Takoi Ramën, Metën e Bashën, Kim mesazh të fortë një ditë para 30 korrikut: Nënvizuam gjithëpërfshirjen, opozita e bashkuar s’mund të injorohet

Ambasada e SHBA në Tiranë ka zbardhur detaje nga takimet e ambasadores, Yuri Kim me presidentin Ilir Meta, kryeministrin Edi Rama Kryetarin e Partisë Demokratike Basha, anëtarë të Këshillit Politik mbi Reformën Zgjedhore, si dhe me një sërë ekspertësh e të tjerë.

Takimet e zhvilluara ditët e fundit kishin në fokus ndryshimet kushtetuese, që pritet të miratohen nesër në Kuvend.

Në njoftimin e publikuar, një ditë para seancës thuhet se Kim ka nënvizuar tri pika konkrete: që marrëveshja e 5 qershorit duhet respektuar ashtu si u ra dakord për të, Parlamenti ka kompetencat dhe përgjegjësinë për të marrë në shqyrtim dhe miratuar legjislacionin, si dhe opozita e bashkuar e cila “dogji mandatet e tyre”, nuk mund të injorohet pasi përfaqësojnë një pjesë domethënëse të votuesve shqiptarë.

Kim ka ritheksuar sërish se çdo vendim duhet të ndërmerret përmes dialogut dhe gjithëpërfshirës, ndërsa nënvijëzon se opozita e bashkuar ndonëse dogji mandatet nuk mund të injorohet sepse përfaqëson një pjesë domethënëse të votuesve shqiptarë.

Mesazhi i plotë:

Gjatë javëve të fundit, Ambasadorja Kim ka pasur biseda të shumta mbi reformën zgjedhore me Presidentin Meta, Kryeministrin Rama, Kryetarin e Partisë Demokratike Basha, anëtarë të Këshillit Politik mbi Reformën Zgjedhore, si dhe me një sërë ekspertësh e të tjerë.

Ajo ka nënvizuar tri pika:

Së pari, marrëveshja e 5 qershorit, e cila u arrit nëpërmjet një procesi transparent dhe gjithëpërfshirës, duhet respektuar ashtu si u ra dakord për të.

Së dyti, Parlamenti ka kompetencat dhe përgjegjësinë për të marrë në shqyrtim dhe miratuar legjislacionin.

Së treti, në të njëjtën kohë, edhe pse ata të cilët “dogjën mandatet e tyre”, bazuar në përkufizimin e kësaj, kanë djegur pretendimet që mund të kishin për kompetenca dhe përgjegjësi në Parlament, nuk mund të injorohet fakti se ata, gjithsesi, përfaqësojnë një pjesë domethënëse të votuesve shqiptarë.

Për këto arsye, ne e kemi lavdëruar marrëveshjen e 5 qershorit, të arritur nëpërmjet bisedimeve ndër-partiake; përshëndetëm miratimin në Parlament në 23 korrik të kodifikimit të marrëveshjes së 5 qershorit; dhe nënvizuam gjithëpërfshirjen dhe transparencën me të cilat partitë arritën marrëveshjen e 5 qershorit duhet të jenë norma në marrjen e veprimeve të rëndësishme kombëtare.

Partitë duhet të përfshihen në Këshillin Politik me mirëbesim. Drejtuesit përkatës kanë deklaruar se çdo veprim i Parlamentit nesër nuk i mbyll negociatat e nisura në Këshillin Politik rreth listave të hapura dhe koalicioneve. Ne do të shohim nëse drejtuesit do ta mbajnë fjalën e tyre.

Të gjitha partitë duhet të vazhdojnë të përfshihen, në mënyrë që ligjet të cilat do të miratohen në fund, të jenë rezultat i një procesi transparent dhe përfshirës, në interes të të gjithë popullit shqiptar, dhe që e çojnë vendin përpara në rrugën demokratike – ky është një detyrim që udhëheqësit shqiptarë e kanë përpara popullit shqiptar.

 

Kujtojmë se kryeministri Edi Rama ka paralajmëruar se duan apo s’duan opozita jashtëparlamentare, nesër ndryshimet kushtetuese do të votohen në kuvend.