Dyshimet për mpiksje gjaku, pas Gjermanisë, vaksina AstraZeneka pezullohet edhe nga Franca e Italia

Disa shtete kanë pezulluar përdorimin e vaksinës anti-Covid të AstraZeneca-s për shkak të dyshimeve se shkakton mpiksje të gjakut te disa njerëz pas vaksinimit. Gjermania, Italia dhe Franca u bënë vendet e fundit që ndaluan përdorimin e vaksinës të hënën si një masë paraprake.

Agjencia Evropiane e Barnave (EMA) të martën pritet të japë udhëzime shëndetësore rreth vaksinës. Nëse EMA jep dritën jeshile, Franca dhe ndoshta disa kombe të tjera evropiane do të heqin masën e ndalimit për vaksinën.

Vaksina e AstraZeneca u miratua për përdorim në BE në fund të janarit. Megjithatë, që nga ajo kohë, vaksina ka hasur në vështirësi të shumta.

BE para-porositi 400 milionë doza të vaksinës me dy faza, por AstraZeneca u detyrua të ulte shumë vlerësimet e dërgesave për shkak të problemeve të prodhimit.

Ka pasur gjithashtu shqetësime në lidhje me efikasitetin e vaksinës tek njerëzit mbi 65 vjeç për shkak të mungesës së të dhënave klinike për njerëzit e moshuar.

Ku po pezullohet AstraZeneca dhe pse?

Problemi i fundit i AstraZeneca filloi javën e kaluar kur autoritetet shëndetësore daneze pezulluan përdorimin si një masë "parandaluese" pasi një grua 60-vjeçare vdiq nga mpiksja e gjakut pas vaksinimit.

Agjencia Daneze e Barnave tha në një deklaratë të hënën se gratë kishin "simptoma shumë të pazakonta" duke përfshirë një numër të ulët të trombociteve të gjakut dhe mpiksjeve në enët e vogla dhe të mëdha të gjakut.

Vendet e tjera shpejt ndoqën Danimarkën në ndalimin e përdorimit.

Norvegjia, një nga vendet e para që ndoqi pezullimin e Danimarkës, tha të shtunën se tre persona nën moshën 50 vjeç po trajtoheshin në spital me simptoma të ngjashme pasi morën vaksinën.

Të Dielën vonë, Hollanda po ashtu pezulloi përdorimin e vaksinës.

Të hënën, një raport nga një mbikëqyrës holandez i farmacisë tha se 10 raporte të efekteve anësore përfshinin raste të mpiksjes së mundshme të gjakut dhe embolizmave.

Islanda, Irlanda dhe Bullgaria gjithashtu kanë pezulluar përdorimin.

Austria ndaloi përdorimin e dozave nga një seri AstraZeneca javën e kaluar pasi një grua vdiq pas vaksinimit.

Estonia, Lativa, Lituania, Luksemburgu dhe Rumania kanë ndaluar përdorimin nga e njëjta seri prej 1 milion dozash të dërguara në 17 vende të BE.

Jashtë Evropës, Tajlanda pezulloi përdorimin përpara se të njoftojë vaksinimet. India ka administruar mbi 28 milion doza të vaksinës AstraZeneca, e cila prodhohet nga Instituti Serum i Indisë me emrin Covishield.