Udhëtimet nga Shqipëria, ambasada sqaron: Kush lejohet të udhëtojë drejt Greqisë pas 1 korrikut

Ambasada greke në Tiranë ka sqaruar nëse shqiptarët do të mund të hyjnë lirisht në Greqi pas datës 1 korrik, ashtu siç u lajmërua sot në media.

Në një reagim në rrjetet sociale ambasada greke në Tiranë shkruan se duke pasur parasysh udhëzimet evropiane për hapjen e kufijve të BE-së dhe vendimeve respektive zbatuese të Greqisë, parashikohet mundësia e realizimit të fluturimeve drejt aeroportit në Athinë nga Shqipëria.

Po ashtu sqarohet se nga 1 korriku nuk do të lejohet hyrja e personave nga Shqipëria në Greqi përmes linjave detare, rrugore apo hekurudhore.

Këtu përjashtohen disa kategori.

Së pari qytetarët grekë, poseduesit e kartës së veçantë të identitetit të homogjenit, ata që kanë leje qëndrimi, ata që kanë banesën kryesore në Greqi, kalimi i kamionëve për transport si dhe hyrja e personave nëpërmjet kufijve për punë dhe kjo duhet faktuar me dokumentet përkatëse.

Njoftimi i ambasadës greke:

Sipas udhëzimeve evropiane për hapjen e kufijve të BE-së dhe vendimeve respektive zbatuese të Greqisë (ΦΕΚ Β’ 2283/14.06.2020), në lidhje me udhëtimet nga Shqipëria për në Greqi, parashikohet mundësia e realizimit të fluturimeve drejt aeroportit Eleftherios Venizellos të Athinës. Nuk lejohet hyrja e personave nga Shqipëria për në Greqi permes linjave detare, rrugore apo hekurudhore.

Përjashtohen: a) Qytetarë Grekë, posedues të Kartës së Veçantë të Identitetit të Homogjenit, poseduesit e lejeve të qëndrimit, si dhe persona që kanë banesën kryesore të tyre apo që qëndrojnë zakonisht në Greqi, b) kalimi i kamionëve për transport mallrash, c) transporti i mallrave me anije, d) hyrja e personave nëpërmjet kufijve tokësorë, për lëvizje absolutisht të nevojshme të karakterit profesional, të cilat i faktojnë me dokumentat përkatëse.

Ky rregjim lëvizjesh pritet të vazhdojë të jetë në fuqi edhe pas datës 1 korrik. Ambasada e Greqisë në Tiranë do të lajmërojë menjëherë me njoftim të saj, për çdo ndryshim që mund të rezultojë.