Flash News

Fuste dr*gë dhe sende të paligjshme në qeli, arrestohet polici i burgut të Drenovës

Lavrov: NATO po rrezikon vetëshkatërrimin me buxhetin e ri ushtarak

​Kurti e Vuçiç "përballen" nesër në Shkup

Bie nga skelat, humb jetën punëtori i ndërtimit në Berat

Prokuroria dërgon për gjykim dy zyrtarët e Bashkisë Korçë

KRYESORE

Rama letër publike Bashës: Të dialogojmë pa kushte për mospërkeqësimin e situatës politike

Politiko 22 Maj 2019, 17:15

Kryeministri Edi Rama nëpërmjet  një letre publike, i ka bërë thirrje kryedemokratit Lulzim Basha që të ulen dhe të dialogojnë pa kushte për të gjetur një zgjidhje për krizën politike. Rama ndër të tjera shkruan se nuk e mirëkupton Bashën, që sipas tij, braktisi marrëveshjen pozitive të 17 majit 2017 dhe dorëzoi mandatet, por, gjithsesi dialogu duhet të rinisë.

“Unë Ju ftoj në një dialog pa kushte dhe në kushtet kur Shqipëria e shqiptarët, nuk meritojnë përkeqësimin e një situate politike krejt të pakuptimtë, e cila po u kushton në mënyrë krejt të pamerituar”, shkruan ndër të tjera Rama në letrën e publikuar në 'Facebook.'

Opozita ka vendosur të mos regjistrohet në zgjedhjet lokale të 30 qershorit për sa kohë në krye të Qeverisë është kryeministri Rama. PD dhe LSI kërkojnë largimin e Ramës pasi e akuzojnë se dështoi në 2017-ën të organizonte zgjedhje të lira, duke përfshirë bandat kriminale, siç thonë ata, në manipulimin e votave.

Disa materiale të publikuara në media nga doja '339' e Prokurorisë së Krimeve të Rënda, ku janë përgjuar zyrtarë të PS, përfshirë kryebashkiakun e Durrësit, Vangjush Dako, në komunikime telefonike me anëtarë të bandave kriminale, çuan opozitës drejt vendimit për djegien e mandateve të deputetëve.

Reagimi i plotë:

LETER PUBLIKE LULZIM BASHES

Zoti Kryetar,

u drejtohem me këtë letër publike në përpjekjen për t’i thirrur arsyes Suaj dhe për t’iu kthyer të vetmes rrugë që demokracia njeh për trajtimin e mosmarrëveshjeve mes palëve: Dialogut!

Unë sigurisht, s’kam asnjë mirëkuptim për rrugën e zgjedhur prej Jush, qyshse braktisët marrëveshjen pozitive të 17 majit 2017 dhe vendosët ta nxirrnit grupimin Tuaj, plotësisht jashtë shinave të shtruara në atë marrëveshje. S’kam se si ta mirëkuptoj as gjuhën e urrejtjes, as djegien e mandateve, as dhunën e frymëzuar e organizuar prej Jush, prej së cilës nuk jeni distancuar asnjëherë; për të cilën jeni akuzuar botërisht me emër e me mbiemër nga partnerët e miqtë e pazëvendësueshëm të Shqipërisë dhe si pasojë e së cilës, sot një numër jo i vogël ndjekësish Tuajt gjenden në duart e drejtësisë. S’kam si të mirëkuptoj kurrësesi, as bojkotin e paprecendentë të zgjedhjeve dhe lëre pastaj, shantazhin mbi vendin e mbi qytetarët e këtij vendi, se Ju nuk do t’i lini ata të votojnë në 30 qershor.

Por mungesa e plotë e mundësive të mia për të mirëkuptuar gjithë sa më lart, nuk më pengon, përkundrazi, më detyron t’Ju drejtoj publikisht, këtë herë me shkrim, ftesën për t’u ulur pa humbur kohë në Tryezën e Dialogut. Dialogun s’mund ta pengojnë assesi qoftë pozicioni Juaj ekstrem në lidhje me zgjedhjet vendore, qoftë pamundësia ime ekstreme në lidhje me datën kushtetuese të zgjedhjeve.

Jeta politike nuk mbaron në 30 qershor dhe që të jemi të qartë mes nesh, zgjedhjet në 30 qershor Ju mund t’i vështirësoni, nëse do t’i shkoni deri në fund rrugës pa krye ku po e udhëhiqni grupimin Tuaj politik, por s’ka asnjë shans që t’i ndaloni të zhvillohen. Por Dialogu duhet të nisë pavarësisht atyre që thoni e mendoni të bëni Ju në 30 qershor dhe pavarësisht faktit se unë 30 qershorin s’kam asnjë fuqi ligjore ta negocioj, edhe pse Ju jeni i lirë ta diskutoni në Tryezën e Dialogut.

Unë Ju ftoj në një dialog pa kushte dhe në kushtet kur Shqipëria e shqiptarët, nuk meritojnë përkeqësimin e një situate politike krejt të pakuptimtë, e cila po u kushton në mënyrë krejt të pamerituar. Shumica dërrmuese e tyre, përfshirë edhe shumicën e atyre që s’kanë votuar e s’kanë ndërmend të votojnë ndonjëherë për mua dhe qeverinë që drejtoj, duan dialog mes nesh, e jo acarim mes shqiptarëve dhe dëmtim të Shqipërisë, për shkakun tonë. Aq më pak duan çka Ju po u ofroni sot, në një rrugë ku nuk është fare halli im se do shkoni keq e më keq politikisht si grupim, po ku ata vetë janë të humbur dhe ku askush nuk del i fituar.

Me shpresën e vobektë se ftesa ime do të merret parasysh dhe me urimin që përveç fjalive propagandistike, të marr mbrapsht edhe përgjigjen pozitive për këtë ftesë, Ju lutem zoti Kryetar të pranoni shprehjen e dëshirës sime për shëndet të patrazuar për Ju personalisht dhe familjen Tuaj.

Edi Rama

22 Maj, 2019

Të fundit