Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Zvicra, Norvegjia & UNDP: 30 respiratorë për të ndihmuar Shqipërinë me COVID-19

Politiko 11 Prill 2020, 07:44

Zvicra, Norvegjia & UNDP: 30 respiratorë për të ndihmuar

Tiranë - Një marrëveshje e përbashkët partneriteti u nënshkrua dje virtualisht midis Ministrisë së Shëndetësisë dhe Mbrojtjes Sociale, Ambasadës së Zvicrës, Ambasadës Mbretërore të Norvegjisë për Shqipërinë, dhe UNDP. Sipas një komunikate për shtyp të Ambasadës Zvicerane marrëveshja thekson mbështetjen ndaj autoriteteve të shëndetësisë në Shqipëri për të luftuar COVID-19 përmes blerjes së 30 respiratorëve.

Ky kontribut plotëson angazhimin e qeverisë shqiptare për rritjen e kapaciteteve dhe sigurimin e një numri të mjaftueshëm të makinerive jetë-shpëtuese për trajtimin e pacientëve të COVID-19 në terapi intensive, thuhet po aty.

Qeveria zvicerane dhuron 330,000 USD, qeveria norvegjeze përafërsisht 300,000 USD, dhe UNDP 100,000 USD. Të 30 respiratorët pritet të arrijnë në Shqipëri në dy javët e ardhshme dhe do t’i dorëzohen Ministrisë së Shëndetësisë dhe Mbrojtjes Sociale, shton njoftimi.

“Qeveria shqiptare është plotësisht e angazhuar me rritjen e kapaciteteve ne luftën kundër COVID-19. Në këtë situatë po perballemi me më shumë të panjohura sesa të njohura dhe e vetmja mënyrë për t’u përballur me këtë armik të padukshëm është të bashkojmë forcat. Ndaj, mbështetja juaj me pajisjet jetë-shpëtuese në këto ditë të vështira në përballjen me COVID19 është shumë e rëndësishme për forcimin e kapaciteteve të sistemin shëndetësor publik në Shqipëri”, theksoi Ministrja e Shëndetësisë dhe Mbrojtjes Sociale Ogerta Manastirliu.

“Qeveria e Shqipërisë përcaktoi që një nga nevojat kryesore në menaxhimin e krizës së koronavirusit ishte sigurimi i makinave respiratore. Këto makina bëjnë diferencën midis jetës dhe vdekjes për shumë njerëz. Për ne është kënaqësi që mundëm t’i përgjigjemi shpejt kërkesës tuaj dhe të kontribuojmë së bashku për blerjen e 30 respiratorëve shtesë për spitalet e Shqipërisë”, tha Ambasadori zviceran Adrian Maître.

Ambasadori i Norvegjisë për Shqipërinë, Jens Erik Grondahl theksoi: “Në një kohë shumë të vështirë, e cila po i rëndon shumë shërbimet e shëndetit publik, është e nevojshme të tregojmë solidaritet dhe të bëjmë cfarë kemi mundësi për të ndihmuar njëri-tjetrin dhe për të forcuar përpjekjet tona të përbashkëta në mundjen e pandemisë. Për këtë arsye, Norvegjia është krenare që mbështet përpjekjet kombëtare të Shqipërisë kundër pandemisë COVID-19 duke siguruar fonde për blerjen e menjëhershme të respiratorëve në një partneritet të pa-precedentë me Qeverinë Shqiptare, Zvicrën dhe UNDP.”

“Në këtë kohë të paprecedentë, UNDP qëndron në krah të Shqipërisë”, tha Përfaqësuesja e Përhershme në Shqipëri e UNDP, Limya Eltayeb. “Kjo nismë demonstron fuqinë e partneriteteve për të ndihmuar shtetet të adresojnë shqetësime kritike shëndetësore në mes të pandemisë globale. Jemi të lumtur të bashkojmë forcat me Qeverinë Zvicerane dhe atë Norvegjeze për t’u ardhur në ndihmë autoriteteve shëndetësore me pajisje kritike të emergjencave mjekësore të cilat mund të shpëtojnë jetë njerëzish”.