Raporti i OSBE-së për zgjedhjet, Bozdo tregon se çfarë duhet të bëjë PD-ja që skenari të mos përsëritet

Eno Bozdo

Ish-koordinatori i Partisë Demokratike, Eno Bozdo ka reaguar për raportin e OSBE/ODHIR-it për zgjedhjet e 25 prillit, duke komentuar qëndrimin e palëve politike dhe atë të opinionit publik përballë këtyre gjetjeve.

Duke cituar shprehjen latinë “Verba volant, scripta manent”, fjalët i merr era, por shkrimet mbeten, ai thotë se kjo nuk përkon me realitetin shqiptar.

Sipas Bozdos, ajo çfarë thuhet në raportin e OSBE/ODHIR-it do të mjaftonte që vetë qytetarët të kërkonin dorëheqjen e qeverisë dhe ripërsëritjen e zgjedhjeve. Por, që kjo të ndodhë në Shqipëri, sipas Bozdos, është të ëndërrosh me sy hapur.

Ai thekson se raporti konfirmoi manipulimin dhe tjetërsimin e votës, keqpërdorimin e administratës, presionin politik, etj. Bozdo shton se me të drejtë shoqëria është e lodhur për ta lexuar dhe reaguar mbi raportin.

"Sigurisht ne si opozitë kemi të gjithë të drejtën të bërtasim sa të mundemi për këtë. Por shoqëria, jo pa arsye, ndihet shumë e lodhur për të lexuar dhe reaguar. As që e merr mundimin në fakt t`i hyjë këtij debati, edhe sepse cfarë raporti përmend janë gjërësisht të ditura dhe publikisht të debatuara", shkruan ai në rrjtet sociale.

Sa i përket "përkthimit" të raportit, Bozdo thotë se opinioni ndahet në tre palë, dy janë qëndrimet e opozitës dhe qeverisë dhe pala e tretë është ajo që mendon se të gjitha partitë janë njësoj.

"Ja pra sesi edhe një raport i shkruajtur tretet në ajer bashkë me vapën, pa më të voglin debatim kritik nga ana e opinionit publik. Politika bërtet, por shoqëria nuk reagon. S`ka pse të reagojë në fakt, sepse kur ajo bërtet, politika as që do t`ia dijë. Kështu ka ndodhur dhe kështu do të ndodhë ndoshta edhe për shumë vjet të tjerë në Shqipëri", shton Bozdo.

Duke e cilësuar të gjithë këtë situatë si një absurd, ai thotë se fituesi i vetëm del kryeministri Edi Rama. Bozdo shton se nëse PD nuk ndryshon mënyrën e reagimit kjo situatë do të përsëritet.

"I gjithë ky absurd ka vetem një fitues: Edi Ramën. Sepse raporti ODHIR është mjaftueshmërisht shterpë për t`i lënë të gjitha opsionet hapur, sepse PD reagon vecse duke thënë që “..ju kemi thënë…”, dhe sepse opinion publik është shumë i lodhur për të reaguar. I vetmi i qartë në këtë situtë është Rama, i cili e ka ndarë mendjen të përdorë përsëri të njëjtat metoda edhe në zgjedhjet e radhës, kurdo të jenë ato. Dhe pas katër vitesh, ne do të shohim përsëri të njëjtin absurd, me te njëjtët personazhe dhe të njëjtin skenar", shkruan ai.

Bozdo thekson se PD duhet të japë shpresë dhe të prodhojë energji pozitive. Duke shprehur bindjen se vetëm PD mund ta ndryshojë këtë situatë, Bozdo thotë se kjo arrihet me kontributin e çdo demokrati dhe duke e kthyer partinë siç ishte në '90.

"Kjo shoqëri e lodhur kërkon shkundje të fortë dhe PD është e vetmja që mund ta realizoje këtë. E për këtë kërkohet kontributi i cdo demokrati, sepse askush nuk mund të jetë i tepërt. Kthimi i PD në origjinën e viteve `90, në partinë më të madhe në vend, duhet të jetë objektivi i vetëm i opozitës sot. Për këtë duhet veprim politik, sepse në Shqipëri, edhe të shkruajturën e merr era...", përmbyll reagimin e tij Bozdo.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm