Denoncimi për provimin vlerësues/ Kushi paralajmëroi padi, reagon Vokshi: Shihemi në gjykatë!

Deputetja demokrate Albana Vokshi ka reaguar pas deklaratës së ministres Evis Kushi, e cila paralajmëroi padi ndaj saj.

Vokshi shkruan në Facebook, se e mirëpret ftesën e Kushit për t’u paraqitur në gjykatë duke theksuar se ministrja “merr në mbrojtje shkelësit e ligjit e më kërcënon me padi në gjykatë”.

Vokshi denoncoi skandalin me provimin Vlerësues Parauniversitar, ku sipas saj përgjigjet bëhen publike me qëllim favorizimin e militantëve të partisë. Ministrja kërkoi nga deputetja demokrate që të bënte publike akuzat ose në të kundërt do të depozitonte padi në gjykatë.

Postimi i plotë:

Në vend që të kërkojë ndjesë mësuesve e të marrë masat për këdo që ka nxjerrë tezat e provimit në emër të saj, Ministrja e Arsimit, Evis Kushi, merr në mbrojtje shkelësit e ligjit e më kërcënon me padi në gjykatë.

E mirëpres padinë e Ministres Kushi, do ishte e pesta në rradhë pas padive të Edi Ramës, Erjon Veliajt, Taulant Ballës…

Znj. Ministre, mësues të ndershëm, të cilëve ju dhimbset arsimi denoncuan një veprim skandaloz që duhej ndalur. Kishit rastin të distancoheshit nga ai, duke i kërkuar ndjesë cdo mësuesi që hyn në këtë provim e duke vënë para përgjegjësisë cdokënd që shkel ligjet, procedurat e rrjedhimisht edhe barazinë në një test të tillë të rëndësishëm duke favorizuar militantë partie, miq, patronazhistë etj etj.

Ju zgjodhët të mbronit shkelësit e abuzuesit e jo mësuesit.

Zgjodha të mos i publikoj tezat me shpresën e një reagimi ndryshe nga ana juaj.

Por tani jam e gatshme t’i dorëzoj ato në gjykatë.

Shihemi në gjykatë Evis Kushi.