozimin e akteve të korrupsionit apo të shkeljeve të çdo lloji në universitet.”

Pika 3 e studentëve nuk ka marrë gjithashtu zgjidhje: “Rritja nga 10 % në 50 % e peshës totale të votës së studentëve për të zgjedhur kandidatët për dekan, rektor dhe çdo fakultet të ketë një përfaqësues të studentëve në senatin akademik.”

Në draftin e qeverisë për këtë pikë thuhet: “Çdokush që ka njohuri për një praktikë ndërkombëtare, ku pesha e votës së studentëve në zgjedhjet në universitet është siç kërkohet në këtë pikë, është i lutur ta bëjë publike. Momentalisht po punohet për ta adresuar këtë pikë, duke parë me detaje çështjen e përfaqësimit të studentëve në vendimmarrje, sipas praktikave më të mira ndërkombëtare.”

Sa i përket kësaj kërkese të studentëve, vetë kryeministri Edi Rama ka deklaruar më parë se Shqipëria nuk do të bëhet vendi i parë në botë që i jep këtë pushtet studentëve.

Për pikën 4 të studentëve ku kërkohet “Rishikim i titujve akademikë dhe verifikimi i plagjiaturave të doktoraturave dhe teksteve mësimore”, në draft thuhet se “Biblioteka Kombëtare të ngrejë një portal të unifikuar, ku të hidhen të gjitha doktoraturat”, gjithashtu “Të digjitalizohen doktoraturat që janë në letër (hardcopy). Kontrolli antiplagjiaturë i tyre të kryhet nëpërmjet një software-i të posaçëm dhe të gjitha rastet e dyshuara t'i kthehen Komisioneve të Posaçme Universitare për rivlerësim.”

Sipas draftit, kjo kërkesë realizohet deri në mars të 2019-ës.

As pika 5 e studentëve nuk ka marrë zgjidhje: “Mbështetur në nenin 99 mbi Këshillet e Studentëve, Ligji i Arsimit të lartë, pika 2 kërkojmë që Bordi i Administrimit të IAL-ve të ketë numër të barabartë votash si nga MASR dhe IAL-të si dhe të shtohen një përfaqësues në këtë bord nga studentët.”

Në draftin e qeverisë thuhet se “po hulumtohen praktikat më të mira ndërkombëtare për të parë mundësinë që njëri prej anëtarëve të vijë nga trupa studentore”, çka tregon se nuk ka një përgjigje konkrete për studentët.

Karta e studentit, të cilën studentët e kanë renditur pikë të 6-ë, në draftin e qeverisë thuhet se do realizohet deri në muajin shtator të vitit të ardhshëm.

Pika 7 e studentëve “ndërtimi i një biblioteke me standarde Europiane dhe me libër universitar online, falas për studentët në gjuhën shqipe”, pritet të marrë zgjidhje deri në mars të 2019-ës, pasi në draft urdhërohet që “të përfundojë procesi i blerjes dhe vënies në dispozicion të studentëve të Bibliotekës Universitare Digjitale. Të gjitha Universitetet në vend do të kenë akses në bibliotekën elektronike universitare, si dhe në databazën kombëtare të doktoraturave.”

Edhe për pikën 8, ku studentët kërkojnë “vlerësim të perfomancës në mësimdhënie dhe kërkim shkencor i pedagogut, publikim i tij, online dhe regjistrimi i leksioneve”, në draft urdhërohet që ky proces të nisë në mars të 2019-ës.

Në këtë draft të publikuar nga Qeveria, pjesa kryesore e kërkesave të studentëve nuk marrin zgjidhje, siç janë rritja e buxhetit në 5% të GBP-së, përgjysmimi i tarifave për çdo vit akademik, përmirësimi i kushteve në godina, rritja e peshës totale të votës së studentit, si dhe barazimi i votave në bordin e administrimit.

Qeveria deri më tani duket se është në rrugë të mbarë vetëm në krijimin e faqeve të internetit për transparencën e buxhetit për arsimin dhe doktoraturat, si dhe në digjitalizimin e bibliotekës. /Politiko.al