Albin Kurti dhe Ana Bërnabiç përplasen në Tiranë: A doni të na pushtoni?

Në samitin e Ballkanit Perëndimor në Tiranë, ku mori pjesë edhe Kryeministrja Serbe Ana Brnabic, Kryeministri i Kosovës Albin Kurti kërkoi që marrëveshja e CEFTA-s të ripërcaktohet, në mënyrë që të trajtoj Kosovën si shtet, raporton media serbe Tanjug.

Kurti gjithashtu i bëri thirrje Serbisë që të njohë Kosovën.

Duke iu përgjigjur, Bërnabiç  tha se formati aktual funksionon mirë dhe se nuk ka asnjë argument ligjor për të ndryshuar asgjë. “Sepse Kosova është pjesë e Serbisë”, tha ajo.

Brnabic i kujtoi Kurtit se pesë shtete anëtare të BE nuk e njohin Kosovën dhe se nuk është anëtare e OKB dhe se sipas saj nuk mund të ketë një status që ishte i ndryshëm nga ai i tanishmi.

"Çfarë do të bëni? A doni të na pushtoni? ”, iu drejtua Kurti , ndërsa Bërnabiç  u përgjigj duke pyetur:

"Si mendoni se mund ta pushtojmë territorin tonë?"

Kurti dhe Bërnabiç konfirmojnë përplasjet

Kryeministri i Kosovës, Albin Kurti ka pranuar se ka patur debat me kryeministren serbe, Ana Bërnabiç në Samitin për Ballkanin Perëndimor në Tiranë.

Gjatë prononcimit për mediat, Kurti tha se debati ka nisur për çështjen e njohjes.

“Nuk dëshironte të pranonte që Kosova është shtet i pavarur dhe sovran. Unë theksova që Serbia do të duhej të shkëputej duke u distancuar nga regjimi i Millosheviqit dhe trashëgimia e tij.

Njohja e pavarësisë së Kosovës është e vlefshme edhe për vetë Serbinë, që në këtë mënyrë mban veten peng. Kosova e ka shpallur prej 13 vitesh pavarësinë nga Serbia, është koha e fundit që Serbia të shpallë pavarësinë nga Kosova”, tha Kurti.

Ai ritheksoi edhe një herë nevojën për njohjen e pavarësisë së Kosovës nga ana e Serbisë, në kushtet kur të dy shtetet marrin pjesë në këtë nismë.

Nga ana tjetër, kryeministrja e Serbisë, Ana Bërnabiç tha se takimi brenda Samitit të Ballkanit Perëndimor në Tiranë ishte më i vështirë nga sa priste, duke deklaruar se ishte më shumë një hyrje në ngjarjet e ardhshme, duke përfshirë dialogun midis Kosovës dhe Serbisë, sesa diskutim për çështjet rajonale. Ajo foli me theks të veçantë për përplasjen që e pati me Kurtin, që sipas saj kryeministri i Kosovës provokoi.

“Unë mendoj se kishte provokime dhe idetë e tij rreth asaj se si duhet të duket bashkëpunimi rajonal, por unë mendoj se ai mori një përgjigje adekuate dhe situatën faktike”, tha Bërnabiç.

Kur u pyet se cilat ishin ato ide dhe cila ishte përgjigjja, kryeministrja serbe tha se nuk ishte e sigurt se sa mund të fliste për këtë, sepse gjithçka po ndodhte pas dyerve të mbyllura.

“Ai foli për mënyrën se si nuk është më e mundur të bashkëpunosh kështu por në një format tjetër në të cilin Kosova dhe Serbia janë partnerë të barabartë”, tha Bërnabiç.

“Serbia është shtet sovran, Kosova jo, dhe është më mirë të lihen gjëra të tilla për dialog”, shtoi ajo.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm