Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Themeluesi i GAF flet për platformën e Diasporës shqiptare në ShBA: Pas Samitit qeveria 0 interesim. Ardhja e Majkos solli ndryshime

Politiko 25 Korrik 2018, 19:33

Themeluesi i GAF flet për platformën e Diasporës shqiptare

Politiko.al: Mark Kosmo është drejtori dhe një nga themeluesit e Shoqatës Shqiptare Amerikane të Massachusetts-it (Maas Besa), një shoqatë që kujdeset për integrimin dhe avancimin e Diasporës shqiptare të Bostonit; aktualisht ai është në procesin e krijimit të Fondacionit të Shqiptarëve Globalë. Çfarë është kjo organizatë e re dhe cilat janë qëllimet e saj?

Fondacioni i Shqiptarëve Globalë (GAF-shkurtimi në Anglisht) do të promovojë Filantropinë e Diasporës Shqiptare për të mbështetur organizatat jofitimprurëse shqiptare në të gjitha vendet e Ballkanit Perëndimor ku jetojnë shqiptarët. Do të zhvillojë një qasje më të decentralizuar dhe të shekullit 21 për mbledhjen e fondeve. GAF do të bazohet në Shtetet e Bashkuara dhe do të ofrojë një platformë të besueshme për donatorët shqiptarë, jo-shqiptarë dhe të Diasporës, për të mbështetur organizatat jofitimprurëse shqiptare bazuar në zgjedhjen e tyre. Aktualisht nuk ekziston një mekanizëm efektiv për të lehtësuar donacionin e bamirësisë shqiptare dhe kjo do të bëhet gjithnjë e më e rëndësishme, pasi paratë e donatorëve ndërkombëtarë për Shqipërinë, Kosovën, Maqedoninë dhe Malin e Zi për organizatat e shoqërisë civile ka gjasa të bien në të ardhmen.

Politiko.al: Para disa ditësh ju keni hapur edhe një fundraiser online me qëllimin e mbledhjes së 20 mijë USD. Për ç'qëllim?

Fundraiser-i në Facebook është i pari i këtij lloji në internet që ka për qëllim veçanërisht çështjet e Diasporës Shqiptare. Është themeluar për të mbështetur Germin në Kosovë, që është organizata kryesore shqiptare për angazhimin e Diasporës Globale Shqiptare. Germin do të bashkohet me Fondacionin e Shqiptarëve Global për promovimin e filantropisë së Diasporës shqiptare dhe ka shumë aktivitete të tjera, duke përfshirë Shkollën e Diasporës, programe për promovimin e votimit dhe të drejta të tjera qytetare për Diasporën dhe aktivitete që synojnë nxitjen e shkëmbimit profesional midis shqiptarëve anembanë botës. Ne shpresojmë që Germin të hapë një zyrë në Shqipëri në vitin 2019. Kushdo që do të donte të dinte më shumë dhe/ose të dhurojë për fundraiserin e Diasporës online, mund të klikojë këtu.

Politiko.al: Nëse do të flisnim për disa nga perspektivat afatshkurtra, afatmesme dhe afatgjata të GAF, cilat do të ishin ato?

Në vitin 2018 planifikojmë të finalizojmë themelimin ligjor të GAF-it, të formojmë një Bord të Drejtorëve, të zhvillojmë udhëzimet e përshtatshmërisë për organizatat jofitimprurëse shqiptare dhe të kryejmë dy anketime të hollësishme online - një për të kuptuar më mirë nevojat dhe objektivat e organizatave jofitimprurëse shqiptare, dhe një për të kuptuar më mirë qëllimet filantropike dhe potencialin e Diasporës shqiptare. Në periudhën afatmesme (2019-2020), qëllimi është të mbledhim mbi 1 milion dollarë për të paktën 100 organizata jofitimprurëse shqiptare që punojnë në një sërë çështjesh. Në planin afatgjatë (2020 dhe më tej), ne shpresojmë që GAF do të jetë një Fondacion mjaft i madh i mbështetur nga donatorë të vegjël dhe të mëdhenj individualë dhe biznesi në Diasporë, Shqipëri, Kosovë dhe gjetiu që do të jetë në gjendje të bashkohet me partnerët më të mëdhenj ndërkombëtarë bazuar mbi themelet për të promovuar përpjekje bamirëse kudo që jetojnë shqiptarët.

Politiko.al: Ju jeni një nga pjesëmarrësit e Samitit të Diasporës që është zhvilluar në Tiranë në vitin 2016. Ka patur një premtim për një takim tjetër të ngjashëm, a pritet të ndodhë?

Më kanë thënë se do të ketë një tjetër Samit të Diasporës në nëntor të vitit 2018, por asgjë zyrtare nuk është shpallur dhe merr shumë kohë për t'i planifikuar këto gjëra në mënyrë efektive. Personalisht, shpresoj që të ketë takim pune le të themi me 50-100 njerëz nga Diaspora, dhe jo një samit i madh me 1,000 njerëz, si ai në 2016.

Politiko.al: Cilat janë disa nga qëllimet e arritura nga Samiti i Diasporës dhe cilat kanë mbetur rrugës?

Suksesi kryesor i Samitit të Diasporës ishte se ai ndihmoi në lidhjen e shumë njerëzve dhe për të bërë më të dukshme çështjet lidhur me Diasporën. Megjithatë, realiteti është se qeveria e Shqipërisë ka patur zero interesim (follow up) që nga mbyllja e Samitit të parë. Me krijimin e Ministrisë së Diasporës në shtator 2017 gjërat janë përmirësuar, por mbetet shumë për t'u bërë. Ministria ka filluar të bëjë përparim në reformën ligjore dhe institucionale në lidhje me angazhimin e Diasporës, por ende duhet të krijojë kanale më efektive për bashkëpunim formal me diasporën shqiptare.

Politiko.al: Nëse Diaspora shqiptare në Amerikë duhet të ketë një qëllim afatgjatë cili do të ishte ai?

Sipas mendimit tim, qëllimi kryesor duhet të jetë krijimi dhe nxitja e shkëmbimeve më profesionale midis profesionistëve dhe sipërmarrësve shqiptarë kudo në botë. Në planin afatgjatë kjo do të ndihmojë, Shqipërinë, Kosovën, etj ... të zhvillohet më shpejt duke përfituar nga mendja dhe përvoja profesionale e Diasporës shqiptare në Shtetet e Bashkuara dhe gjetkë. Duke i bërë këto lidhje më të forta, do të sigurojë një bazë më të fortë për të nxitur iniciativat e tjera të Diasporës në kulturën, arsimin, filantropinë dhe votimin e diasporës dhe të drejtat politike. Fokusi i kaluar dhe i tashëm mbi Diasporën, e parë kryesisht si një burim investimi, është seriozisht i keqdrejtuar - vlera kryesore e Diasporës është eksperienca dhe njohuritë e saj - jo paratë e saj.