Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

“Rrezikon negociatat”, thirrjet e ndërkombëtarëve që kundërshtuan ‘anti-shpifjen’ para se PS të shtyjë votimin në Kuvend

Politiko 30 Janar 2020, 13:37

Mazhoranca kërkoi të hiqet nga rendi i ditës dhe të shtyhet diskutimi për dekretin e presidentit Ilir Meta, lidhur me paketën ‘anti-shpife’.

Ishte kreu i Grupit Parlamentar i PS, Taulant Balla ai i cili i kërkoi kreut të Kuvendit, Gramoz Ruçi që të shtyjë paketën deri sa Komisioni i Venecias të japë një opinion të saj, (20-21 mars) pasi kishte pranuar shqyrtimin me procedurë të përshpejtuar.

Kjo paketë e miratuar në seancën e fundit të dhjetorit të shkuar ka hasur në kundërshti të shumta jo vetëm nga përfaqësuesit e medias, opozita dhe shoqëria civile, por edhe nga zëri ndërkombëtar, pasi e shohin si cenim të fjalës së lirë dhe kontroll të qeverisë ndaj mediave.

Madje, vetë Balla ka pohuar në fillim të janair në një prononcim për gazetarët se dekretin e presidentit do ta rrëzojnë në seancën parlamentare.

Jo më larg se sot dhe dje, raporteri për Shqipërinë në Grupin PPE të Parlamentit Europian David Lega, përmes një postimi në twitter shprehu shqetësim lidhur me votimin në kuvend të paktës anti-shpifje, që sipas tij rrezikon procesin e negociatave.

Ai argumentonte se qeveria duhet patjetër të përmbushë rekomandimet specifike të dhëna nga Komisioni Europian dhe nga Këshilli i Europës.

“Po përsëris qëndrimin tim mbi rrezikun që mbartin ligjet e reja për median në lidhje me çeljen e mundshme të negociatave me BE.

Grupi PPE i Parlamentit Europian beson fort në çeljen e negociatave të anëtarësimit me Shqipërinë. Por Shqipëria duhet të respektojë kriteret e Kopenhagenit që janë një standard bazik e minimal për një vend kandidat. Nëse qeveria Rama do të miratojë në plenare ligjet në formën aktuale atëherë ajo po vë në rrezik serioz shansin për çeljen e negociatave të anëtarësisë në BE.

Qeveria Rama duhet patjetër të përmbushë rekomandimet specifike të dhëna nga Komisioni Europian dhe nga Këshilli i Europës”, shkruante Lega.

Komisioni Evropian

Komisioni Evropian ka udhëzuar qeverinë shqiptare po ashtu pak ditë më parë që të rishikojë paketën anti-shpifje, e të bëjë përmirësime duke marrë parasysh të gjitha rekomandimet e dhëna.

Zëdhënësja e KE-së, Ana Pisonero, tha se ekzekutivi evropian konsideron se kthimi mbrapsht i “paketës anti-shpifje” nga Presidenti i Republikës Ilir Meta në Kuvendin e Shqipërisë, është një mundësi për qeverinë shqiptare, që të pranojë rekomandimet e KE-së.

“Ne e kemi bërë të qartë se Bashkimi Evropian mbështet rekomandimet e Këshillit të Evropës në rastin e ligjit të medias në Shqipëri. Ne pranojmë se shqetësimet dhe rekomandimet përkatëse janë sërish të vlefshme dhe ato duhen adresuar sërish. Faktin që presidenti i Shqipërisë ka kthyer ligjin në parlament e shohim si një mundësi për t’i pranuar ato. Ne shpresojmë që kjo të realizohet”, ishte përgjigja e saj për Abc neës.

Pyetjes nëse KE-ja mbështet vetërregullimin e medias, zëdhënësja u përgjigj: “Absolutisht që ne e mbështesim këtë. Ne mbështesim disa rekomandime të Këshillit të Evropës, jo vetëm për promovimin e vetëregullimit. Por ne e mbështesim qëllimin për ta kufizuar qëllimin e rregullimit vetëm për serviset e mediave audiovizive online, trajtimin gjyqësor të pavarur të ankesave lidhur me mediat, forcimin për transparencën e pronësisë së mediave në vend. Pra, ne mbështesim të gjitha rekomandimet e Këshillit të Europës. Ato janë në përputhje me pritshmërinë tonë, që duhet ndjekur nga një vend aspirant”

Liria e shprehjes dhe e mediave është parakusht i Bashkimit Europian për vendet e përfshira në procesin e zgjerimit, që aspirojnë anëtarësimin në Bashkimin Europian.