Interpelanca për takimet në Aruba, Bardhi: 5 çështjet që Rama duhet të japë sqarime

Kryetari i Grupit Parlamentar në Partinë Demokratike, Gazment Bardhi, ka reaguar sërish në lidhje me interpelancën e kërkuar nga opozita me Kryeministrin Rama, në lidhje me takimet e mundshme të përfaqësuesve të qeverisë shqiptare me eksponentët e krimit në Aruba.

Përmes një postimi në rrjete sociale, Bardhi ngre një sërë pyetjesh për Ramën, mes të cilave kërkon të dijë nëse kryeministri ka dijeni për takimin e dokumentuar nga Antimafia Italiane të zhvilluar në 2019, në ishullin Aruba dhe kush janë eksponentët e lartë të Qeverisë shqiptare, që kanë marrë pjesë në atë takim.

Bardhi thekson se interpelanca është një instrument kushtetues dhe parlamentar që nuk mund të anashkalohet apo të injorohet nga kreu i ekzekutivit dhe ky i fundit duhet të japë sqarime.

Seanca është parashikuar të mbahet ditën e enjte dhe mbetet për t’u parë nëse Rama do të paraqitet në Kuvend për tu përgjigjur pyetjeve të ngritura nga opozita.

Postimi i plotë i Bardhit

Në përputhje me Kushtetutën dhe Rregulloren e Kuvendit, Grupi Parlamentar i Partisë Demokratike ka kërkuar zhvillimin e një interpelance urgjente me Kryeministrin Edi Rama lidhur me ndikimin e krimit të organizuar në ekonomi dhe fuqizimin e tij përmes lejeve, licencave apo fondeve publike, që shërbejnë si mekanizëm për pastrimin e parave të pista.
Kryeministri Edi Rama duhet të japë sqarime Kuvendit lidhur me çështjet më poshtë:

· A ka dijeni Kryeministri Edi Rama për takimin e dokumentuar nga Antimafia Italiane të zhvilluar në periudhën 24–31 Janar 2019, në ishullin Aruba, në Karaibe, zyrtarisht territor i Mbretërisë së Hollandës?

· Kush janë eksponentët e lartë të Qeverisë shqiptare, që kanë marrë pjesë në atë takim dhe a është informuar Kryeministri Edi Rama prej tyre apo shërbimeve të sigurisë kombëtare mbi përmbajtjen e takimit?

· A ka përfituar shtetasi Artur Shehu, apo persona të lidhur me të, leje ndërtimi; licenca; punë publike; marrëveshje koncesioni apo partneriteti publik-privat; prokurime publike apo fonde publike, nga Qeveria Shqiptare apo institucionet nën varësinë e ekzekutivit?

· A është takuar ndonjeherë Kryeministri Edi Rama me shtetasin Artur Shtetit, apo ka zhvilluar ndonjëherë takime qeveritare apo elektorale në pronat e paluajtshme në pronësi të këtij shtetasi, që rezulton të jetë një person i skeduar nga disa agjenci ligjzbatuese si drejtues i një organizate ndërkombëtare kriminale të trafikut të drogës?

· Cfarë masash ka marrë Kryeministri, si drejtues i Këshillit të Ministrave, për të parandaluar që krimi i organizuar të ketë ndikim të ndjeshëm në ekonominë shqiptare, apo të mos dëmtojë konkurencën e lirë në treg, sic citon edhe Raporti i Departamentit Amerikan të Shtetit?

Mbetet të shihet të enjten nëse Edi Rama do të respektojë Kushtetutën dhe Rregulloren e Kuvendit për t’i dhënë përgjigje këtyre pyetjeve legjitime. A do marrrë ai guximintë vijë në Kuvend dhe të pranojë fuqizimin e një personi të shpallur si kreu i një organizate ndërkombëtare të trafikut të drogës?