"Sulmi me mitraloz zgjati 3 minuta", zbardhen detaje nga vrasja e shkencëtarit bërthamor iranian: E qëlluan me automatik të telekomanduar

Shkencëtari bërthamor iranian i vrarë të premten në lindje të Teheranit u qëllua nga një mitraloz me telekomandë që funksiononte nga një makinë tjetër, raporton agjencia gjysmë zyrtare Fars News.

Zyrtarët e lartë iranianë që fajësojnë Izraelin për vrasjen e shkencëtarit Mohsen Fakhrizadeh, ndërkaq lideri suprem Ajatollah Seyyed Ali Khamenei ka premtuar hakmarrje.

Megjithatë, gjatë raportimeve agjencitë iraniane të lajmeve kanë shpërndar informacione kontradiktore rreth mënyrës se si u zhvillua sulmi.

Një raport i botuar të dielën nga Fars News tha se Fakhrizadeh po udhëtonte me gruan e tij këtë të premte në një makinë të papërshkueshme nga plumbat, së bashku me tre automjete të personelit të sigurisë.

Kur dëgjoi se çfarë tingëllonte si plumba që godisnin një automjet dhe ai doli nga makina për të përcaktuar se çfarë kishte ndodhur.

Ndërkohë që doli nga automjeti, një automatik me telekomandë hapi zjarr nga një Nissan i ndaluar rreth 150 metra nga makina e Fakhrizadeh, duke e goditur atë të paktën 3 herë. Nga të shtënat është qëlluar edhe truproja i tij. Pak pas sulmit i cili zgjati 3 minuta, Nissan shpërtheu, njofton Fars Neës.

Më tej, një tjetër agjenci lajmesh, ISNA, bazuar në deklaratën e Ministrit të Mbrojtjes iraniane, raportoi se makina e Fakhrizadeh u godit nga të shtënat me armë, e ndjekur nga një shpërthim dhe më shumë zjarr.

"Bazuar në raportet e marra nga anëtarët e detajeve të tij të sigurisë, automjeti i Z. Fakhrizadeh fillimisht u shënjestrua nga të shtënat me armë, pas së cilës një automjet Nissan i ngarkuar me eksploziv u nis në afërsi të tyre pasi të shtënat me armë, duke synuar automjetin e tyre, po vazhdonte", tha Hatami, sipas ISNA.

IRIB, televizioni shtetëror iranian, tha se shpërthimi ndodhi i pari, duke u pasuar me të shtënat me armë nga sulmuesit.

Seyed Kamal Kharrazi, kreu i Këshillit Strategjik të Iranit për Marrëdhëniet e Jashtme, e krahasoi situatën me vrasjen e Qasem Soleimani, njoftoi të dielën agjencia shtetërore e lajmeve e Republikës Islamike. Soleimani, udhëheqësi i Forcës Quds të Trupave të Gardës Revolucionare Islamike, u vra në një sulm me dron amerikan në fillim të këtij viti në Irak.

 “Padyshim, Republika Islamike e Iranit do t'u japë një përgjigje të llogaritur dhe vendimtare kriminelëve që morën Fakhrizadeh”, tha Kharrazi.

Fakhrizadeh ishte kreu i qendrës kërkimore të teknologjisë së re në elitën e Gardave Revolucionare dhe ishte një figurë kryesore në programin bërthamor të Iranit.

Në raportin e saj, CNN shkruan se nuk mund të konfirmojë në mënyrë të pavarur versionin e ngjarjeve të agjencisë së lajmeve.

Udhëheqësit iranianë fajësojnë Izraelin

Udhëheqësi Suprem Khameini përmes një deklarate zyrtare bëri me dije se, "Z. Mohsen Fakhrizadeh u vra nga armiqtë shtypës. Kjo mendje e rrallë shkencore dha jetën për punën e tij të madhe të përjetshme shkencore. Ai humbi jetën për Zotin dhe supremin udhëheqës".

Ministri i Jashtëm iranian Mohammad Javad Zarif i bëri thirrje komunitetit ndërkombëtar "t'i japë fund standardeve të tyre të dyfishta të turpshme" dhe "të dënojë këtë akt të terrorit shtetëror". Ai shtoi se sulmi tregoi "indikacione serioze të rolit izraelit".

