Flash News

KRYESORE

Koha s'pret më për koalicionin / Basha takon Idrizin dhe Mediun, të hënën në zyrë i shkon Dule

Koha s'pret më për koalicionin / Basha takon Idrizin dhe Mediun,
Foto ilustruese

Teksa kanë mbetur edhe pesë ditë larg nga afati përfundimtar nga dorëzimi në Komisionin Qëndror të Zgjedhjeve, lista e koalicioneve dhe emrat me të cilën koalicionet do të përfaqësohen, Basha duhet të mbyllë sa më shpejt negociatat me aleatët për tu futur në një listë të përbashkët në zgjedhjet e 25 prillit.

Mësohet se këtë të premte, Basha ka zhvilluar një takim në zyrën e tij, prej më shumë se 60 minutash me kreun e PDIU-së, Shpëtim Idrizi. Ky i fundit i ka paraqitur emrat potencial të forcës politike të tij për përfaqësim në listën e përbashkët të koalicionit. Burime bëjnë me dije se vet kreu i çamëve kërkon që të jetë pjesë e listës së Qarkut Tiranës. Idrizi ka deklaruar se pretendimet e forcës së tij politike janë vetëm në 5 qarqe, ndërkohë që në të gjithë vendin PDIU do të jetë në mbështetje të Partisë Demokratike.

Pas Idrizit, në zyrën e Bashës sot shkoi dhe kreu i Partisë Republikane, Fatmir Mediu, për t'i paraqitur kandidatët e tij, ndërkohë që negociatat do të vazhdojnë dhe gjatë fundjavës.

Mësohet se ditën e hënë në tryezë me kryedemokratin do të ulet dhe kreu i PBDNJ, Vangjel Dule, për t'i diskutuar rreth qarkut se ku do të kandidojë, ku duket se do të zgjedhë mes Korçës dhe Vlorës. Pas përplasjeve me Fred Belerin e Himarës, Dule kërkon të largohet nga qyteti bregdetar për të shkuar në jug-lindje dhe mundësitë janë që ai të jetë i katërti në listën e Qarkut të Korçës.

Më parë Basha ka mbyllur negociatat me kreun e LZHK-së, Dashamir Shehi, kreun e Partisë Demokristiane, Nard Ndokën dhe me kreun e Partisë Agrare Ambientaliste, Agron Duka. Shehi do të jetë pjesë e listës së Tiranës, Ndoka në Shkodër, ndërsa Duka në Durrës. Duket se Lëvizja Socialistë për Integrim do të futet në një listë më vete.

 

Ditari politik

Të fundit