Flash News

Posta e mëngjesit/ Me 2 rreshta: Çfarë pati rëndësi dje në Shqipëri

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

KRYESORE

Sulmi ndaj Ornela Liperit, “Monitor” i përgjigjet Veliajt me një editorial: Media është nën presionin e pushtetit, por ne jemi gati; nuk jemi këtu për të numëruar pemët

Politiko 24 Shkurt 2018, 13:47

Sulmi ndaj Ornela Liperit, “Monitor” i përgjigjet Veliajt me

Revista Monitor ka publikuar sot një editorial si kundërpërgjigje ndaj shantazhit publik që kryebashkiaku i Tiranës, Erion Veliaj, i bëri kryeredaktores Ornela Liperi, gjatë emisionit ‘Opinion’.

“Të lirë, të pavarur e profesionalë. Kjo është ajo që kemi qenë, jemi e do të jemi!”, është ky titulli i editorialit, ku ndër të tjera akuzohen politikanët se po përpiqen që mungesën e argumentit për mosmbajtjen e premtimeve të fushatës ta mbushin me të pavërteta dhe sulme bajate, që duan të zëvendësojnë fjalën e lirë me servilizëm politik.

Monitor thekson se media sot në Shqipëri është nën presionin e pushtetit, por se gazetarët janë gati të përballen.

“Sot është fakt i shprehur në qindra dokumente e raporte ndërkombëtare, që media është nën presionin e pushtetit dhe nuk na mbetet ne që ta zbulojmë këtë gjë, siç po ndodh në këtë rast, kur tehu i shpatës është mprehur ndaj nesh. Ne nuk jemi aq të lehtë sa të strukemi pas thirrjes, “mos e prekni median”, por jemi gati, siç kemi qenë kurdoherë gjatë këtyre 18 viteve që, me lirinë dhe profesionalizmin tonë, t’i përgjigjemi me fakt kujtdo që nuk respekton dhe përbalt. Nëse fakti dhemb, kjo tregon se e kemi bërë punën mirë”, thuhet në reagim.

Në editorial i jepet përgjigje edhe presionit të Veliajt ndaj gazetares se nuk duhet të flasë kundër kullave duke qenë se redaksia e saj i ka zyrat në një kullë, si dhe ironizohet përpjekja e kryebashkiakut për të fshehur ‘mbjelljen’ pa kriterë të pallateve shumëkatëshe në Tiranë me mbjelljen e pemëve.

“Ne vërtet punojmë në kulla të kohëve moderne, punojmë edhe në ndërtesa të kohës së Zogut, por dhe në banesa pano-betoni të komunizmit. Pasi kjo është “Tirona jonë”, të cilën e kanë bërë kështu për më të shumtën politikanët që kanë drejtuar këtë vend se sa qytetarët që, gjithnjë e më shpesh, po e shfaqin pafuqinë e tyre, duke i ikur nga sytë këmbët realitetit. Por nuk kemi qenë, as jemi këtu dhe as do të jemi këtu thjesht për të numëruar pemët e mbjella apo të shkulura, por për t’u thënë qytetarëve të vërteta që do ta ndihmojnë të krijojë një ide më të mirë se çfarë duhet të besojnë apo të mos besojnë në cirkun mediatik ku po aktron politika”, thuhet në reagimin e ‘Monitor’.

Më tej, në reagim thuhet: “Jo gjithkush ndoshta do të jetë i lumtur me këtë pasqyrim, pasi nuk është se po e zbulojmë ne, që me paranë publike shumëkush abuzon apo përfiton dhe, kjo sigurisht që do të shoqërohet me presion e përbaltje. Por Liria e të shprehurit dhe profesionalizmi janë ingredientët për një media të mirë dhe ne nuk do të mund të kryejmë misionin tonë pa to. Ne nuk do të ishim këtu sot të përbaltur nga pushteti, nëse nuk do të ishim të lirë dhe as profesionistë që përpiqemi që çdo ditë t’i bëjmë gjërat mirë.”