Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Zgjedhjet në Itali, katër kandidatët që do të kërkojnë nesër postin e kryeministrit (Profilet dhe sondazhet)

Politiko 3 Mars 2018, 14:41

Zgjedhjet në Itali, katër kandidatët që do të

Italia do të zhvillojë nesër, më 4 mars, zgjedhjet e përgjithshme parlamentare ku në garë janë dy koalicionet e mëdha të udhëhequra nga Silvio Berlusconi dhe Matteo Renzi, si dhe dy parti të tjera që pritet të përcaktojnë garën, partia ‘Lëvizja 5 Yjet’ dhe partia ‘Të Lirë dhe të Barabartë’, raporton Politiko.al.

Të djathtët

Në koalicionin e djathë që drejtohet nga Berlusconi bëjnë pjesë katër parti kryesore: Forza Italia; Lega Nord; Fratelli d'Italia dhe Unione di Centro. Ky koalicion ka zgjedhur si kandidat për kryeministër, Antonio Tajanin, aktualisht presidenti i Parlamentit Europian.

Profil

Antonio Tajani, 63 vjeç, ka kryer studimet në liceun klasik “Torquato Tasso” në Romë, dhe është diplomuar për juridik në universitetin “La Sapienza”. Përveç gjuhës italiane, ai flet anglisht, spanjisht dhe frëngjisht.

Në qeverinë e parë të Berlusconit, Tajani ishte zëdhënës i kryeministrit, ndërsa karriera e tij në strukturat e Bashkimit Europian filloi në vitin 1994 ku u zgjodh deputet në Parlamentin Europian. Në shkurti të 2010-ës, u zgjodh zëvendës-President i Komisionit Europian dhe komisioner i Industrisë dhe Sipërmarrjes. Aktualisht mban postin e Presidentit të PE-së.

Të majtët

Koalicioni i majtë dominohet nga Partia Demokratike që drejtohet nga Matteo Renzi, por pjesë e tij janë edhe disa parti të tjera që pritet të marrin rezultate pozitive si ‘+Europa’ e Emma Boninos, apo ‘Civica Popolare’ dhe ‘Italia Europa Insieme’. Në këtë koalicion, si kandidat kryesor për kryeministër shihet Matteo Renzi, megjithatë, favorit shihen edhe kryeministri ende në detyre, Paolo Gentilioni, apo Emma Bonino, nëse partia e saj surprizon për mirë në zgjedhje.

Profil

Matteo Renzi ka lindur në qytetin e Firences në vitin 1975 dhe është diplomuar për juridik. Ai iu bashkua Partisë Popullore Italiane në vitin 1996 dhe u shndërrua në liderin provincial në 1999-n.

Në vitin 2009-të, Renzi u zgjodh kryebashkiak i Firences dhe në 2013-ën u zgjodh në krye të Partisë Demokratike. Një vit më vonë, Matteo Renzi kandidoi në zgjedhjet parlamentare dhe u zgjodh kryeministër i Italisë.

Postin e kryeministrit do e mbante deri në dhjetor të 2016-ës kur u dorëhoq pas humbjes në referendumin për ndryshimin e Kushtetutës së Italisë.

Lëvizja Pesë Yjet

Kjo parti e krijuar nga Beppe Grillo surprizoi Europën kur në zgjedhjet e 2013-ës arriti të siguronte 109 vende në Dhomën e Deputetëve. Në zgjedhjet e nesërme, ‘LPY’ do të hyjë e vetme, pa një koalicion. Kandidati për kryeministër është Luigi Di Maio.

Profil

30 vjeçari Luigi Di Maio, i lindur në Avellino në jug të vendit, do të kërkojë të bëhet nesër kryeministër i Italisë. Di Maio është nënkryetar i Dhomës së Deputetëve që prej marsit të 2013-ës, duke hyrë në histori si më i riu i emëruar ndonjëherë në atë post.

I diplomuar në Liceun Artistik, Di Maio ka ushtruar më parë profesionin e gazetarit dhe ka punuar si ëebmaster për t’i hyrë më pas politikës.