Këshilltari ushtarak i Khamenei, Gjeneral Majori Hussein Dehghan, shkroi në twitter se "Sionistët" po kërkojnë të krijojnë "luftë të gjithanshme" dhe u zotuan të "zbresin si vetëtima" mbi vrasësit e Fakhrizadeh.

Presidenti Hassan Rouhani, gjithashtu në mesin e shumë udhëheqësve iranianë që fajësojnë Izraelin, premtoi gjithashtu hakmarrje, duke thënë gjatë një takimi të kabinetit të shtunën se, "Orkestruesit e këtij sulmi dhe armiqtë e Iranit duhet ta dinë se kombi iranian dhe zyrtarët e ngarkuar në vend janë të guximshëm dhe të vendosur për t'iu përgjigjur vrasjes me kohë ".

Vrasja, tha ai, u krye me "duart e ndyra të shtypësve, në bashkëpunim me regjimin e paligjshëm Sionist". Irani nuk ka dhënë asnjë provë të përfshirjes së Izraelit. Zyra e Kryeministrit izraelit Benjamin Netanyahu nuk pranoi të komentojë për CNN të premten.

Ministri izraelit i Çështjeve të Zgjidhjes, Tzachi Hanegbi, tha për televizionin e lajmeve izraelit Kanal 12 se ai "nuk kishte ide" se kush vrau Fakhrizadeh, por e quajti atë "shumë të turpshme për Iranin".

Departamenti i Shtetit në SHBA dhe Agjencia Ndërkombëtare e Energjisë Atomike kanë thënë në raporte të shumta se Fakhrizadeh kishte depërtuar thellë dhe kishte detaje të kapacitetit atomik të  Republikës Islamike. Në vitin 2018, Netanyahu tha se Fakhrizadeh ishte kreu i Projektit ‘Amad’, të cilin ai dhe të tjerët e përshkruajnë si një përpjekje të fshehtë të armëve bërthamore. "Mos harroni atë emër, Fakhrizadeh," u tha kryeministri gazetarëve në atë kohë.

Protestat në Teheran

Vrasja e shkencëtarit iranian ndërlikon me tej marrëdhëniet Teheran-Uashington, të cilat janë përkeqësuar nën udhëheqjen e Presidentit të SHBA-së, Donald Trump. Në vitin 2018, Trump u tërhoq nga një marrëveshje bërthamore shumëpalëshe me Iranin.

Ndërkaq, Irani filloi të tërhiqte angazhimet e tij nga Plani i Përbashkët i Përgjithshëm i Veprimit 2015 vitin e kaluar. Në këtë perjudhë Trump kërkoi vendosjen e sanksioneve ekonomike.

Me vrasjen e shkencëtarit iranian, Fakhrizadeh, Shtëpia e Bardhë po monitoron nga afër situatën. Të premten, Trump ritweetoi gazetarin izraelit Yossi Melman, i cili shkroi se Fakhrizadeh "ishte shefi i programit sekret ushtarak të Iranit dhe i kërkuar për shumë vite nga Mossad", agjencia e inteligjencës së huaj të Izraelit.

Studentët dhe të tjetër të rinj iranian u mblodhën pranë disa ndërtesave qeveritare në Teheran dhe në një demonstratë të shtunën. Protestuesit dogjën flamuj të SHBA dhe Izraelit dhe postera që përshkruanin Trump dhe Presidentin e zgjedhur Joe Biden.

Bashkimi Evropian dënoi vrasjen dhe bëri thirrje për "përmbajtje maksimale", ndërsa Zyra e Jashtme e Mbretërisë së Bashkuar tha se "po përpiqej urgjentisht të vërtetonte faktet".

Ceremonia e përcjelljes dhe më pas varrimi i shkencëtarit Fakhrizadeh do të mbahen të hënën, njoftoi Fars News. Eshtrat e Fakhrizadeh u dërguan në faltoren e Imam Reza, një nga qendrat më të rëndësishme fetare për Shiat, në Mashhad të shtunën. Pas një shërbimi të së dielës në Mashhad, trupi i tij duhej të çohej në Teheran në varrin e Ajatollah Khomeini, themeluesi i republikës Islamike.