Mbledhja për Presidentin/ Berisha: Opozita s’përfaqësohet me të emëruar nga Taulant Balla. Alibeaj akuza ish-kryetarit

 

Ish-kryeministri Sali Berisha ka dhënë një prononcim për mediat pas përfundimit të mbledhjes së grupit demokrat. Ai foli për çështjen e presidentit të ri, duke theksuar se opozita s’mund të përfaqësohet me një figurë të zgjedhur nga qeveria.

Berisha hodhi akuza ndaj kryeministrit Edi Rama se po ndjek një “praktikë mafioze” për zgjedhjen e presidentit, e cila cënon kriteret e kësaj procedure.

“Në mbledhje të grupit theksova se opozita s’mund të përfaqësohet kurrë me të emëruar nga Taulant Balla. Kjo praktike merr fund e s’do e e njohë kurrë PD një praktikë të tillë.

Së dyti, denoncova me forcën më të madhe praktikën mafioze që ndjek Rama për procesin e zgjedhjes së Presidentit, praktikë që diskretiton institucionin e Presidencës e vetë zgjedhjen e Presidentit, praktikë kjo që përlyen qartësisht me aspektet e saj mafioze çdo lloj pjesëmarrje në një proces të cilin në kushte normale duhet të mirrnin pjesë të gjitha palët, praktikë që s’ka asnjë qëllim tjetër vec të nxjerrë nga zyrat e tij njeriun që do dhe që komandon”, tha Berisha.

Ndërsa kreu i grupit parlamentar të PD-së, Enkelejd Alibeaj ka thënë se në mbledhje ka gjithmonë ka zhurmë sa herë që vjen Berisha, ndërsa u shpreh se ky i fundit nuk ka asnjë rol në parti.

Alibeaj njoftoi se u la një mbledhje tjetër për t’u marrë mendimi i secilit deputet dhe në fund të sintetizohet qëndrimi i grupit parlamentar për zgjedhjen e presidentit të ri.

Sipas tij, Rama nuk e ka të drejtën të zgjedhë Presidentin e Republikës, sepse nuk i ka votat e mjaftueshme.

“Sot në mbledhjen e grupit e para çështje ishte ajo e axhendës parlamentare. Një çështje tjetër ishte ajo e qëndrimit që duhet të mbajë PD në lidhje me procesin e përzgjedhjes së Presidentit. Propozimi im, që në mënyrë kolegjiale të konsultohen të gjithë deputetët për qëndrimin e grupit parlamentar.

U la një mbledhje tjetër për t’u marrë mendimi i secilit deputet dhe në fund të sintetizohet qëndrimi i grupit parlamentar. Në mbledhjet e grupit parlamentar ka gjithmonë zhurmë se gjithmonë ndodh që vjen Berisha dhe pa asnjë lloj roli jep opinionin e tij.

Unë mund t’ju them për qëndrimin tim. Procesi i zgjedhjes së Presidentit të Republikës është një proces i rëndësishëm. Zgjedhja e Presidentit degradon fatkeqësisht në raundin e 4 dhe 5 me 71 vota dhe ju e kuptoni se sa penalizuese është për opozitën.
Megjithatë edhe sot që flasim, opinioni im është i qartë, Edi Rama nuk e ka të drejtën të zgjedhë presidentin e Republikës, nuk e ka të drejtën as me shumicën e thjeshtë”, tha Alibeaj.