Luigi Di Maio bëri fushatë të fuqishme kundër referendumit të 2016-ës, që solli më pas edhe dorëheqjen e ish-kryeministrit Renzi. Tashmë, Di Maio do të kërkojë ta mposhtë Renzin në garën për kryeministër.

Të Lirë dhe të Barabartë

Ndonëse është krijuar në 3 dhjetor të 2017-ës, partia ‘Të Lirë dhe të Barabartë’ ka arritur të hyjë bindshëm në një pjesë të konsiderueshme të elektoratit italian dhe kjo për shkak të figurës së kryetarit të saj, Pietro Grasso. Ashtu si Lëvizja 5 Yjet edhe “LB” ka vendosur të hyjë e vetme në zgjedhje, ndërsa e konsideron veten si parti të majtë.

Profil

Pietro Grasso është një figurë shumë e njohur dhe e respektuar në Itali. Ai ka lindur në vitin 1945 në Licata të Siçilisë dhe më pas ka jetuar në Palermo.

Ai u zgjodh gjyqtar në gjyqin e parë kundër mafies siciliane në 1986-1987 ku u morën të pandehur 475 persona. Gjyqi përfundoi me 19 burgime të përjetshme dhe me mbi 2600 vite heqje lirie për të dënuarit.

Në disa procese, ai ishte bashkëpunëtor i Giovanni Falcone dhe Paolo Borsellino.

Në vitin 2005 u zgjodh në krye të Drejtorisë Kombëtare të Animafies, post që e mbajti deri në vitin 2012.

Karriera e tij politike fillon në vitin 2013-të, kur u zgjodh pjesë e Senatit italian me Partinë Demokratike. Në po të njëjtin vit ai emërohet President i Senatit, post që e mban ende.

Më 14 janar të 2015-ës, me dorëheqjen e presidentit të Republikës, Giorgio Napolitano, Grasso mbajti përkohësisht postin e kryetarit të shtetit, deri më 3 shkurt, kur Sergio Mattarella u zgjodh pasues i Napolitanos.

Sondazhet

Sipas sondazheve të publikuara ditët e fundit, koalicioni i djathtë i udhëhequr nga Silvio Berlusconi rezulton se do të fitojë numrin më të madh të deputetëve, 283 të tillë. Megjithatë, ky numër nuk është i mjaftueshëm për të siguruar një mazhorancë absolute pasi nevojiten 316 mandate.

Koalicoini i majtë i Matteo Renzit parashikohet të sigurojë 158 mandate, vetëm gjashtë më shumë se Lëvizja 5 Yjet e Beppe Grillos, që parashikohet të arrijë në 152 mandate. 37 mandatet e mbetura do të ndahen midis partisë ‘Të Lirë dhe të Barabartë’ dhe partive të tjera të vogla.

Mbështetja në kategoritë sociale

Pensionistët: 35.3% për koalicionin e majtë; 34.7% për koalicionin e djathtë; 20.9% për Lëvizjen 5 Yjet; 9.1% për “LB” dhe partitë e tjera.

Studentët: 29.8% për koalicionin e majtë; 28.4% për koalicionin e djathtë; 28.3% për ‘L5Y’; 13.5% për ‘LB’ dhe partitë e tjera.

Sipërmarrësit: 34.2% për koalicionin e djathtë; 28.2% për ‘L5Y’; 28% për koalicionin e majtë; 9.6% për ‘LB’ dhe partitë e tjera.

Punëtorët e krahut: 33% për ‘L5Y’; 31.4% për koalicionin e djathtë; 26.2% për koalicionin e majtë; 9.4% për ‘LB’ dhe partitë e tjera.

Punonjësit e administratës dhe profesionistët: 40.6% për ‘L5Y’; 37.8% për koalicionin e djathtë; 17.4% për koalicionin e majtë; 4.2% për ‘LB’ dhe partitë e tjera.

Politiko.al