“Kim ndërhyn në proceset gjyqësore”, Berisha: Pse nuk kërkova takim me Mike Pompeo-n

Ish kryeministri Sali Berisha ka akuzuar sërish ambasadoren amerikane në Tiranë, Yuri Kim se po përpiqet të ndërhyjë në procesin gjyqësor për çështjen e statutit të PD-së.

Nga Berati ku zhvilloi një takim me demokratët, Berisha tha se Kim është përpjekur ta dëmtojë ‘Rithemelimin’, duke shkelur ligjet shqiptare dhe konventat ndërkombëtare.

“Ambasadorja Kim është përpjekur ta dëmtojë këtë lëvizje në çdo hap të saj. Në 100 vjetorin e marrëdhënieve SHBA-Shqipëri keqardhja ime është se janë tre vetë që kanë dëmtuar më shumë këto raporte, Soros, Edi Rama dhe zonja guvernatore që e ndjen veten se mund të ndërhyjë edhe në proceset gjyqësore, që thërret gazetarët dhe u thotë censuroni duke shkelur kushtetutën pse jepni Berishën.

Thërret ata që bëjnë sondazhe dhe u thoshte çfarë janë këto sondazhe. Presidenti i SHBA është mik i shqiptarëve, e kam njohur, por ajo nuk e përfaqëson kur ndërhyn në gjykata, ajo shkel ligjet tona dhe konventat ndërkombëtare”, u shpreh ish kryeministri.

Po ashtu, Berisha hedh poshtë zërat se ka kërkuar një takim me ish-sekretarin amerikan të shtetit Mike Pompeo i cili vizitoi pak ditë më parë Tiranën.

Berisha tha se ndjeu keqardhje kur mësoi se konferenca për 100-vjetorin e miqësisë Shqipëri-SHBA u organizua nga Taulant Balla, që sipas tij është dokumentuar se ka udhëtuar shumë herë me Edmond Begon, një i dënuar për trafik droge.

“Patëm vizitën e Mike Pompeo në Tiranë. Kam ndjerë trishtim të madh. Jo pse nuk u takova se nuk kisha arsye pse të takohem, tani jam në proces.

Cfarë ndodhi? Kush e ftoi në konferencën e 100 vjetorit? Ftesat u shpërndanë nga Taulant Begoja që me dokumente është 56 herë bashkudhëtarë me Edmond Begon, një i dënuar për trafik droge.

Atë mund ta ftonte ministria e Jashtme, universiteti, akademia diplomatike por që konferencën ta organizojë Balla më kujtoi Saimir Tahirin në Shtëpinë e Bardhë, faqe e zezë. Është fyerje për miqësinë mes dy vendeve dhe shqiptarët. Kemi të tjerë që do bënte konferencë për Pompeon, pastaj shpifin se kam kërkuar unë takim me të.

Kurrë nuk kam kërkuar takim me të. U bënë copa një muaj që të merrnin deklaratë për mua por e patë vetë. Unë s’i kërkova askujt. Ai e shpjegoi qëllimin, e kuptoi si u sollën gjërat dhe bëri një twiter. Udhëtimi në Shqipëri në kampin Iranian në Manëz”, tha Berisha.