Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Shpresa Beçaj del para Vetting; KPK: S'ka deklaruar pasurinë dhe as pastërtinë e figurës! Avokati sqaron rastin unik të saj

Politiko 1 Korrik 2020, 10:24

Shpresa Beçaj del para Vetting; KPK: S'ka deklaruar pasurinë

Anëtarja e Gjykatës së Apelit Tiranë, Shpresa Becaj ka dalë sot në një seancë dëgjimore para Vettingut. Pas dy seancave të shtyra më 3 dhe 17 qershor 2020, për shkak të gjendjes së saj shëndetësore, ish-kryetarja e Gjykatës së Lartë, është paraqitur sot në Komisionin e Pavarur të Kualifikimit, ku do të vlerësohet për ligjshmërinë e pasurive, pastërtinë e figurës dhe aftësitë profesionale. Çështja e Beçaj është shqyrtuar nga trupi gjykues i përbërë nga Olsi Komici, Roland Ilia dhe Lulzim Hamitaj.

KPK ka deklaruar se nuk mund ta rivlerësojë pasi gjyqtarja e Apelit, Shpresa Beçaj, nuk ka përmbushur detyrimet, pasi nuk ka dorëzuar disa formularë në kohë. Më 17 shkurt 2020 DSIK ka vënë dijeni KPK se Beçaj nuk kishte dorëzuar ende formularin si detyrim të saj.

Sipas KPK, gjyqtarja Beçaj nuk ka dorëzuar deklaratën e pasurisë pranë ILDKPI-së si dhe nuk ka depozituar as deklaratën e pastërtisë së figurës dhe as të të vlerësimit profesional duke mos përmbushur kështu detyrimin ligjor për të dalë para vetingut. Sipas KPK mosparaqitja e deklaratave shkakton humbjen e cilësisë së subjektit të rivlerësimit dhe sjell pamundësinë e këtij institucioni për të vijuar hetimet në kuadër të vetingut.

"Mungesa e ushtrimit në kohë, i pamundëson KPK-së vlerësimin si ish-gjyqtare dhe si subjekt rivlerësimi si gjyqtare e Apelit", shprehet KPK.

Në fjalën e saj para trupës gjykuese të KPK, Beçaj tha se e ka kryer detyrën e avokatit për të siguruar të ardhura, ndërsa në lidhje me faktin që nuk ka plotësuar formularët shprehet se " nuk kam qenë gjyqtare në detyrë dhe për këtë arsye nuk e kam plotësuar. Konfirmimin në detyrë si gjyqtare në Gjykatën e Lartë e kam marrë shumë më vonë pasi janë plotësuar formularët në kuadër të vetingut".

Rasti i anëtares së Gjykatës së Apelit, Shpresa Beçaj rezulton të jetë unike në Shqipëri, pasi ndodhet në një situatë që ligji nuk e ka parashikuar vetimin.

Avokati Julian Mërtiri në kohën kur hyri në fuqi ligji për rivlerësimin kalimtar Shpresa Beçaj nuk ushtronte detyrën e gjyqtares dhe se gjithë kjo situatë është shkaktuar për shkak të mosveprimeve të KLD.

“Shpresa Beçaj është pjesë e sistemit gjyqësor prej më shumë se 33 vitesh. Në 1987 është emëruar në Gramsh. Me tej ka qënë gjyqtare në Tiranë. Në 2004 u bë pjesë e Gjykatës së Lartë.

Në 2008 u bë kryetare e Gjykatës së Lartë. E ushtroi deri në 2013 detyrën. Pas largimit nga funksioni ajo dorëzoi deklaratën e saj në ILDKPK.

Në tetor 2013 paraqiti kërkesë në KLD për emërim në Apelin e Tiranës. KLD në mënyrë arbitrare nuk e mori në shqyrtim për 5 vite. Në këto kushte Becaj bëri padi në Administrative. Në korrik 2016 Adminiatrativja detyronte KLD-në të marrë në shqyrtim kërkesën e Becajt dhe pagimin e dëmit të shkaktuar.

Në Apelin Adminiatrativ në 2017 u vendos të detyrohet KLD të emëronte Beçajn në Apelin e Tiranës dhe ta dëmshpërblente për dëm pasuror e moral. KLD kërkoi pezullimin e ekzekutimit të vendimit në Gjykatën e Lartë, kërkesë që nuk u pranua nga kjo gjykatë. KLD në maj 2018 zbatoi vendinin e Apelit Administrativ. Beçaj ka nisur punë në 4 qershor 2018. Ka depozituar deklaratën e saj në ILDKP. Në kohën kur hyri në fuqi ligji për rivlerësimin kalimtar nuk ushtronte detyrën e gjyqtares. Pra Beçaj nuk ka pasur statusin e gjyqtares në detyrë. Ajo ka ushtruar detyrën e avokates për të siguruar të ardhura”, sqaroi ai ndërsa shton se analiza e fakteve nga KPK nuk është e saktë. Sipas avokatit Julian Mërtiri, Beçaj nuk ka qenë në listën e subjekteve të rivlerësimit.

“Në asnjë nga datat e afatit kur Beçaj duhet të dorëzonte formularët për llogari të procesit të vettingut ajo nuk kishte statusin e gjyqyares në detyrë. Nga ana tjetër, ligji nuk parashikon dorëzim të formularëve pas afatit të parashikuar. Beçaj shpreh dëshirën për tu vetuar, nuk ka shfaqur asnjë neglizhencë, por ndodhet në një situatë që ligji nuk e ka parashikuar. I kërkojmë komisionit të vlerësojë situatën ligjore në të cilën ndodhet Beçaj, unike në vend, për shkak të rrethanave të pavarura prej saj. E gjithë kjo situatë është shkaktuar për shkak të mosveprimeve të KLD. Nëse komisioni gjen mundësi ligjore për plotësimin e formularëve në një moment të dytë ne jemi të gatshëm, por sipas nesh, kjo mundësi ligjore nuk ekziston”, thotë ai.

Vendimi i vettingut për Beçajn do të merret më 3 korrik 2020. Shpresa Beçaj ka qenë gjyqtare në Gjykatën e Lartë në vitet 2004-2013 dhe kryetare e Gjykatës së Lartë në vitet 2008-2013. Ndërsa gjyqtare e Apelit Tiranë është caktuar muajt e fundit. Në 1987 Beçja ka qenë gjyqtare në qytetin e Gramshit, ndërsa në 1990 u emërua gjyqtare në Tiranë. Ajo ka një karrierë prej 33 vitesh gjyqtare.

Kujtojmë se, emri i gjyqtares u përmend në një kontekst komprometues nga Presidenti Meta, Ministër i Jashtëm aso kohe, në video-skandalin në zyrën e Dritan Priftit në vitin 2011, çka tronditi opinionin publik. Atëhere Meta ishte ministër në qeverinë e Sali Berishës, ndërsa Prifti- Ministër Ekonomie- i propozuar nga Meta. Duke folur për pazare koncesionesh, emërimesh dhe interesash të ndryshëm, Meta i thotë Priftit se i ka punën mirë me Shpresa Beçajn, pasi i ka emëruar vajzën si diplomate në Austri.