Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Seanca gjyqësore për ‘Vollgën’/ Beqaj: Më vure pistoletën në bark! Shullazi: E ndjeve ti apo e pe?

Politiko 21 Qershor 2017, 17:38

Seanca gjyqësore për ‘Vollgën’/ Beqaj: Më vure

Nga takimet me ish-ministrin e Shëndetësisë, Ilir Beqja, te të “të falat” e dërguara për Emiljano Shullazin nga ishzëvendësdrejtori i Shërbimit Informativ, Ylli Alushi.

Nga bisedat me ish-kreun e Hipotekave, Ilirian Muho, te një plan për ryshfet 200 mijë euro te një gjyqtar në Apel. Nga kërcënimet me pistoletat në bark për “zhvatje” tek “ofertat” 7 milionë euro për t’u tërhequr nga kallëzimi.

Gjithë këto dhe rrethana të tjera u përmendën dje te Krimet e Rënda gjatë një seance gjyqësore të pazakontë të ballafaqimit mes Emiljano Shullazit dhe biznesmenit Ylvi Beqja. Për gati 5 orë me radhë, biznesmeni që kallëzoi për gjobëvënie Shullazin dhe 4 të bashkëpandehurit e tij, iu përgjigj pyetjeve të palëve në proces. Ai rrëfeu si kishte kërkuar drejtësi te Shullazi për betejën gjyqësore për regjistrimin e ish-hotel “Vollgës” dhe më tej për “pikën e kthesës”, ku u kërcënua dhe gjobit prej tij.

Dëshmitari i mbrojtur, Ylvi Beqja, u prit dje në sallën e gjyqit nga një vështrim shpues i të pandehurit Shullazi. Më tej ai u “bombardua” me pyetje nga i pandehuri, i cili hera-herës nuk kurseu ironinë ndaj dëshmitarit. Për shkak të përfundimit të orarit zyrtar të punës në gjykatë, dëshmia e tij u ndërpre, për të vijuar në seancën e 27 qershorit.

“E PE PISTOLETËN, Ç’NGJYRË KISHTE”

Avokati: A keni thënë ju se që nga momenti që u lidhe me Shullazin kanë pushuar kërcënimet ndaj jush?

Beqja: Nuk e mbaj mend ta kem thënë.

Emiljano Shullazi: Si filluan kërcënimet, që kërkoja lekë unë, sipas teje?

Beqja: Ka qenë kur do të regjistrohej prona. Më kërkove lekë kur shkuam te noterja. Më the “do të më japësh të gjithë lekët dhe 30 për qind të Vollgës”.

Shullazi: Çfarë tha noterja Aida Spahiu për lekët?

Beqja: Aida më tha “s’kanë kaluar akoma lekët në llogarinë tënde. Shullazi tha “për ç’lekë bëhet fjalë?”. Ajo i tha që “për 670 mijë euro”. Ky (Shullazi) më vuri dorën në qafë dhe tha hajde këtu. I ra qepenit dhe kur u hap qepeni, më çoi te një ngushticë e pallatit. Aty më vure pistoletën në bark.

Shullazi: Kush e hapi qepenin?

Beqja: Shokët e tu. Ishte Endrit Zela dhe 6 a 7 të tjerë.

Shullazi: The që të vura pistoletën në bark. E ndjeve pistoletën ti, apo e pe.

Beqja: E ndjeva dhe e pashë.

Shullazi: Çfarë ngjyre ishte?

Beqja: E errët ishte.

Shullazi: Me shul, apo pa shul?

Beqja: Nuk e di unë atë. Për mua ishte pistoletë.

Shullazi: Mirë pra dhe unë po të pyes: Ishte me mulli, apo me karikator?

Beqja: Nuk e di. Pistoletë ishte.

Shullazi: Kishte fishekë, apo nuk kishte?

Beqja: Unë nuk di t’i duken fishekët pistoletës.

Shullazi: Çfarë të thashë unë te “Partizani”?

Beqja: Më the kalo pronën, se unë e hedh më të mirin.

Shullazi: U trembe ti?

Beqja: Shumë.

Shullazi: Fole me njeri për atë natë ti?

Beqja: Jo.

Shullazi: Sa ishte kontrata?

Beqja: Ishte 20 për qind, baras me vlerën 1.4 milionë euro, ose 1700 metra katrorë pronë. Dhjetë për qind ishte për regjistrimin e pronës dhe 10 për qind për mbylljen e çështjes në gjykatë.

Shullazi: A e kemi takuar bashkë ish-drejtorin e Hipotekës së Durrësit?

Beqja: Nuk më kujtohet. Kemi takuar të përgjithshmin.

Shullazi: Kur të solli tek unë?

Beqja: Nuk më kujtohet./Panorama