“Arsyeja pse humbëm në 25 prill”, ç’deklaronte Shehaj për djegien e mandateve: Po i dorëzojmë, u faktua mega korrupsioni

“Mendoj se është e pamohueshme blerja masive e votave. Por besoj që djegia e mandateve dhe mospjesëmarrja në zgjedhjet lokale, janë arsyet përse humbëm zgjedhjet e 25 prillit”, tha Agron Shehaj pasditen e së hënës në një dalje për mediat, një ditë pasi u zyrtarizua kandidatura e tij për kryetar të PD.

Ndër të tjera, Shehaj artikuloi qëndrime të forta ndaj kryedemokratit Basha, kur tha se me Bashën në krye, PD nuk mund të fitojë ndaj qeverisë Rama.

Por, çfarë deklaronte Shehaj dy vite më parë, kur opozita dogji në bllok mandatet.

Në një replikë me zv.kryeministrin Erion Braçe, pas deklaratës së këtij të fundit se “Vetëdjegia buron nga dëshpërimi i madh”, Shehaj shkruan në Facebook se po dorezohen mandatet sepse u faktua mega korrupsioni prej 30 milionë eurosh dhe dolën përgjimet e blerjes së votave.

“Po dorëzojmë mandatet sepse u faktua mega korrupsioni prej 30 milionë eurosh dhe dolën përgjimet e blerjes së votave. Por askush nuk u arrestua.

Rama, Gjiknuri, Dako, Sejdini, Balla, Ahmetaj dhe gjithe kupola e PS-se është e lidhur me krimin dhe e zhytur nelë korrupsion. Nxjerrja e tyre para drejtesise është prova e SPAK-ut.

Braçe duhet të shqetësohet për shokët dhe për partinë e tij qe do përfundojnë keq. Sa për ne demokratët, tashmë jemi pa imunitet!”, shkruante Shehaj në 18 shkurt 2019.

I ftuar në Syri tv, Shehaj u pyet për qëndrimet e kundërta, por deklaroi se nuk mund të kundërshtonte qëndrimin e PD, në kushtet kur ky vendim nuk kishte kaluar në votim.

‘Unë mendova në atë kohë që nuk mund të dilja kundër qëndrimit të PD. S’kam asnjë siklet, asgjë ta pranoj. Nuk besoj që demokratët në vitin 2019 do ishin të lumtur që unë të dilja kundër PD në këtë qëndrim, për një vendim që unë mendoja që nuk isha i bindur.

Qëndrimet në PD janë shumë kundër dhe do të ishit shumë naivë që të mendoni ndryshe. Brenda PD ka shumë mendime.

Po të votohej atë ditë ndoshta, sepse nuk është votuar, është marrë një vendim. Si mund të më bëni moralin mua, kur vendimi ishte marrë.’