Nga detajet për protestën dhe porositë te negociatat me partitë, pikat kryesore nga fjala e Berishës në Kryesi

Kryetari i PD-së, Sali Berisha mblodhi sot Kryesinë, ku diskutoi për protestën e 7 korrikut për të cilën tha se nuk është vetëm e demokratëve.

Udhëzimet

Berisha kërkoi nga anëtarët e Këshillit të dalin në terren dhe organizojnë strukturat e PD-së. Ai kërkoi mobilizim maksimal, ndërsa nënvizoi se protesta vjen në një kohë kur opozita është shumë e domosdoshme për vendin.

“Por të gjithëve ju anëtarëve të Këshillit Kombëtar drejtuesve u bie detyra të zbresin në çdo bllok grup seksioni e në të gjithë shtrirjen e PD për të bërë mobilizimin maksimal për këtë protestë.

Kjo protestë mblidhet, thirret, në një kohë kur vendi tashmë ka opozitën e vërtetë. Nuk ka më as manipulime e asgjë tjetër ka vetëm mbrojtje të interesave të qytetarëve.
kam shumë besim se qytetarët do i japin të gjithë asaj proteste përmasat dhe seriozitetin që ajo meriton”, u shpreh Berisha.

Negociatat me partitë

Kryedemokrati ka ritheksuar se protesta do të jetë gjithëpërfshirse. Ai tregoi se do të ketë negociatat me partitë e tjera opozitare, që t’i bashkohen protestës. Gjithashtu nënvizoi se revolta do të drejtohet nga Fronti Për Shpëtimin e Shqipërisë.

“Ka një klimë shumë pozitive te qytetarët për protestën shoqëria civile është e tëra në këmbë për të dhënë kontributin e saj në organizimin e kësaj proteste. Faktikisht protestën e drejton tashmë Fronti Për shpëtimin e Shqipërisë.

Kam shumë besim se partitë politike opozitare parlamentare jo parlamentare do i bashkohen protestës e do zhvillohen të gjitha tratativat me to”, tha Berisha.

Rama në Samitin e BE-së

Në fjalën e tij, Berisha dënoi sërish sjelljen e kryeministrit Rama në Samitin e BE-së. Ndërsa deklaroi se Rama sulmoi një vend mik si Bullgaria, Berisha tha se gjuha e përdorur nga kryeministri shqiptar iu përngjan autokratëve.

“Edi Rama shkoi në Bruksel si përfaqësuesi i Vuçiçit. Përdori një gjuhë ordineri ndaj përfaqësuesve të Bashkimit Evropian, siç mund të përdorte Putin apo Lavrov, pasi që të gjitha i ka porosi nga Beogradi. Sulmoi Bullgarinë një vend mik. Bullgaria ka qenë një nga avokatët kryesor kur është gjykuar çështja e pavarësisë së Kosovës. I ka bërë një mbrojtje të shkëlqyer pavarësisë së Kosovës”, shtoi kryedemokrati.

Kriza ekonomike

Berisha ka akuzuar qeverinë se ka ulur me 2% ndihmën ekonomike për familjet në nevojë. Gjithashtu e konsideroi të papranueshëm faktin që çmimet janë rritur në nivelet e vendeve që kanë të ardhura shumë më të larta se Shqipëria.

“Si mundet që nafta të ketë çmim identik me Finlandën, Norvegjinë e Zvicrën kur rrogat janë 8 herë më të ulëta dhe nëse Zvicra nuk nxjerr asnjë ton naftë Shqipëria nxjerr një milion ton naftë në vit.

Shqiptarëve po u ngushtohet laku që u ka vendosur Rama me çmimet, të dhëna shumë të qarta të sakta kanë treguar se vetëm nga TVSH-ja e çmimeve të rritura, qeveria ka përfituar 340 milionë euro e jo që nuk ua ka kthyer qytetarëve për lehtësim po themi gjysmën e tyre, por përkundrazi qeveria ka ulur me 2% ndihmën ekonomike për familjet në nevojë.

Pra kemi të bëjmë me një qeveri e cila nuk ka asnjë moral dhe që merr cdo vendim sikur ky popull nuk ushqehet, nuk vishet, nuk lëviz”, tha Berisha.