Rama prezanton 3 prioritetet për Policinë e Shtetit, kritika dhe paralajmërime: Ministrat s'kanë më fuqi

Kryeministri Edi Rama ka prezantuar tre prioritetet për Policinë e Shtetit. Në aktivitetin, ku mori pjesë sot, ai foli për objektivat që janë lufta ndaj krimit, rritja e nivelit të sigurisë rrugore dhe rritja e standardeve të shërbimit ndaj qytetarëve.

“Së pari lufta kundër krimit është prioriteti i prioriteteve, përfshirë të gjithë aspektet e saj dhe është një front ku është bërë progres i dukshëm ku ka ende shumë për të bërë.

Posacërisht ndihet ende mungesa e të njëjtëve efikasitet si psh ka pasur operacioni forca e ligjit apo në tërësi kjo pjesë e organizimit policor tek lufta kundër krimit financiar.

Prioriteti i dytë jo me më pak rëndësi është ngritja në një nivel sigurie më të lartë e gjithë qarkullimit rrugor në Shqipëri.

Paralelisht vendosja e një kontrolli absolut mbi territor jo vetëm në aspektin e veprimtarisë kriminale apo shkeljes së ligjit për cënim personi por dhe me shkeljet për vetë Shqipërinë.

Prioriteti tjeter është rritja e standarteve të shërbimeve ndaj qytetarëve”, tha Rama.

Ky i fundit e ka cilësuar të patolerueshëm krimin mjedisor "në sy" të policisë. Rama theksoi se dënimi për personat që kryejnë krime mjedisore është rritur dhe do të përballen me arrestime e jo me gjoba

"Policia e Shtetit është përgjegjëse t'i identifikojë jo vetëm vendndodhjet e këtyre skenave të krimit por edhe të marrë masa. Është e patolerueshme që në pyllin e sodës të mbyllet një sipërfaqe me 3000 metra katrorë zhavorr dhe policia as të mos shikojë, as të mos dëgjojë asgjë, është e patolerushme të hidhet zhavor për të krijuar platformë pa leje në plazhe dhe askush të mos bëjë asgjë. Goditja e ligjit për ata që i bëjnë këto krime është rënduar. Nuk ka më gjobë, por arrest dhe shkon përpara drejtësisë", tha Rama.

Ky i fundit paralajmëroi se rekrutimet në Policinë e Shtetit do të bëhen vetën në bazën e meritës. Ai tha se partia, ministrat apo deputetët s'do të kenë fuqi të bëjnë më "qoka".

"Rekrutimi në Policinë e Shtetit tashmë kalon vetëm përmes rrugës së meritës. Tani është qe qartë se partia në pushtet, ministrat e saj, deputetët e saj nuk kanë më asnjë fuqi që të fusin një njeri në polici thjesht për hatër", u shpreh shefi i qeverisë.

Një tjetër vendim që u paralajmërua nga Rama, ishte ulja e moshës e Policisë së Shtetit. Kryeministri tha se policët më të vjetër në moshë do të transferohen tek "Illyrian Guard"

"Është ulur mosha e Policisë së Shtetit, por duhet ulur edhe më shumë. Duhet rishikuar raporti mes policisë së shtetit dhe "Illyrian Guard" duke vendosur në dispozicion të tyre bashkëpunim që në një moshë të caktuar efektivët pa e humbur statusin të spostohen për të bërë një punë më të lehtë në Illyrian Guard në varësi të Ministrisë së Brendshme", tha Rama.