Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

TEC-i Korçës një “investim strategjik” me dëm ekologjik

Politiko 28 Prill 2018, 15:35

TEC-i Korçës një “investim strategjik” me

Naum Mara

Le të themi që në fillim se çdo lloj investimi i huaj duhet përshëndetur. Sjell punë dhe zhvillim. Një pjesë e investimit prej 350 milion eurosh për TEC-in e Korçës do qarkullojë në ekonominë lokale dhe kjo nuk është e pakët në një zonë, ku investimet janë kryesisht në sektorin e bujqësisë dhe turizmit.

Sipas njoftimeve, jo të plota, të qeverisë në media, në afërsi të Pojanit dhe Plasës do ndërtohet një termocentral me gaz natyror, që do prodhojë energji elektrike. Pronarët e TEC-it do blejnë gas nga gazsjellësi TAP dhe do e kthejnë në energji elektrike, të cilën do ja shesin sistemit elektrik shqiptar, shtetëror a gjysëm shtetëror.

Qeveria e ka kategorizuar TEC-in si “investim strategjik”, me fjalë të tjera, sipas ligjit, ajo do i krijojë lehtësi në tarifa dhe taksim, bile edhe deri në falje të tokave të shpronësuara.

Ka pak transparencë, se sa miliona euro tokë, rrugë dhe infrastrukturë do i “falen” kompanisë austriake nga ana e shtetit shqiptar.

Le të mos hyjmë në hesapet e investitorëve se dinë t’i bëjnë mirë dhe as në “hesapet” e qeveritarëve, të cilët gjithashtu dinë t’i bëjnë llogaritjet e përqindjeve, që hyjnë në xhepat e tyre.

Le të shohim për një moment me realizëm këtë investim për qytetarët e Korçës dhe vendbanimeve rreth saj.

Ka një përpjekje, që të bën të dyshosh, se qeveritarët dhe administratorët lokalë, po bëjnë përpjekje për ta ‘shitur” këtë investim si një zgjidhje edhe për ngrohjen e qytetit të Korçës.

Fund e krye gënjeshtër!

Uji i ngrohtë, që do krijohet nga ftohja e impianteve të TEC-it, as mund të llogaritet se mund të përdoret për qytetin e Korçës. Do kërkojë investime infrastrukture, të cilat ”nuk ja vlen barra qeranë” të kryhen. Asnjë investitor privat nuk do e bëjë këtë gjë. Nëse e merr përsipër shteti, do jetë një barrë akoma më e rëndë në kurriz të taksapaguesve.

Qëllimi i kësaj gënjeshtre është për të kaluar sa më lehtë para qytetarëve, një investim, që është shumë i dëmshëm për mjedisin.

Norvegjia, prodhuesi më i madh europian i naftës dhe i gazit, ka ndaluar ndërtimin e TEC-eve dhe pas dy vjetësh, të gjithë energjinë elektrike do e prodhojë me burime të rinovueshme. Në këtë drejtim po shkojnë të gjitha vendet skandinave.

Ka shumë studime ndërkombëtare, që i konsiderojnë TEC-et me gaz po aq të dëmshme për mjedisin sa ato me naftë, bile edhe më tepër për shkak të rrjedhjeve të paeliminueshme të gazit metan nga tubacionet.

A i duhet zonës sonë një ndotës kaq i madh i mjedisit?

Administratorët lokalë, po përdorin për ta justifikuar ndotjen, argumenta qesharake si “sipas Marrëveshjes së Parisit, Shqipëria ka akoma rezervë për ndotje brenda limiteve”, që në fjalë të tjera do të thotë, “meqënëse nuk jemi të ndotur tamam, le të arrijmë nivelet e Kinës”. Të tjerë shtojnë, se “meqënëse po ndërtohen në masë sera të prodhimeve bujqësore, që do kenë nevojë për bioksid karboni, me një gur vrasim dy zogj”.

Vërtet gazsjellësi i TAP-it krijon mundësi për të prodhuar energji me kosto më të ulët, por a duhet konsideruar kjo si një leverdi e madhe për banorët?

Ne kemi një ekonomi të varfër, që ka nevojë për investime të huaja, por nëse këto investime do sjellin dëme në shëndetin e banorëve në breza, a duhet të gëzohemi për apo duhet të ngrihemi në këmbë për të mos i lejuar?

Ekzistenca e korrupsionit të madh në ministritë dhe Kryeministri, detyrimisht të bën dyshues për çdo lloj investimi të madh. Për më tepër kur shoqërohet edhe me premtime të rreme, si kjo e ngrohjes së qytetit.

Ndoshta, për shkak të mungesës së informacionit, korçarët nuk po ngrihen në protestë si ajo kundër UEFA-s për ndalimin e “Skënderbeut” nga Kupat e Europës. Nëse vendimi i UEFA-s “vret ëndrrën e një qyteti”, vendimi i qeverisë për TEC-in e ri mund të “vrasë“ fëmijë dhe fëmijët e fëmijëve.

Mos themi përfundimisht, që jemi katandisur në një turmë, që do vetëm panem e circesnes (kërnace dhe futboll- përkthim i imi) dhe nuk jemi në gjendje të mendojmë për të ardhmen tonë.