Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Taulant, ti nuk 'je një luledielli'; je një degë kanabisi

Politiko 18 Dhjetor 2017, 19:00

Taulant, ti nuk 'je një luledielli'; je një degë

Alfred Lela

Opozita e quajti provokim gjestin e deputetit Taulant Balla, ftesën e tij nga foltorja e Kuvendit, në emër të mazhorancës, që kolegët e pakicës t'i bashkoheshin një nisme për ndihmë ndaj fëmijve dhe adoleshentëve të prekur nga leuçemia. 'Ti je një luledielli' quhet nisma, dhe përfaqësohej në Kuvend nga t-shirte të bardha me një luledielli në mes që ishin veshur nga disa prej deputetëve të majtë.

Qeveria i kish nderur si tesha shtëpiakesh në tel në vitrinën e lartë ku janë vendosur karriget e saj. Por, opozita me gjithë mend nuk kish parë asgjë akoma, për të ripërdorur një frazë tashmë ikonike të kryeministrit Rama. Pak më vonë, kur provokimit të Taulantit me t-shirte iu përgjigj me tymuese opozita, në atë lesh-e-li, nuk thonë kot 'ujku mjegull do', kreu i grupit parlamentar socialist u zgjat mbi 'stacionet' e kolegëve demokratë, duke votuar në emër të nja dy prej tyre.

Kjo e bëri seancën, jo vetëm spektakolare por edhe gjynahqare.

Gjesti i Ballës të kujtonte ato hiletë e vogla që bënim në lojrat e fëminisë. Sapo largohej shoku i lojës, me një buzëqeshje vesh më vesh, merrej a lihej diçka në 'dorën' e tjetrit. Pasditja bëhej më e bukur me këtë dredhi fëminore.

Balla përfaqëson tipin që liderët politikë shqiptarë, në këtë rast Rama (por, jo vetëm ai), zgjedhin për punët që do donin por nuk kanë pse t'i bëjnë vetë. Një përzierje e cubit me të paturpin, e dredharakut me të patremburin, ka qenë përherë një koktej që ka prodhuar parlamentarë shqiptarë, të cilët janë ngritur një kokë mbi të tjerët me të bamet e tyre.

Këta tipa janë ata që mund të quhen 'intelektualë të hurit dhe litarit'.

Seanca nisi dhe bitisi me Ballën. Në fillim ai u mundua të prishte seriozitetin e ditës, të seancës dhe të kauzës opozitare, dhe në fund vodhi votat e kundërshtarit politik. Qëllimi, në të dy rastet, ishte i njëjti: për ta degjeneruar seancën dhe pretendimin opozitar, për ta kthyer të gjithën në një shaka të madhe, për ta banalizuar të keqen dhe të mirën bashkë. Për të bërë që populli të merret me spektaklin dhe të harrojë përmbajtjen.

Ky është thelbi i qeverisjes Rama-Balla: spektakli që sfidon çdo turp.

'Ti je një luledielli' është nismë humane dhe për t'u përshëndetur. Taulant Balla, duke zgjedhur ditën e një përballjeje të tillë politike, pra një kohë të papërshtatshme për ta prezantuar, dëmtoi jo vetëm seriozitetin e seancës, por edhe vetë kauzën e organizatës që qëndron pas nismës njerëzore.

'Ti je një luledielli' u përdor sot, ashtu si dhe prokurorja Arta Marku, si një gjethe fiku për të mbuluar një lakuriqësi qeveritare. Simbolika e vjetër e gjetheve edenike që mbulojnë 'trupturpet' e njeriut të parë, mund të përdoret për qëllime politike edhe në shekullin 21, por jo se përpjekja shkon pa u dalluar.

Një luledielli nuk e mbulon dot degën e kanabisit, që është kthyer në stemë qeveritare. Gjasat janë që as një prokuror, politikisht i telekomanduar, nuk do mundet ta bëjë.