Denoncimi/ Balluku u kap në përgjim për ryshfet, Rama e shpërbleu me postin e zëvendëskryeministres

Kryedemokrati Sali Berisha në një konferencë nga sealia blu, është shprehur se ministra e Energjisë dhe Infrastrukturës, Belinda Balluku  është përgjuar në një bisedë telefonike ku i ka kërkuar një biznesmeni një shumë të majme për një tender.

Sipas qytetarit dixhital, shprehet Berisha,  ky regjistrim i është dërguar kryeministrit Edi Ramës, nëpërmjet Ergys Agasit.

“Qytetari dixhital sot është para jush me informacionin shumë të rëndësishëm.Qytetari dixhital informon se Lubi Balluku lakohet shumë në bisedën telefonike të një biznesmeni me një person tjetër.

Lakohet për një tender, në të cilin Lubi Balluku, sipas biznesmenit, ka kërkuar një përqindje të majme për të akorduar tenderin.

Sipas qytetarit dixhital, ky regjistrim i është dërguar kreut të organizatës kriminale, Edi Rama, nëpërmjet famozit Ergys Agasi.”

Qytetari dixhital shpret se ky regjistrim ka arritur në zyrën e Ramës dy javë më parë, mirëpo kjo nuk e ka penguar kryeministrin që të emërojë atë zëvendëskryeministre.

“Mënyra se si është bërë regjistrimi, nuk kam të dhëna nga qytetari dixhital. Por ai pohon dhe insiston se ky regjistrim është dërguar dy javë më parë në zyrën e Edi Ramës.

Natyrisht ky regjistrim nuk e ka penguar Edi Ramën të emërojë atë zëvendëskryeministre, pasi me Lubinë e lidhin aferat e tmerrshme korruptive.

E lidh tuneli i Llogarasë, në të cilin del se kanë futur në xhep jo 50 milionë, por 90 milionë euro.

E lidh bllokimi i supervizimit të ndërtimit të djegësit të Tiranës nga drejtoria që varej direkt nga Lubi Tuneli, dhe meqë Rama ishte përfituesi kryesor i 130 milionë eurove të zhdukura, kjo nuk ka dorëzuar qoftë një raport të vetëm të mbikëqyrjes, që është detyra me kontratë, të ndërtimit të djegësit, duke besuar se do lante duart me krimin e saj të shëmtuar dhe do fajësonte Erion Veliajn.

Theksoj këtu se Erion Veliaj në këtë çështjen e supervizimit është po aq fajtor sa vetë Lubia, pra janë bashkëfajtorë, sepse edhe ky ka pasur zotim me shkrim që do ta mbikëqyrë. Por, as njëri, as tjetri nuk janë marrë me të.”

Berisha vijoj më tej duke thënë se qytetarët duhet ta dinë se dyshja Rama-Balluku vjedhjet më kolosale i kanë bërë në fushën e energjisë.

Ata  kanë zbrazur digat, shprehet Berisha duke ua shitur operatorëve të tyre në Shqipëri, kompanive me çmime qesharake, 40 euro.

“Qytetarët duhet ta dinë se dyshja Rama-Balluku vjedhjet më kolosale i kanë bërë në fushën e energjisë. Vjedhjet e tyre, që kapin qiellin në energji, shqetësuan shumë institucionet ndërkombëtarë.

Arriti problemi, në mënyrë të përsëritur digat, rezerva e artë energjetike e Shqipërisë, në kuptimin që Shqipëria mund të depozitojë në digat e liqenit të Vaut të Dejës, Komanit dhe Fierzës, sasi kolosale, qindra milionë euro energji, të cilat në ligjin e interesit publik të shqiptarëve, duhet t’i ruajë për kohërat kur çmimi i energjisë shkon në maksimum.

Lubia me Edi Ramën kanë zbrazur digat, duke ua shitur operatorëve të tyre në Shqipëri, kompanive me çmime qesharake, 40 euro. Dhe këto, duke ua shitur kompanive të huaja me çmim 140 euro.

Dhe kjo si pasojë, duke blerë Shqipëria për shkak të zbrazjes së energjisë, në pikun e konsumit të energjisë me 200 dhe 300 euro megavatin.”