Skandali i të dhënave/ Rama 'sulmon' opozitën: S'ka dorëheqje. Është përdorur nga bravaxhinjtë

Kryeministri Edi Rama së bashku me drejtoreshën e Agjencisë Kombëtare të Shoqërisë së Informacionit, Linda Karçanaj dolën në një konferencë për mediat pas publikimit të skandalit me të dhënat e qytetarëve.

Ky skandal shkaktoi reagim të gjerë në opinionin publik, ndërsa Rama tha prerë se nuk do të ketë asnjë dorëheqje lidhur me këtë rast. Ai i kërkoi prokurorisë të hetonte, duke marrë në pyetje punonjësit që kanë akses në sistem.

Kryeministri e cilësoi si skandal të qëllimshëm për të nxitur destabilizim dhe konfuzion, ndërsa nuk nguroi të sulmonte opozitën. Rama tentoi "të lante duart" dhe tha se skandale të tilla ndodhin në shume vende të botës.

“Që të jemi shumë të qartë, SHBA-së i dolën në rrugë të gjitha sekretet, nuk di të ketë pasur ndonjë dorëheqje. Kështu që tjetër është kur gjërat ndodhin si rezultat i një dështimi të sistemit ose si rezultat i një vepre sikur ishte rasti i të ndjerit Klodian Rasha dhe komplet tjetër kur gjendemi përpara sulmeve.

Dhe në të gjitha rastet, ka plot, as nuk ka ndodhur dhe nuk kam kërkuar t’i kërkohet ndonjërit dorëheqje, vetëm këtu është kjo dhe AKSHI nuk ka lidhje, është si t’i kërkosh dorëheqjen ministrit të Bujqësisë, sepse e-Albania nuk ka lidhje me sistemin e Tatimeve, sepse sistemi i tatimeve është tjetër dhe e-Albania është komplet tjetër”, u shpreh kryeministri.

Ky i fundit ngriti pikëpyetje se pse databaze për publikimin e pagave të shqiptarëve është bërë tani. Rama shtoi se kjo bazë e të dhënave ka dalë edhe pak muaj më parë në tiktok, por nuk u përdor.

"Kjo bazë ka dalë në një tiktok përpara shumë muajsh, nuk është përdorur. Është përdorur tani? Ca është kjo? Pse përdoret tani dhe pse zëdhënës të grata non grata-ve që kërkojnë grata dhe vinci paralajmërojnë të tjera. Pse dhe si?

Është përdorur për të krijuar konfuzion dhe për të nxitur armiqësi mes njerëzve. T’ja bësh këtë njerëzve se je bërë xheloz që ke mbetur jashtë bravës dhe çelsit, apo për të futur çelësin në bravë, është një mundësi për t’i treguar njerëzve se deri ku mund të shkojnë bravaxhinjtë, çelsaxhinjtë. Nuk dua të spekuloj, se nuk dua të bëj të njëjtën gjë që bëjnë ata që bëjnë aktin kriminal, marrin edhe kriminelin dhe e asociojnë me qeverinë”, tha Rama.

Ndërsa Karçanaj u shpreh se e-Albania është një sistem i sigurt, duke iu këkruar qytetarëve të mos kenë dyshime. Ajo shprehu bindjen se përgjegjësi i këtij skandali do të identifikohet.

“E kam shumë të rëndësishme të sqaroj qytetarët se e-Albania është një sistem i sigurt, ta përdorin në mënyrë të sigurt sistemin. Platforma mirëmbahet nga Microsoft duke mundësuar një siguri të plotë të informacionit aty", tha drejtoresha e AKSH-it.