"Përjashtim deri në 60 ditë për deputetët", Berisha: Mosbindja civile do të vazhdojë

Kreu i Partisë Demokratike, Sali Berisha gjatë një konference me gazetarët është pyetur për vendimin që ka marr kuvendi për përjashtimin e deputetëve me 60 ditë nëse shkaktojnë kaos në ambientet e Kuvendit.

Berisha është shprehur se Rama kur ka bërë grusht shteti brenda shtetit dhe merr kompetencat e parlamentit vetë në dorë, është i aftë të propozojë çdo ligj dhe çdo masë.

Por kjo thotë Berisha nuk do e ndalë opozitën që të vazhdojnë mosbindjen civile edhe me një deputet të vetëm të PD që do mbetet aty, Rama do marrë përgjigjen që meriton.

“Siç konstatoni, parlamenti nuk ekziston. Kur them nuk ekziston, ai si ndërtesë ekziston, si klub monist ekziston, por si parlament që funksionon mbi bazën e ligjeve dhe Kushtetutës, nuk ekziston.

Mosbindja civile e grupit të deputetëve të PD, u dëshmua mjeti më efiçent apo ndër më efiçentët në histori, de facto përmbysi parlamentin e drogës, krimit dhe korrupsionit.

Dëshmoi para gjithë botës se çfarë përfaqëson regjimi aktual i Tiranës, por mbi të gjitha se çfarë përfaqëson vetë Edi Rama, një njeri i cili, i shndërruar në kreun e Meduzës të sistemit më korruptiv që ekziston kund sot, i shndërruar në kreun e Meduzës të qeverisë më të lidhur me krimin e drogës në ndonjë vend që ekziston sot, është i aftë në një puç antikushtetues të marrë në dorë edhe pushtetin e parlamentit, de facto ta asgjësojë atë.

Pra, ky përbën në historinë e revolucioneve demokratike, ky përbën një nga sukseset më të mëdha. Është e vështirë të gjeni ju, për të mos thënë të pamundur, 43 vetë që me lëvizjen e tyre të përmbysin parlamentin e drogës, krimit dhe narkoshtetit. Nuk ekziston në politologji, në histori. Jo.

Ndodhi vetëm në Shqipëri kjo.

Do thoni ju, çfarë fakti ke për këtë ti? Imagjino sikur ata deputetë të mos ishin në mosbindje civile në parlament, por të kishin bojkotuar parlamentin? Do dëgjonin qytetarët kakarisjet e deputetëve socialistë nga mëngjesi gjer në darkë për suksese imagjinare, për mashtrime, falsifikime, çdo gjë tjetër. Iku tani.

Tani kohërat i kanë të shkurtra, maksimumi 7 minuta, pa zë. Një parlament pa zë. Një parlament automatësh, që ngrenë dhe ulin kartonat.

Këtë krahasim duhet ta bëjnë qytetarët. Nëse demokratët nuk do ishin në betejë të mosbindjes civile gjer në mesnatë do vazhdonin diskutimet koprolalike me në krye Edi Ramën. Të paktën nuk ndodhi më se ai nuk ekziston më ai parlament.

Atëherë lidhur me masat që propozon ai, ai kur ka bërë grusht shteti brenda shtetit dhe merr kompetencat e parlamentit vetë në dorë, ai është i aftë të propozojë çdo ligj dhe çdo masë. Problemi është se mosbindja civile do të vazhdojë qoftë edhe me një deputet të vetëm të PD që do mbetet aty. Ai do marrë përgjigjen që meriton.”