“Djegia” e Parlamentit, 7 fakte që e certifikojnë aksionin opozitar si efektiv

Politiko.al

Radikaliteti i aksionit opozitar në Parlament ka qenë ngjarja kryesore e politikës së ditës gjatë javëve të fundit. Ka nga ata që e mbështesin, siç ka të tjerë që e quajnë të pafrytshëm. Studiot televizive jane të ndara edhe në këtë temë, me kritikët e aksionit opozitar që ndalen te fakti se, mirë rrëmujë po bëhet, por opozita nuk po e ndalon dot qeveirnë në miratimin e ligjeve. Përtej qëndrime ‘pro’ apo ‘kundra’ janë 7 fakte që përcaktojnë se opozita ia ka dalë të grumbullojë kredite politike në radikalitetin e shtuar në Parlamentin e Shqipërisë.

Qeveria nuk kontrollon 'territorin'

Një prej kushteve të ekzistencës së një qeverisjeje solide është kontrolli mbi territorin. Mungesa e këtij kontrolli dëshmon për një qeveri jo efikase, me një pjesë të legjitimitetit të humbur, apo të paktën të kushtëzuar. Me ‘kontroll territori’ duhet kuptuar si pamundësia, për shembull, e organeve ligjzbatuese për një prani në një pjesë të vendit- sado e vogël qoftë ajo- ashtu dhe pamundësia për të qenë efikas në parandalimin e aktivitetit kriminal eksponencial. Në këtë kuptim, Kuvendi është territori më i dukshëm i Republikës dhe qartësisht, edhe pse ka shtuar praninë fizike të policimit, qeveria nuk ia del ta bëjë zap opozitën e cila ka në agjendë bllokimin e funksionimit normal të punimeve.

Parlamenti është qesharakëzuar

Përcaktimi që opozita i ka bërë kursit të punimeve të Kuvendit, duke i detyruar deputetët e mazhorancës të operojnë si në kushte lufte apo pandemie, e qesharakëzon qeverinë, për faktin se, nuk jemi në kushte lufte apo pandemie. Futja në ilegalitet e aktiviteteve parlamentare, që funksionojnë pikërisht për të theksuar legalitetin, kthejnë shumicën qeverisëse në një aparat disfunksional që mund të çojë përpara punët, por nuk ekziston më si simbolikë e shtetit.

Parlamenti është jofunksional

Prania e shtuar e Gardës, apo thirrja e policisë dhe SPAK në mjediset e Kuvendit, e kthen ndërtesën dhe simbolikën e institucionit të ligjbërjes në Shqipëri në një kullë boshe. Ky disfunksionalitet lidhet sidomos me kohëzgjatjen e seancave parlamentare. Një prej cilësive kryesore të parlamentarizmit është ai që quhet deliberation (një ravgim apo debat) mbi çështjet. Për të kuptuar se ky mjet i parlamentarizmit ka rënë, kujtoni se 7 miliard euro të buxhetit u ‘diskutuan’ dhe kaluan për 7 minuta. 

Valët mediatike të brendshme i kontrollon opozita

Palët politike, këtu apo në botë, kanë si shqetësim kryesor pasqyrimin e aktiviteteve në media, e njohur në terma profesionalë si agenda setting, pra përcaktim i agjendës. Ditët e seancave parlamentare janë qartësisht të përcaktuara nga agjenda e opozitës, jo e qeverisë. Të vetmet ditë të javës kur opozita është, volens non volens, në të gjitha ekranet e TV-ve përfshirë dhe ato të qeverisë.

Tërheqja e vëmendjes së medias së huaj

Jo dhe aq për agenda setting, se sa për të luajtur në politikën e brendshme me projeksionin në politikën apo median e huaj, pasqyrimi i zgjeruar që ka marrë aksioni opozitar në parlament është një fakt që e bezdis qeverinë. Opozita ia ka dalë që, duke ndezur një zjarr pa rrezikuar asgjë, të përhapë në mediat kryesore të botës një shkëndijë për veten dhe një parehati për qeverinë.

Ambasadat e vendeve partnere ‘janë futur në lojë’

Pa një heshtjeje të gjatë, pavarësisht shkeljeve ciklopike dhe të larmishme të qeverisë dhe persekutimit të opozitës, ambasadat e fuqishme perëndimore në Shqipëri, amerikanja, britanikja, gjermanja dhe e BE-së kanë reaguar pas aksionit opozitar në parlament. Edhe pse gjuha është si gjithherë e veshur me diplomaci, vërehet në të, më në fund, pranimi se ka një problem dhe se problemi zgjidhet më së pari nga ai që e shkakton. Duhet kujtuar se në zemër të problemit është vendimi i shumicës për të refuzuar Komisionet parlamentare, nismat ligjore dhe për t’i përcaktuar opozitës përfaqësimin politik dhe institucional.

Qeveria po shtyhet në putinizëm

Fakti që aksioni opozitar në parlament po funksionon, e dëshmon shtyrja që qeveria po i bën vetes drejt dyerve të putinizmit institucional. Një nismë ligjore që i është lënë deputetes Felaj, paraqet si të dobishme idenë se komisionet parlamentare duhen fshirë krejtësisht nga agjenda e jetës parlamentare. Pra, heqja e një prej instrumenteve të vetme që ka opozita për të kontrolluar qeverinë, sipas parimit checks and balances. Kjo e kthen parlamentin në një enë boshe që nuk përfaqëson politikisht atë pjesë të popullatës e cila nuk voton qeverinë, dhe e lë vendin pa opozitë. Në kushtet kur në vend po shfaqen trajtat e një sistemi justicialist, Shqipëria kthehet në Republikën ku qeveria ushtron pushtetin ekzektuiv dhe gjyqësori luan ‘kontrapedalin’ duke e anulluar mekanizmin e opozitës politike.