Pas Salianjit, edhe Boçi i përgjigjet Alibeajt: Vendimet personale në emër të grupit, hile bajate

Deputeti demokrat Enkelejd Alibeaj deklaroi sot se i ka paraqitur tre krerëve të grupeve parlamentare, një draft për zgjedhjen e Presidentit. Alibeaj theksoi se ka marrë mbështetjen e grupit parlamentar në përcaktimin e kritereve.

Pas përgënjeshtrimit që i bëri Ervin Salianji, ka reaguar edhe deputeti Luçiano Boçi. Në një postim në Facebook, Boçi shkruan se nuk ka asnjë vendim të grupit të PD për kriteret e presidentit duke i cilësuar vendimet personale të Alibeajt, një hile bajate.

Postimi i plotë:

Kjo e folura dhe paraqitja e vendimeve personale në emër të Grupit parlamentar të PD-së përpos që është qesharake, mbetet një hile bajate, për të marrë atribute të paqena dhe për të mbajtur gjallë një përçarje që dihet se kujt i shërben.

Grupi Parlamentar i PD nuk ka miratuar asnjë dokument kriteresh apo procedure për zgjedhjen e Presidentit, siç e paraqet z. Alibeaj.

Nuk ka pasur as vendim të Kryesisë grupit parlamentar, as mbledhje të grupit, as takim me kuorum për ta quajtur mbledhje grupi dhe as dakortësi në takimet pa kuorum.

Ky lloj keqpërdorimi i sinqeritetit dhe dëshirës së deputetëve të PD-së për të negociuar dhe propozuar Presidentin duhet të marrë fund.

PD ka organet e saj vendimmarrëse dhe ka miratuar rezolutën për zgjedhjen e Presidentit në Këshillin Kombëtar.

Grupi parlamentar është i unifikuar në idenë që është opozita ajo që duhet të propozojë.

Çdo përpjekje e Alibeajt për të paraqitur një opozitë false të emëruar nga Rama-Balla për të shpëtuar faqen e Ramës faqe botës, nuk pranohet.

Ne do të vazhdojmë misionin e PD-së për të përafruar qëndrimet për procesin dhe emrin me të gjithë partitë opozitare në nivel politik e parlamentar.