Matteo Renzi tërheq dy ministra, qeveria italiane në krizë

Ish-kryeministri Matteo Renzi ka tërhequr nga kabineti qeveritar dy ministra, duke shkaktuar kështu një krizë të re në qeverinë italiane të drejtuar nga Giuseppe Conte.

Drejtuesi i ‘Italia viva’ në një konferencë shtypi njoftoi tërheqjen e ministrave Teresa Bellanova, Elena Bonetti dhe nënsekretarit Ivan Scalfarotto. 

"Duhet guxim dhe një ndjenjë përgjegjësie të japësh dorëheqjen", thotë Renzi. "Ne jemi duke përjetuar një krizë të madhe pandemike, përballë të vdekurve dhe të infektuarve, përgjegjësia konsiston në përpjekjen për të zgjidhur problemet dhe jo në fshehjen e tyre".

"Ne nuk jemi ata që hapim krizën politike, kriza politike ka qenë e hapur për muaj të tërë", tha udhëheqësi i Italia Viva. 

"Rregullat demokratike duhet të respektohen, pikërisht sepse ka një pandemi, demokracia nuk është një shfaqje realiteti, nëse ka probleme ata përballen me njëri-tjetrin në tryezat e politikës, në Parlament, në institucione. Mbreti është lakuriq, politika kërkon respekt”, shtoi ai.

Sa i përket krizës, Renzi deklaroi para mediave se nuk do dëshironte që vendi të shkojë në zgjedhje të parakohshme.  

 Vendimi erdhi pas takimit që Conte kishte me presidentin e Italisë Mattarella për ndërmjetësimin e zgjidhjes së krizës.

Debati mes Renzit dhe Contes ishte ‘ndezur’ prej disa muajsh lidhur me menaxhimin e fondeve të BE.

Pas disa javësh debate rreth planit për shpenzimin e 209 miliardë eurove në grante dhe kredi me interes të ulët që Italia pret të marrë nga fondi i rimëkëmbjes së BE, qeveria më në fund arriti të miratojë planin e rimëkëmbjes post-pandemike të vendit të martën.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm